راحة بالي بتجهز دلوقتي لأهم وأكبر مهرجان للأمهات والأطفال في مصر في 2019، اللي هيحصل في آخر 2 ويك إند في نوفمبر. في المهرجان ده، هيكون فيه عرض أزياء هو الأول من نوعه لأن العارضات كلهم أمهات وفيه دمج لأمهات عندها تحديات جسدية ودمج لأطفال من ذوي الاحتياجات الخاصة وبيعرضوا تصميمات لجمهور الإيفينت من الأمهات.
ومن ضمن التصميمات إللي هتكون معروضة تصميمات لمصمم الأزياء المصري مهند كوجاك اللي أبهر الغرب وعرّف العالم على تطور تصميم الأزياء في مصر مع إن عمره خمسة وعشرين سنة بس. كوجاك حقق سمعته الهايلة دي في آخر خمس سنين بتصميماته المتميزة والخامات المتنوعة والغريبة اللي بيستخدمها.
كمجتمع من الأمهات، اللي شدنا أكتر من موهبة كوجاك وسمعته وتصميماته الجميلة، حبه وافتخاره وتقديره على الملأ لوالدته لدعمها له. نبيلة ياسين، والدة مهند، هي عارضة أزياء دائمة لتصميماته.إللي بنشوف جمالها لما بنشوفها عليها.
لأن راحة بالي بتهتم الأمهات وبصحتهم وجمالهم وبتدعمهم دايمًا، راحة بالي قررت تنفذ أول عرض أزياء في مصر قايم على فكرة إن الأمهات الحقيقية هما اللي يكونوا عارضات الأزياء. أم زينا كلنا، بتصحى من الفجر وتعمل مليون حاجة في البيت والمطبخ والشغل ومع الولاد، هنشوفها واقفة تعرض أزياء كنوع من التشجيع لينا كلنا كأمهات.
كوجاك هيساعدنا في ده وهيدعم معانا أمهات راحة بالي. لما فريق راحة بالي اتواصل مع مهند كوجاك، قال لنا إن والدته كانت وما زالت ظهره وسنده، وإن القوة اللي شافها فيها من وهو صغير ألهمته إنه يشتغل ويتحدى كل الظروف اللي ممكن تكون ضده عشان يوصل لكل اللي بيتمناه. وقال إنها دعمته في كل أوقاته وكان عندها إيمان فيه في الوقت اللي كان العالم ضده. وعشان كده هو عنده استعداد إنه يحتفي بكل أم ويساعد كل أم في إنها تلاقي تفردها وجمالها. كوجاك شايف إن كل واحدة فينا جميلة زي ما هي بغض النظر عن شكل جسمها أو مقاسها. وكمان حاسس بفخر إنه هيلبّس أمهات راحة بالي في أكبر مهرجان للأمهات والأطفال في مصر.
كوجاك مش المصمم الوحيد اللي هيكون في المهرجان، لكن كمان ندى أكرم، اللي عارفة إزاي تتعامل مع كل كيرفات الجسم وده أكتر حاجة الأمهات مهتمة بيها. كمان ممكن تشتري هدوم من Doo وNG.
طبعًا صعب تفوتي مهرجان زي ده. عشان كده، هنستناكي في مجرة الشيخ زايد 22 و23 نوفمبر من 10 الصبح لـ10 بالليل وفي كايرو فيستيفال سيتي في القاهرة الجديدة أيام 28 و29 و30 نوفمبر من 10 الصبح لـ10 بالليل.
