ملامح الفصل الدراسي اتغيرت 180 درجة، في كل مرة كان بيظهر فيها الدكتور طارق شوقي وزير التربية والتعليم، كان بيأكد إن على 3 أمور أساسية، مفيش وقف للدراسة تحت أي ظرف مفيش تأجيل للامتحانات، مفيش إلغاء لأي أجزاء في المنهج، ومع تصاعد حالات الإصابة بكورونا أولياء الأمور حسوا بحيرة كبيرة جدا “نقعد أولادنا في البيت ولا نوديهم المدرسة” وقدام إصرار الدكتور طارق شوقي على استمرار الدراسة بشكلها العادي حصل انقسام كبير، لحد بداية الأسبوع اللي فات لما فجأة اترفع الغياب وأصبح الحضور اختياري تحت شعار “اللي خايف يقعد في البيت”لكن في المقابل كان في طلبة مضطرين ينزلوا لأن عندهم امتحانات فاستمرت الأزمة لحد يوم الخميس لما حصلت المفاجأة الكبيرة.
هو حصل إيه؟
بدون مقدمات ظهر رئيس الوزراء الدكتور مصطفى مدبولي وأعلن خلال الاجتماع الأسبوعي للحكومة مجموعة قرارات الناس يا دوب سمعتها وبعدها على طول ظهرت تصريحات مباشرة من الرئيس عبد الفتاح السيسي وهوب طلع وزير التربية والتعليم اتكلم بعدها ويمكن لحد دلوقتي في أمهات كتير مش فاهمين هو إيه اللي حصل بالظبط، عشان كده راحة بالي هتقولكم ملخص لكل اللي حصل بالضبط.
الرئيس السيسي قال إيه؟
الرئيس عبد الفتاح السيسي أصدر توجيهات للحكومة بما فيها وزير التربية والتعليم الدكتور طارق شوقي بتقول:
- استكمال الدراسة لمدة أسبوعين من البيت اعتبارا من 2 يناير
- أجازة نص السنة من 16 يناير ولحد 20فبراير اللي جاي
- امتحان المرحلة الثانوية أولى وثانية من البيت بنظام التابلت
- امتحانات المراحل التعليمية بعد أجازة نص السنة في حالة استقرار أعداد الإصابات بكورونا أو تأجيلها.
قرارات رئيس الوزراء
الدكتور مصطفى مدبولي رئيس الوزراء أعلن خلال الاجتماع الأسبوعي للحكومة القرارات دي:
- استكمال تدريس المناهج الدراسية اعتبارات من 2 يناير ولحد نهاية الفصل الدراسي الأول بنظام التعليم عن بعد “أونلاين”.
- إتمام المناهج الدراسية.
- تأجيل الامتحانات لبعد أجازة نص السنة.
- الكلام ده ينطبق على كل أنواع التعليم وكل مستوياته يعني من الحضانة للجامعة وشامل خاص وحكومي وأزهري ودولي.
التفاصيل عند وزير التربية والتعليم
بعد توجيهات رئيس الجمهورية وقرارات رئيس الوزراء ظهر الدكتور طارق شوقي في مؤتمر عشان يوضح بالتفصيل الفترة الجاية هاتكون عاملة إزاي بالضبط وعشان يوضح أي لبس قال الآتي:
- مفيش أي طالب هيروح أي مدرسة من 2 يناير الجاي لأي سبب لا دولية ولا حكومية ولا خاصة وجميع الامتحانات العملية والنظرية خلاص وقفت.
- القنوات التعليمية مصادر أساسية للطلاب وعليها كل المناهج.
- منصة “ذاكر” مصدر إضافي متاحة للطلاب من أولى ابتدائي لثانوية عامة.
- مكتبة “حصص مصر” فيها خبراء من مركز تطوير المناهج عشان يساعدوا طلبة إعدادي وثانوي يفهموا أسئلة التقييم الجديد في الثانوية العامة والشهادة الإعدادية.
- تم وضع جدول أسبوعية على موقع الوزار للدروس في القنوات المختلفة.
- مفيش أي محذوفات من المنهج.
- مفيش أبحاث هتتعمل كبديل للامتحانات.
التعليق باستخدام حساب فيس بوك