عمرك سألتي نفسك ليه احنا الستات بعد مرحلة العشرينات بنعيش كمية توتر يومي ومستمر خوفًا على شكلنا؟ وإن تقدم العمر بيأثر بالسلب على شكلنا؟ كلنا بنعيش التوتر أو الخوف ده. ندخل التلاتينات وتبتدي ملامحنا تنضج وممكن تظهر شعرات بيضاء وخطوط رفيعة حوالين العين ومعاهم يبدأ فيلم الرعب. كل ده لحد ما نوصل للأربعينات. هنا بقى الرعب بيكون في قمته. ليه؟ مع إن حقيقي مفيش ست مش حلوة. والسن حقيقي مجرد رقم. الموضوع وما فيه انتي قد إيه مهتمة بنفسك. المرأة بعد سن الأربعين لازم تعرف إنها في أجمل أوقاتها. الفترة اللي بتكوني عارفة إن فيه 20 سنة عدت من الجهد، وفيه سنين تانية من النجاح والعطاء. لكن خلينا النهارده نتكلم مع بعض عن أهم النصائح اللي هتحتاجي لها لرعاية صحتك وجمالك في الفترة الذهبية دي.
نصائح لـ جمال المرأة بعد سن الأربعين
- ما تبطليش نشاط وحركة
خلّي الرياضة الخفيفة جزء من روتينك اليومي، زي إنك تتمشي نص ساعة مثلًا، تلعبي يوجا، تتعلمي السباحة، أي نشاط يومي يحافظ على صحتك ونشاطك ونشاط الدورة الدموية. وبالتالي صحة عظامك والمفاصل.
- استخدمي زيت الزيتون
خلي زيت الزيتون جزء أساسي من حياتك. بس مش أي زيت زيتون. لازم يكون زيت زيتون بكر معصور على البارد بدرجة حموضة أقل من 1% ومحفوظ في زجاجة داكنة. دي أفضل مواصفات لزيت الزيتون. استخدميه في ترطيب بشرتك سواء الوجه أو الجسم. حتى لو عندك آلام خفيفة في المفاصل، فدهان زيت الزيتون الدافئ على مكان الألم هيكون له نتيجة فعالة جدًا في تخفيف الألم ده. طبعًا بجانب إنك لازم يبقى جزء أساسي من غذائك اليومي، سواء على السلطة أو الجبنة أو حتى مع العيش.
- الثقة هي المفتاح
ثقتك في نفسك وإحساسك إنك جميلة هو اللي هيخلّي كل اللي حواليكي شايفينك كده. العالم كله بيشوفك من عينيكي. نظرة العالم لكي هو انعكاس نظرتك. علشان كده، لازم تعززي إحساسك بالثقة وما تخليش مظهرك الخارجي يؤثر على شعورك ده. لأن أيًا كان مظهرك، فهو الاستايل الخاص والمناسب لكي. اختاري دايمًا استايل مناسب لكي.
- تقشير البشرة
تقشير البشرة واحدة من أجمل الهدايا اللي هتديها لنفسك، لأن إزالة طبقات الجلد الميت هي الوسيلة الوحيدة اللي هتخلي بشرتك تتنفس، وفي نفس الوقت تتجدد ويوصل لها الأكسجين. اختاري دايمًا المقشر المناسب لنوع بشرتك. لو كانت بشرتك من النوع الجاف، هتحتاجي لمقشر كريمي بحيث يوفر لك مع التقشير، الترطيب اللي محتاجة له بشرتك. ولو كانت بشرتك دهنية، استخدمي مقشر جيل علشان يتحكم في زيادة إفراز الدهون.
اعرفي هنا طرق طبيعية لتقشير بشرتك
- احمي بشرتك
واقي الشمس هو صديقك الصدوق دلوقتي. ما تعديش أي يوم حتى لو ما خرجتيش إلا لما تحطيه على بشرتك، سواء الوجه أو الرقبة أو الأيدي. تأثير الشمس دلوقتي في المرحلة دي من عمرك سلبي أضعاف ما كان في أي وقت قبل كده. علشان كده، اختاري واحد يكون مناسب لنوع بشرتك وما تنسيش تستخدميه.
- رطبي بشرتك
المرأة في سن الأربعين ومع التقدم في السن، بطبيعة الحال الغدد المسؤولة عن إفراز الدهون في البشرة نشاطها بيقل. علشان كده، بتحتاجي تدخلي كريمات أو زيوت الترطيب كجزء أساسي من روتين الرعاية اليومية للبشرة.
- استخدمي ماسكات البشرة
بشكل أسبوعي، خصصي من 15 لـ 30 دقيقة لعمل ماسك مرطب ومعزز للبشرة حتى لو بسيط ومكوناته موجودة في البيت. زي مثلًا تجيبي موزة وتهرسيها ومعلقة زبادي ومعلقة عسل، واخلطيهم مع بعض وحطيهم على بشرتك لحد ما بنشف تمامًا. وبعد كده، اغسليه بماء فاتر، ماسك بسيط بيناسب جميع أنواع البشرة هيوفر لك الترطيب من الزبادي ومقاومة البكتيريا من العسل وتحفيز إنتاج الكولاجين من الموز.
- حبي عينيكي
الخطوط الرفيعة حوالين العين من العلامات الأولى للشيخوخة، وأوقات عدم الاهتمام بها بشكل صحيح. ومن البداية، هيدّي دايمًا انطباع بالإجهاد وسن أكبر من سنك. علشان كده، احرصي على اختيار منتج متخصص لمنطقة العين واستخدميه قبل النوم. مع الاستمرار، هتلاقي المشكلة دي اتحلت.
- تخلصي من البقع الداكنة
كل آثار الحبوب القديمة، وحتى تصبغ بعض مناطق البشرة، لازم تستخدمي لها منتجات غنية بفيتامين سي بشكل منتظم علشان تتخلصي منها، لأن وجودها على بشرتك بيدي إحساس إنك أكبر من سنك الحقيقي.
- كلي كويس
المرأة بعد سن الأربعين لازم تهتم بالنظام الغذائي لازم يكون غني بالفواكه والخضروات والورقيات. ولازم تشربي مياه من 6 لـ 8 كوبايات في اليوم. ابعدي تمامًا عن السكريات والتدخين ومصادر التلوث على قد ما تقدري. ما تنسيش البروتين والبعد عن الدهون الضارة.
- استخدمي كريم ترطيب ليلي
من الأمور الجيدة جدًا في الاهتمام بالبشرة هو كريم الليل. استخدميه بشكل منظم ويومي. ولو كنتي من النوع المستخدم للمكياج، لازم تحرصي على التخلص من كل آثاره على بشرتك قبل النوم. وبعد كده، استخدمي الكريم. مع الانتظام فيه، هتلاقي نفسك بتصحي كل يوم على بشرة متوهجة ومترطبة وجاهزة ليوم جديد.
- اهتمي بأسنانك
من الأمور اللي بتعكس شباب المرأة أسنانها اللي بتبان في ابتسامتها الجميلة. مع الوقت طبعًا، ومع شرب الشاى والقهوة، وحتى تناول الأكل، لون الأسنان بيتغير. عشان كده، حطي دايمًا في دايرة اهتمامك استخدام معاجين أسنان بتقوم على الحفاظ على اللثة والتنظيف والتبيض في نفس الوقت. مع زيارة دورية ومنتظمة لطبيب أسنان علشان متابعة حالة أسنانك. ومش عيب لو لجأتي لتبييض أسنانك بس احرصي على اختيار درجة طبيعية علشان ما تظهرش أسنانك بشكل صناعي وتنعكس بالسلب على مظهرك.
آخر نصيحة لكي ويمكن أهمها في الفترة دي من حياتك هي: خليكي سعيدة ومتمتعة بلياقة جسدية. اهتمي بجمالك الداخلي زي الخارجي بالضبط. الجمال الداخلي بيبان جدًا على مظهرك، اتمشي، اخلقى فرص سعادة لنفسك، قاعدة رايقة مع مزيكا هادية، قعدة ضحك مع أصحاب العمر، خروجة جميلة مع شريك العمر، استرجاع ذكريات حلوة مع أولادك. ما تبخليش على نفسك بالسعادة. انتي تستاهلي. عدى جزء جميل من العمر وفي إيدك إن الجزء اللي جاي يكون أحلى.
التعليق باستخدام حساب فيس بوك