المرأة العاملة بتكون عليها ضغوط كتيرة في التوفيق ما بين بيتها وحياتها وشغلها، ومطلوب منها ما تقصرش في ولا حاجة فيهم، وبيزيد الضغط ده رمضان مع الصيام وازدحام الجدول اليومي للسيدة وبتكون محتاجه تعمل حتى ولو جدول لـ إدارة الوقت في رمضان، علشان كده هنقولك على 5 نصايح هتساعدك على الإنجاز و إدارة الوقت في رمضان في شغلك.
-
نامي كويس
والنصيحة دي ذهبية لكل وقت، سواء في رمضان أو الأيام العادية، لإن مرات من كتر المسؤوليات اللي على الست، بتضطر تسهر علشان تنجر، فبتصحى تاني يوم طاقتها قليلة وإنجازها قليل جدًا، علشان كده ساعة واحدة في الشغل وانتي نايمة كويس، فيها بركة وإنجاز 3 أو 4 ساعات شغل بدون نوم وبعد سهر طويل.
-
رتبي أولوياتك في الشغل
الشغل بيكون فيه تفاصيل كتير زي الإيميلات والتواصلات، ده غير المهام الرئيسية الخاصة بشغلك والديدلاينز وعلشان تنجحي في إدارة الوقت في رمضان وتشتلغي بتركيز وقت الصيام، فمهم جدًا قبل ما تبدأ ساعات شغلك، تشوفي إيه الأهم وتبدأي فيه، ولو في حاجة من المهام ممكن توترك، أجليها علشان متبوظش عليكي يومك.
-
التزمي بساعات العمل في رمضان
مرات بنكسل أو بنزهق ونأجل بعض المهام، لبعد ساعات العمل، ونقول هخلصها بالليل، ولما بييجي بالليل بتلاقي إنك مش قادرة تنجزي أو عندك مهام تانية خاصة بيكي خارج الشغل عاوزه تنجزيها، وبتدخلي في دوامة من التراكم والتأجيل، علشان كده أفضل حاجة إنك تلتزمي بساعات العمل تخلصي فيها أكبر قدر من المهام المطلوبة منك، ومتأجليش إلا للضرورة القصوى أو للظروف الطارئة.
-
افصلي وخدي بريك
سواء في اليوم نفسه وخلال ساعات العمل، وده بيكون بريك بسيط تفصلي فيها علشان ترجعي لشغلك بطاقة متجددة، أو خلال أيام العمل عن طريق إنك تاخدي يوم أجازة تنسي فيه الشغل خالص، علشان تشحني طاقتك وترجعي تنجزي تاني.
-
اطلبي المساعدة
لو إنتي على طول متوترة ومضغوطة من الشغل، أو مهامك كتيرة جدًا عليكي ومش بتخلصيها، أو مقابلاكي مشكلة في الشغل مأثرة على إنجازك، اتكلمي مع مديرك ومع زمايلك، ممكن يساعدوكي ويقترحوا عليكي حاجات وطرق تسهل عليكي شغلك، أو مديرك يشيل من عليكي بعض المهام الزيادة وخصوصًا في شهر رمضان لإن وقت ساعات العمل بيكون أقل.
وبنتمنالك النجاح في كل مهامك الحياتية، وكل سنة وإنتي طيبة وموفقة.
ممكن كمان هنا تشوفي حقوق الأم العاملة في قانون العمل المصري
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك