ظروف حياتنا بتتغير بشكل كبير بعد الحمل والخلفة وبنضطر نعيد ترتيب أولوياتنا من أول وجديد وممكن كمان نستغنى أو نأجل الكارير بتاعنا عشان خاطر ولادنا بقوا أولوياتنا، من ضمن الأسباب اللي بتخلينا نستغنى عن وظيفتنا هي اللوايح والقوانين وطبيعة العمل اللي ممكن تبقى غير مناسبة تمامًا لظروف حياتنا الجديدة..زي مثلًا مواعيد الشغل الطويلة اللي مش بتسمحلك تهتمي ببيتك وطفلك أو قلة الأجازات أو عدم تقدير ومراعاة الأم وظروفها.
جيسي رضوان مؤسسة Hire Supermama
جيسي رضوان وهي أم لطفلة لقت صعوبة إنها تلاقي شغل مناسب لظروف حياتها الجديدة واحبطت جدًا لما لقت انه بيتم الإستغناء عنها والمعاملة بتتغير فى الInterview لما بيعرفوا إنها أم.. وقررت إنها تعمل مبادرة لتوظيف الأمهات فى وظايف مرنة مناسبة لخبراتها وفيها مراعاة لظروف الأم سواء كانت وظيفة بدوام كامل أو بدوام جزئي أو من البيت Freelancer عشان تقدر تؤدي دورها كامل كأم وتعزز خبراتها وتحسن من مستوى معيشتها من غير ما تضطر تستغنى عن كيانها أو تقصر فى دورها كأم.
المبادرة إبتدت بجروب باسم Hiresupermama عبارة عن community لمجموعة كبيرة من الأمهات والإقبال على الجروب كبير جدًا بيجمعهم نفس الهدف ولما إبتدت الأمهات تحكي عن المشاكل اللي بتواجههم بعد الولادة، اكشتفت جيسي إن معظمهم بيمروا بنفس التجربة، منهم اللي سابوا الشغل عشان أجازة الوضع 3 شهور قليلة جدًا بالنسبة ليهم، وكتير منهم مقدروش يستحملوا المواعيد اللي بتخليهم راجعين تعبانين من الشغل مش قادرين يقضوا quality time مع اسرتهم وكتير منهم للأسف ملاقوش التقدير المناسب من مكان العمل وبيتم الاستغناء عنهم بسبب طبيعة الشغل اللي بتحتاج تفرغ كامل.. الجروب ابتدى إنه الأمهات بتتعاون مع بعض وبيساعدوا بعض إنهم يلاقوا وظايف مناسبة ويتبادلوا خبراتهم فى التوفيق بين شغلهم وبيتهم ومن هنا فكرت جيسي إنها تطور فكرة الجروب وتعمل مكان واحد بيجمع وظايف مختلفة مرنة للأمهات ومن هنا انشئت موقع: Hiresupermama
فكرة الموقع
الموقع بيوفق بين الشركة والأم وبيوفر وظايف متنوعة بها مرونة من حيث المواعيد وبه وظايف Full time و Part time و Freelance. عشان تقدمي على الموقع بتعملي حساب عن طريق إنك تملي فيه البيانات الشخصية وترفعي السيرة الذاتية الخاصة بيكي ومن خلاله بتقدري تدوري على وظايف بكلمات بحث معينة، مثلًا تقدري تدوري على الوظايف بدوام كلي أو جزئي وحسب المرتب أو المكان ولما تلاقي الوظيفة المناسبة بتقدمي عليها بمنتهى البساطة من خلال أيقونة Apply Now وبيتم التواصل معك فى حالة وجود فرصة للتعاون.
حبينا نعرفك على موقع Hiresupermama عشان لو بتدوري على شغل يناسب إحتياجاتك كأم، وكمان حابين نسمع منك عن خبرتك فى الشغل بعد الولادة وإزاي بتوفقي بينه و بين البيت.
التعليق باستخدام حساب فيس بوك