في الشهور الأخيرة من الحمل، بتلاقي إن المصاريف عمّالة تزيد بعد ما اشتريتي مستلزمات البيبي كلها، ومع قرب موعد الولادة بتبدئي رحلة البحث عن مستشفى ولادة مناسبة، وبتفكري في سبوع المولود وتحضيراته، بس فجأة بتلاقي الميزانية المطلوبة منك كبيرة جدًا، وانتي نفسك تعملي كل حاجة زي ما انتي عاوزة من غير ما تلغي حاجة، علشان كده أنا هقولك ازاي تعملي ميزانية الولادة وكمان ميزانية سبوع المولود الجديد.
قبل ميزانية الولادة .. احسبي الميزانية المتاحة معاكي
مهم قوي واحنا بنحسب ميزانية الولادة، نشوف الأول معانا كام وبعدين نرتب عليه نفسنا، مش العكس.. لإن كل واحد فينا بيكون نفسه في أجمل وأشيك وأغلى حاجة، فلو اختارتي الأول وبعدين لقيتي إن ميزانيتك مش سامحة، هتحبطي، علشان كده لازم اختياراتك تكون في حدود ميزانيتك.
اعملي حساب الطوارئ
لما تيجي تحسبي ميزانية الولادة، احسبي على التكلفة الأعلى أو السيناريو الأغلى، فمثلا في الولادة حتى لو هتولدي ولادة طبيعية اعملي حساب إنها ممكن تكون ولادة قيصرية، واللي هي أغلى بالتأكيد، واحسبي كمان إن البيبي ممكن يحتاج حضّانة، وهكذا، والطريقة دي مفيدة لإن لو حصل السيناريو الأغلى بتكوني في أمان، ولو ماحصلش فخير وبركة الحمد لله، هتلاقي معاكي فلوس لأي حاجة جديدة يظهر احتياجك ليها.
ميزانية سبوع البيبي .. رتبي الأولويات
صحيح إن حفلة سبوع البيبي مفرحة وكل حاجة، بس أكيد مش أهم من الولادة، فمش عشان تعملي حفلة سبوع المولود الجديد رهيبة، تسترخصي في مستشفى الولادة مثلا وتروحي مكان مش موثوق طبيًا، وانتي فاكرة إنك كده بتوفري في الميزانية، وهكذا.
-
اعملي حاجة من كل حاجة
لو الميزانية معاكي مش واسعة قوي، اعملي كل اللي نفسك فيه بس بتوزان، فمثلا لو ولدتي في مستشفى كويسة بس غالية، مش لازم تعملو فوتوسيشن وتزيني أوضة الولادة المستشفى، والسبوع اعمليه بس مش لازم تعزمي ناس كتير جدًا وتعمليه في مكان رهيب ومكلف، ممكن تعملي حفلة لطيفة في البيت فيها الناس اللي بيحبوكي وفرحانين ليكي، مع تجهيزات متناسبة لميزانيتك.
هنا دليلك لعمل سبوع مصري على طريقة جدتك
-
الفلوس مش كل حاجة
أنا عارفة إن الكلمة دي كليشه قوي، بس هي فعلا حقيقية جدًا، فماتزعليش لو لقيتي نفسك مش عارفة تجيبي حاجة أو تعمليها زي ما كان نفسك فيها، وافتكري انك انتي والبيبي بصحة وعافية، وإن السعادة مش بفخامة التجهيزات ولا بكترة التكاليف.
وبنتمنى ليكي وللبيبي تقوموا بألف سلامة
التعليق باستخدام حساب فيس بوك