قرار الانتقال أو العزال من بيت لبيت آخر جديد زي ما بنقول يكاد يكون كابوس بالنسبة لكتير من الناس، لدرجة تخليهم يفضلوا في مكانهم علشان مش عايزين الخطوة دي، بجانب إن فيه شعور بالارتباط بالمكان تقريبًا بيكون موجود عند كل واحد فينا تجاه بيته، سواء البيت ده كان إيجار أو تمليك بس النهارده وعلشان نخفف عنك توتر الخطوة ويمكن كمان نشجعك إنك تاخديها، جبنا لك مجموعة نصائح مهمة جدًا لو اتبعتيها هتساعدك في الانتقال من منزل إلى لبيت آخر بسلاسة ويمكن تجربة الانتقال دي تتحول من قلق لتجربة إيجابية كنتي محتاجة ليها من زمان، بس إحنا هنقسم كلامنا لجزئين أو بمعنى أصح لبيتين: البيت القديم اللي هتسيبيه، والبيت الجديد اللي هتروحي تسكني فيه، كل واحد فيهم محتاج إجراءات خاصة لتجهيزه، فتعالي نشوف إيه هم:
تجهيزات الانتقال إلى البيت الجديد
المرحلة دي بتتقسم ما بين حاجتين:
- لسه بدور على بيت جديد
- لقيت خلاص بيتي الجديد
في مرحلة لسه بدور على بيت جديد لازم تعرفي إزاي تحددي احتياجك اللي انتي بتسعي من خلاله للانتقال واللي خلاص أصبح مش موجود في بيتك القديم، يعني دلوقتي مثلا أسرتك عدد أفرادها كبر، أو حتى فيه أفراد منهم كبروا وانتقلوا لبيوتهم، الإضاءة اللي عايزاها، البيت بيشوف الشمس قد إيه بالنهار، البانوراما اللي بيطل عليها، مدى قرب العمارات لبعض، الدور الكام، مكان الشارع، مدى الضوضاء اللي فيه، مستوى الخدمات اللي متوفرة فيه من مواصلات ومحلات ومدارس، مساحة المطبخ، عدد الغرف والحمامات، وطبعا التكلفة في إيجار أو شراء الوحدة السكنية الجديدة، كل ده إنتي بس اللي هتقدري تحدديه، مفيش حد هيقولك قواعد من خلالها تختاري لأن الموضوع نسبي جدًا وبيختلف من أسرة للتانية.
تجهيزات الولادة: إزاي ارتب بيتي قبل الولادة؟
لو خلاص وقع إختيارك على البيت الجديد فإنتي لازم تعرفي شوية خطوات تعمليها قبل ما تنقلي أي حاجة من بيتك القديم للجديد واللي هما :
- الكشف على وصلات الكهرباء كلها، وده هيحتاج تجيبي كهربائي متخصص يكشف لك على كل ما يخص الكهرباء في بيتك وتتأكدي إن تجهيزات البيت مناسبة لأجهزتك الكهربائية والعدادات سليمة.
- الكشف على كل ما يخص السباكة، لأنها من أكتر الأمور المزعجة لأقصى حد إنك تحطي عفشك وتكتشفي إن المطبخ أو الحمام فيهم مشكلة صرف.
- التأكد من إن الدهانات بالألوان اللي انتي عايزاها والحوائط مش ظاهر فيها أي رطوبة قد تأثر على الدهانات.
- التأكد إن كل العدادات اللي في البيت سليمة وخالصة السداد، ده هيجنبك الدخول في مشاكل كتير ورحلة البحث عن المالك أو المستأجر القديم.
- مهم جدا جدا قبل ما تنقلي للشقة الجديدة إنه يتم تنضيفها بشكل عميق، علشان مع إنتقال عفشك فكرة التنضيف تحته وتحريكه هيكون لها صعوبات تقدري بالخطوة دي تتجنبيها.
دي كانت الخطوات العامة اللي هتفرق معاكي جدا وتسهل عليكي جزء مش قليل من العزال، تعالي دلوقتي نعرف البيت القديم نعمل فيه إيه:
تجهيزات العزال من البيت القديم
دلوقتي اللي قدامك حياة كاملة مرتبة وكانت مستقرة لسنوات محتاجة تنقليها كلها لمكان جديد، حاجة فعلا شبه نقل معبد ابو سمبل بس اليونيسكو مش فاضية دلوقتي تعمله معاكي، بس إحنا هنعمله معاكي في الخطوات دي:
- جهزي قائمة بالأولاويات
- اختاري وحدات النقل بتاعتك
- جهزي صندوق اليوم الأول
- اكتبي على كل صندوق اللي فيه
- الملابس المكوية انقليها في أكياس زبالة
- غلفي أطباقك بالورق
- خلي بالك من الحاجات القيمة والأوراق المهمة
- أفضل وقت لصيانة العفش
- وقت تنضيف الأجهزة الكهربائية
- إنقلي العفش الأول
- وقت التخلي عن القديم
- صوري كابلات الأجهزة اللي عندك قبل ما تفكيها
- جهزي جدول بأيام التجميع والنقل
- حددي ميزانية الانتقال
- أطلبي المساعدة
- عرفي أهلك وأصدقائك ومكان عملك
- خلي بالك من حيوانك الأليف
- ما تنسيش نباتاتك
- ودعي جيرانك وأصدقائك
- نضفي البيت القديم
جهزي قائمة بالأولويات
الانتقال في الشتاء بيكون غير الصيف وخصوصًا لو فيه ارتباط بالمدارس عندك في البيت، اكتبي في القائمة دي كل اللي إنتي محتاجة تعمليه علشان ما تنسيش أي حاجة .
اختاري وحدات النقل بتاعتك
يعني هاتي الكراتين اللي هتحتاجي تحطي فيها الحاجة ودي سهل شرائها من السوبر ماركت وحتى الصيدليات بتوفر عليكي عناء البحث عن شنط أو حتى شراء شنط جديدة واللي هتزود عليكي التكلفة.
جهزي صندوق اليوم الأول
ده يعتبر أهم صندوق تجهزيه، لأن إنتي هتحتاجي تحطي فيه احتياجاتك إنتي وأسرتك اللي بتحتاجي لها في العادي واللي من خلاله مش هتحسي إن فيه حاجة متعطلة بالنسبة لأسرتك وإن الأمور ماشية بسلاسة، زي مثلا الملابس اللي بحتاجها كل فرد في البيات مثلا: ملايات سرير، أطباق ومعالق وكوبايات، صابون ومعجون وفرش الأسنان معلبات أكل جاهز، شواحن الموبايلات واللاب توب، الحاجات الأساسية اللي انتي عارفه إن البيت عندك بيستخدمها.
اكتبي على كل صندوق اللي فيه
من أكتر الأخطاء اللي فعلا تعتبر جريمة في حق النفس، إنك تحطي أي حاجة توصل لها إيدك في أي صندوق من منطلق أهو يالا خلينا نخلص، لأن يلا خلينا نخلص هيخليكي لما تيجي تنقلي وتفتحى الصندوق ما تخلصيش من اللف حوالين نفسك وهيزود عليكي التعب، كل كرتونة مكتوب عليها اللي فيها، يعني مثلا: كرتونة مخصصة لأدوات المائدة، كرتونة مخصصة لكتب المدرسة، كرتونة لكتب المكتبة، كرتونة للتحف وهكذا.
الملابس المكوية انقليها في أكياس زبالة
قد يبدو الكلام صادم، بس إحنا حاليا مش لازم نستخدم الأكياس السوداء قليلة الجودة دي، إحنا نستخدم النوع الكويس ويمكن الملون كمان، هتقومي بكل بساطة تلبسي الهدوم دي وهي مكوية ومتعلقة في شمعتها الكيس وتقفلي عليه، كدة لما تنقلي الدواليب هتعليقها بمكواتها زي ما هي ومش هتدوري على حد يكوي لك في أيامك الأولى في بيتك الجديد.
غلفي أطباقك بالورق
من الحاجات اللي بنخاف عليها في النقل هي الأطباق أو كل الزجاجيات اللي عندنا، بنخاف عليها جدا من الكسر، علشان كده من تجهيزات النقل عندك إنك تجيبي ورق قديم، سواء إنتي عندك كراسات قديمة أو تشتري جرايد قديمة تغلفي بيها الحاجات دي وتحطيها في الكراتين وممكن وسطهم قطع قماش قديمة أو ملابس بحيث تمنع الإحتكاك فتحميهم، وضروري الكرتونة دي تكون آخر كرتونة تتحمل وأول واحدة تنزل علشان ما يحصلش ضغط عليها ولو إنتي عندك عربية خاصة يبقى من الأفضل تنقليها بنفسك.
خلي بالك من الحاجات القيمة والأوراق المهمة
من الحاجات اللي ممكن تتعرض للخطر في عملية العزال هي الحاجات القيمة زي مثلا الدهب والأوراق المهمة، قدامك حل من الإتنين يا تخلي نفسك إنك إنتي اللي تنقليهم بحيث تبقى عارفة مكانهم وما يكونش عليهم أي خطر أو تشليها عند حد موثوق فيه لحد ما تستقري وتقدري تجيبيهم، إحنا بننتقل لبيت جديد ومش عايزين خسارة.
أفضل وقت لصيانة العفش
فرصة دهبية لصيانة العفش عندك لو عايزة تلمعي الخشب أو تخفي عيوب خربشة عليه أو تغيري مفصلات الدواليب أو تركبي مرايات جديدة يبقى ده أفضل وقت ليهم، والعملية دي بتتم في البيت الجديد مش القديم، يعني بمجرد وصول العفش البيت الجديد تقدري تستدعي حد متخصص يعمل لك اللي إنتي عايزاه.
وقت تنضيف الأجهزة الكهربائية
الوقت ده كويس جدا لتنضيف التلاجة والمراوح والبوتاجاز بشكل عميق وتطلبي يتعمل لوحدة التكييف عندك صيانة من حد متخصص، الحلو في النقطة دي إن الأجهزة بتاعتك لما تروح البيت الجديد هتكون جاهزة للاستخدام ومش هتحتاجي تقضي وقت إضافي لتنضيفها بعد نقلها.
إنقلي العفش الأول
يمكن الخطوة دي مش سهلة أوي وأغلبنا بيكون عايز ينقل كل حاجة مرة واحدة، بس لو فيه إمكانية فمن الأفضل نقل العفش الأول وبعد كده الفرش، ولأسباب بسيطة إنك هتقدري توقفي العفش في البيت الجديد وتحركيه بسهولة أعلى بكتير من لو الكراتين موجودة في النص، بحيث يكون العفش مستعد يتملي تاني بالحاجات بتاعتك.
وقت التخلي عن القديم
من الحلو في النقل إن ده أفضل وقت تقدري تفرزي فيه الهدوم وتستغني عن القطع القديمة والكتب القديمة وكل ما هو قديم مركون عندك، إنتي رايحة بيت جديد إيه لازمته تروحيه بنفس كركبة القديم ؟!
صوري كابلات الأجهزة اللي عندك قبل ما تفكيها
من معضلات العزال هي إزاي هتقدري تركبي كل أسلاك اللابتوب والراوتر والتلفزيون والريسيفر وغيرها من الأجهزة اللي عندك، علشان كده بننصحك إنك تصوريها على الموبيل علشان لما تروحي البيت الجديد تستخدمي الصورة كدليل يريحك في تركيبها بعد كده.
أجمل 30 تصميم لـ ركن القهوة في ديكور البيت
جهزي جدول بأيام التجميع والنقل
علشان الأمور تكون سهلة عليكي هتحتاجي تعملي جدول ترتبي فيه أولويات التجميع، يعني الحاجات اللي مش بتستخدميها بشكل يومي إبدأي بيها لأن تجميعها مش هيعطل مسار حياتك إنتي وأسرتك، وهكذا المهم فالأهم اللي هيكون آخر حاجة تجمعيها من البيت القديم وأول حاجة تفتحيها في البيت الجديد.
حددي ميزانية الانتقال
من المهم تعرفي وتسألي تكاليف الانتقال بتكون قد إيه علشان ما تحصلش مفاجآت في الفترة دي بسبب نقص في الفلوس.
اطلبي المساعدة
من الحاجات اللي مفروض تطلبيها وما تتكسفيش منها إنك تطلبي المساعدة من أفراد أسرتك وحتى أصدقائك وعائلتك إنهم ممكن يساعدوا في التجميع والنقل وفتح العزال .. الموضوع ده بيكون حلو جدا وفيه تعاون وتواصل وتوفير للوقت والمجهود بشكل رهيب.
عرفي أهلك وأصدقائك ومكان عملك
من الأمور المهم جدًا إنك تعمليها إنك تبلغي دايرتك اللي عارفة عنوانك القديم إنك اتنقلتي لعنوان جديد، زي أهلك وأصدقائك والشغل الجديد وحتى صاحب السكن القديم وتغيري عنوان البطاقة وتنقلي خطوط التليفون لمكانك الجديد، علشان اشتراك النت ولو فيه محامي وأي حاجة إنتي بتسمحي بوصولها ليكي عن طريق عنوانك.
خلي بالك من حيوانك الأليف
لو كنتي من النوع اللي بيربي حيوان أليف فنقله محتاج كذا إجراء، أولا لازم تتأكي إن المكان الجديد بيسمح بوجود الحيوانات الأليفة، نوع إنتقالك لو من منطقة لمنطقة أو من كحافظة للتانية دي أمرها سهل، لكن لو من بلد للتانية هتحتاجي تعرفي إيه الإجراءات اللي هتحتاجي ليها لنقلهم، إعملي لحيوانك الأليف فحص شامل عند الطبيب البيطري اللي متعود عليه لحد ما تنقلي شهاداته لطبيب أقرب لمكان سكنك الجديد، وطبعا ما تنسيش احتياجاته في صندوق اليوم الأول.
ما تنسيش نباتاتك
من المهم جدا تاخدي بالك في عملية نقل نبتاتك علشان ما تتعرضش لأي ضرار خلال الانتقال، لو كانت في قصاري زرع صغيرة فإنقليها بنفسك في عربيتك الخاصة أو أطلبي مساعدة من أحد معارفك في المهمة دي، ولما تنقليهم بيت جديد جمعيهم كلهم في مكان جيد التهوية بيشوف نور الشمس سواء كانوا ظل أو شمس علشان النباتات بتتأثر بالإنتقال وتجمعيهم على بعض لمدة كام يوم علشان تحافظي على بقائهم بصحة جيدة.
ودعي جيرانك وأصدقائك
لو انتي هتتنقلي من منطقة لمنطقة متنسيش تودعي جيرانك وأصدقائك اللي كونتي علاقة بيهم على مر الفترة اللي فاتت، لو هتتنقلي من محافظة للتانية أو من بلد للتانية فهتحتاجي تضيفي لقائمة التوديع أهلك وزملائك كمان.
نضفي البيت القديم
من الخطوات المهمة وهتعبر عن مدى ذوقك وحتى امتنانك للأيام اللي عشتيها في المكان القديم إنك تنضفيه بشكل عميق بعد ما تنقلي كل حاجاتك في البيت الجديد، فزي ما استلمتي الشقة نضيفة وجميلة أول مرة سيبيها كدة علشان اللي يجي يسكن بعدك يشكرك حتى لو في سره.
نتمنى إن المقال ده يكون مساعد ليكي فعلا في عملية الإنتقال الجديدة، وإن البيت الجديد يكون بداية جديدة ومخزون ذكريات سعيدة كتير وسنوات راحة هتقضيها فيه، ولو عندك أي نصيحة زيادة عن دول ما تحرميناش منها وشاركينا بيها في التعليقات.
المصادر:
www.familyhandyman.com
www.mymovingreviews.com
www.lifehack.org/
1 comment
مقال رائع ومفيد جدا ولم اصادف مثل تلك التفاصيل من قبل…..تحياتى وتقديرى