ولادنا كبروا خلاص وهندخل على مرحلة جديدة علينا وهي مرحلة تقديم المدارس. الموضوع ممكن يكون محيّر شوية عشان الإختيارات كتير وكل مدرسة مختلفة عن التانية بس ممكن ننظم أفكارنا عشان نقدر نحدد ترشيحاتنا للمدارس و هنقولك في المقال ده إزاي تختاري المدرسة المناسبة لطفلك.
في الموضوع ده إحنا هنساعدك تنظمي أفكارك وأولوياتك وهنقولك نصائح قبل موسم تقديم المدارس.
الميزانية
أول حاجة هتعمليها إنك هتحددي الميزانية المناسبة ليكي وتبدأى تدوري على المدارس المناسبة للميزانية دي وتستفسري عن نظام التقسيط وإمكانية توافر خصم للأخوات وكمان تاخدي فى الأعتبار ميزانية الباص اللي ممكن تكون كبيرة لو مكان المدرسة بعيد عن بيتك.
نوع المدرسة
بعد ما تحددي الميزانية تاني حاجة هتفكري فيها هتدخلي ولادك مدارس نظامها ايه، هل انتي حابة تدخليهم مدارس ناشونال ولا انترناشونال ولا مدارس راهبات وإيه هو نوع المنهج المتبع في المدارس اللي هتستقري عليها سواء American أو British أو IB System.
سن التقديم
سن التقديم بيختلف من مدرسة للتانية وعلى حسب الأنظمة كمان، بعض المدارس بتبدأ من سن 3.5 للـKg و أقل للـPreK اعرفي سن قبول المدرسة اللي حابة تدخلي ولادك فيها وقرري هل بتفضلي إنك تدخلي ولادك من سن صغير زي الـ3 سنين ولا من سن أكبر وهل سن ابنك ممكن يكون ليه تأثيرعلى قدرته الإستيعابية وتحصيله الدراسي.
اللغة
إيه اللغة اللى تحبي ولادك يدرسوها كلغة أولى زي الفرنساوي والألماني وهل المدرسة اللى اختارتيها بتسمح بيهم كلغات اولى؟ ولازم تفكري انك لو دخلتيهم لغة أولى زي الفرنساوي هل إنتي بتعرفي تتكلمي اللغة دي ومتمكنة منها عشان تقدري تذاكري ليهم وتكوني قادرة تتابعي مع المدرسين ولا لا.
مكان المدرسة
مكان المدرسة لو بعيد عن البيت لازم تراعي إن إبنك هيقضي وقت طويل جدًا فى المشوار وده ممكن يسبب إرهاق ليه ويروح يكون مش قادر يروح تمرين أو يذاكر.
احتياجات ابنك
لو كان ابنك أو بنتك من ذوي القدرات الخاصة لازم تدوري على مدرسة مناسبة ليه وبتنمي من مهاراته الإجتماعية و الدراسية ولو المدرسة بتوفر Shadow teacher لدعمه فى الدراسة.
شوفي هنا نصائح مهمة .. ليه ابني الصغير مش بيسمع الكلام؟
جمّعي المعلومات
ادخلي على الموقع الرسمي للمدرسة واتعرفي أكتر عن نظامها، اسألي عن المدرسة من خلال أصدقائك أو أولياء الأمور لو فيه جروب خاص بالمدرسة دي ولو فيه إمكانية عمل زيارة للمدرسة عشان تتعرفي أكتر على المكان وشكل الفصول وعدد الطلبة.
وأخيرًا لازم تكوني إنتي مرتاحة نفسيًا للمدرسة اللي ابنك هيقضي فيها وقت كبير بعيد عن البيت، وحابين نسمع منك عن تجربتك فى التقديم للمدارس ونظمتي أفكارك إزاي.
اعرفي هنا أضرار التلفاز على الأطفال
التعليق باستخدام حساب فيس بوك