ميزانية البيت تعتبر تحدي شهري لكل البيوت خصوصًا إن مفيش ثبات طويل المدى للأسعار، فيه شهور بننجح فيها وشهور تانية لأ، بس عمومًا فيه قواعد عامة لو قدرنا نمشي عليها، هتساعد كتير تجنب حدوث مفاجآت خلال الشهر. في المقال هنا هنتكلم عن ميزانية البيت بـ 3000 جنيه لشخصين معاهم طفل واحد، ومن غير ما تكون الميزانية دي بتشمل إيجار البيت في حالة السكن في إيجار جديد، يعني الكلام هيكون على أكل البيت وفواتير الكهرباء والمياه اللي بتكون شهرية، باقة الموبيل والإنترنت، فتعالي نبدأ نصنف بنود الصرف.
أهم نصائح لعمل ميزانية البيت بـ 3000 جنيه
-
بناكل إزاي؟
علشان تحددي اتجاه الميزانية دي، لازم تحددي الأول شكل النظام الغذائي المتبع في البيت عامل ازاي، مش هننكر أبدًا إن فعلًا عمل الأكل في البيت حقيقي بيوفر جدًا عن شراء أكل جاهز، بس حقيقي بييجي وقت بنحتاج مرة أو مرتين في الشهر، نجيب أكل من بره.
-
نشتري منين الأكل؟
لازم تعرفي إن فرق الأسعار ما بين الهايبر ماركت والأسواق العادية بخصوص الخضار واللحمة حقيقي كبير، لإن دايمًا في الهايبر ماركت أسعار الخضار والفاكهة أغلى من أي بتاع خضار أو فاكهة.
هنا بقى دليلك لـ عمل ميزانية البيت الشهرية خطوة بخطوة
-
نتابع العروض
من الأمور اللي أنا باعتبرها مسلية ليّا أنا شخصيًا متابعة عروض الهايبر ماركت لإن مش كل مرة ورقة العروض أسعارها هتكون مناسبة ليكي.
-
مشوار الهايبر ماركت مرة في الشهر
بعد ما شوفتي عروض الهايبر ماركت اللي جنبك، حددي إيه اللي عاجبك ومحتاجاه في البيت، من أفضل العروض هناك بتكون عمومًا في اللي احنا بنسميها النواشف، يعني البقوليات والمكرونات والرز وعروض حتى على التونة والشاي والمساحيق والزيت. كل ده هياخد منك زيارة واحدة أول الشهر تجيبي منها اللي يقضيكي باقي الشهر.
اقري هنا نصائح لتدبير ميزانية رمضان قبله بشهور
-
الفواتير
بعتبر معدل 300 جنيه كهرباء ومياه معدل طبيعي لكل البيوت اللي قاعد فيها يدوب زوجين جداد وده طبعًا بدون وجود تكييفات في البيت، لإن ساعتها فاتورة الكهرباء هتكون أكبر من كده.
ميزانية المنزل لشهر كامل لفردين 2021
-
أسابيع الشهر
تقدري تقولي إن فيه حوالي 1000 جنيه هيكونوا مصاريف خارجة في الفواتير ومشوار السوبر ماركت، نقدر نقول إن فاضل 2000 جنيه في بند الأكل موجود معاكي، هنا لازم تقسّمي المبلغ ده بمعدل 500 جنيه في الأسبوع تقدري تجيبي في الأسبوع كيلو لحمة وفرخة كبيرة بوزن 2 كيلو، ونص كيلو بانيه بنص الميزانية، والـ250 جنيه تجيبي بيهم خضار وفاكهة الأسبوع.
تقدري تقولي إن دي خطة عامة أنا نفسي بامشي عليها، لازم تعرفي علشان تقدري توصلي لأفضل سياسة إنفاق محتاج منك تجربي شهر ورا التاني لحد ما يكون عندك تصور عام للمصاريف الثابته بتاعتك، لإن بعدها انتي هتقدري تتحركي في إطار اللي فاضل بعد سداد الفواتير، ولو انتي عندك حيل إنفاق غير اللي فوق دي، اكتبيها لنا في الكومنتات تحت علشان نتعلم منك.
التعليق باستخدام حساب فيس بوك