أمهات كتير موهوبين في الكتابة سواء بالعامية أو الفصحى، بيكون عندهم مواقف وحكايات تخص الامومة والحياة وما بيعرفوش يكتبوها فين. لو انتي من الأمهات اللي بيحبوا صناعة المحتوى على الإنترنت وعندك وقت للكتابة، وفي نفس الوقت هي مش مهنتك الأساسية، فالمقال ده عشانك انتي. جمعنا لك فيه أكتر 10 مواقع هتخلّي المحتوى بتاعك مقالاتك تتشاف كويس جدًا وتعبري عن نفسك في فرص مش مدفوعة الأجر بشكل مبدأي لكن مين عارف بعد كده ممكن توصلي لإيه.
لو بتفكري في مشروع من البيت .. هنا بالتفصيل ازاي تبدأي مشروع أكل بيتي ويكون مربح وناجح
10 مواقع للكتابة وصناعة المحتوى على الإنترنت
- ملهم Molhem
- كورا Quora
- نون
- عربي بوست Arabicpost
- أراجيك AraGeek
- راحة بالي Rahet Bally
- بلوجز سبوت Blogspot
- فيس بوك Facebook
- لينكد إن LinkedIn
- بيبي جراج Baby Garage
ملهم Molhem
موقع ملهم بيسمح لك بنشر كتاباتك ومقالاتك لكن بناء على مجموعة من الشروط، أهمها إنه لا يجوز استخدام الموقع للي عمرهم أقل من 18 سنة، وطبعا إن المحتوى يكون خالي من أي أمور دينية أو جنسية أو سياسية. وهو موقع معروف من أكتر مواقع صناعة المحتوى على الإنترنت، لو حابة تعرفي أكتر عن الموقع وشروطه وطريقة الاشتراك فيه تقدري تعرفي من هنا
كورا Quora
كورا موقع إلكتروني للسؤال والإجابة، ومن أشهر مواقع صناعة المحتوى على الإنترنت أي حد عنده سؤال بيدخل يطرحه على الموقع ده ويجاب عليه. والإجابات بيتم تعديلها وتنظيمها بواسطة مستخدمي الموقع, عليه لغات كتير جدًا: عربية وعبرية وإنجليزية، المقر الرسمي للشركة في أمريكا تحديدا في كاليفورنيا، وموجود على كورا حاجة اسمها Spaces أو “مساحات” بتقدري تكتبي فيها موضوعك كـ Post، تقدري تدخلي الموقع من هنا
نون
على موقع نون النسائي الشهير تقدري تشاركي ككاتبة في باب “كلامنا ألوان”، واللي يعتبر مساحة حرة لكل قراء نون، تقدروا تشاركوا فيه كتاباتكم وإبداعاتكم، وهيتم نشرها باسمكم، كل المطلوب إنكم تبعتوا المشاركات على ميل [email protected]، وتلتزموا بطول المقال بين 600 لـ 800 كلمة، ولو كان المقال يحتمل وضع صور جواه تمام، وبتبعتيه في صورة ملف وورد.
عربي بوست Arabicpost
واحد من أكبر المواقع اللي ممكن تشاركي عليها كتاباتك، بيستقبل مقالات رأي ومقالات التجارب الشخصية وبيحط مجموعة من الشروط ممكن تعرفي عنها أكتر من هنا
أراجيك AraGeek
الكتابة من خلال موقع آراجيك واللي يعتبر واحد من أكبر مواقع المحتوى العربي محتاجة شوية تركيز، لكنها مش مستحيلة، لو انتي أم وعندك رغبة في البحث والتقصي في موضوع يشغلك وحابة تفيدي غيرك بالمعلومات اللي وصلتي ليها ممكن تجمعيها في مقال وتبعتيها ليهم. وهم هيتابعوا معاكي فورًا وتقدري تعرفي أكتر عن طريقة المراسلة وشروط النشر من هنا
راحة بالي Rahet Bally
راحة بالي هو موقع لدعم وإرشاد الأمهات في مصر. لو عندك تجارب حابة تشاركيها معانا، دلوقتي تقدري تبعتي لينا تجاربك وأفكارك على موقع راحة بالي على الإيميل ده.
بلوجز سبوت Blogspot
في طريقة سهلة جدًا وهتوفر عليكي وقت عظيم، لو انتي محترفة في الكتابة أو حاسة إنك مش محتاجة تعدي بكل الخطوات المطلوبة للنشر في موقع زي المراسلة وانتظار المواففقة والتعديلات وخلافه، تقدري إنك تأسسي مدونتك الخاصة من خلال الخطوات دي وبسهولة شديدة هتقدري إنك تقدمي كل أفكار بالطريقة اللي تريحك على مدونة خاصة بيكي وتشاركيها بعد كده على مواقع التواصل الاجتماعي الخاصة بيكي بسهولة وفي الحالة دي ممكن تحققي ربح مع الوقت، اقري كمان أفضل 10 مواقع فري لانسر من البيت
فيس بوك Facebook
من بين الخصائص اللي بيقدمها فيس بوك هي الـ NOTES تقدري تكتبي كل الأفكار والخواطر اللي تيجي على بالك وفيس بوك هيساعدك إنك تشاركيها مع دوايرك بصورة أفضل.
لينكد إن LinkedIn
معروف إن موقع “لينكد إن” في الأساس هو موقع عملي للتوظيف، لكن الأمهات كمان تقدر تقتحمه لان الأمومة في حد ذاتها وظيفة مرهقة جدا، لكن “لينكد إن” بيحط مجموعة من الأهداف للمقالات المكتوبة أهمها إنها تكون بتقدم معلومة أو بتقدم شيء جديد لو انتي من الناس اللي بتهتم انها تفيد غيرها يبقى ده أنسب مكان تقدمي من خلاله تجاربك الناجحة والطريقة بالتفصيل تقدري تعرفيها من هنا.
بيبي جراج Baby Garage
بيبي جراج موقع للأمهات بيستقبل مشاركات وكتابات وتجارب الأمهات مع أطفالهم وبيرحب جدًا بده لو حابة تعرفي أكتر عنهم وعن طريقة التعاون معاهم تقدري تراسليهم من خلال صفحتهم على فيس بوك.
1 comment
شكرا على المعلومات