كتير من الأمهات بيستخدموا مضخات الثدي لشفط حليب الثدي (Breast Pumps) أو بيلجأوا لشفط الحليب اليدوي علشان البيبي يفضل يرضع من لبن الأم ويستفيد بكل فوايده. هنقولك دلوقتي نصائح إزاي تعملي شفط حليب الثدي في الشغل وإزاي تخزنيه.
فيه أمور الأول لازم تاخديها بعين الاعتبار، وفيه سببين مختلفين لضخ لبن الثدي
- إنك تفضّي الثدي من اللبن المتجمع علشان ما يحصلش تسريب أو ألم أثناء وقت الشغل.
- بيكون علشان تجمعي لبن الثدي وتجمديه والبيبي يرضعه وإنتي في الشغل تاني يوم.. بسبب عدم وجود غرفة رضاعة طبيعية في أغلب الشركات، معظم الأمهات بيكتفوا بإفراغ الثدي من اللبن في دوره المياه علشان ما يحصلش تسريب.
- خططي عملية شفط اللبن، ابدأي باستخدام الشفاط قبل ما تنزلي الشغل بتلات أسابيع علشان تتعودي عليه ويكون سهل تستخدميه في الشغل.
- للأسف في مصر مش بيكون فيه مكان غير دورة المياه لإن مفيش غرفة خاصة للرضاعة الطبيعية ولكن لو لقيتي غرفة هادية واتأكدتي إنه مافيهاش كاميرا هيكون أفضل كتير..
- تقدري تطلبي ساعة الرضاعة بتاعتك من إدارة الموارد البشرية علشان تعملي فيها Pumping
طبعا فيه شفاطات كتير للبن الثدي، أنواع مختلفة، منها مضخ ثدي الكتروني ومضخ ثدي يدوي.. مشكلة الاكتروني إنه بيكون صوته عالي وده ممكن يسبب لبعض الأمهات إحراج في الشغل، علشان كدة شفاط الثدي اليدوي هيبقى عملي أكتر لإنه صغير في حجمه وخفيف وملوش صوت.
شفط حليب الثدي باليد (يدوياً)
طرق شفط حليب الثدي في منها طريقة شفط يدويًأ وبيسمى “عصر لبن الثدي” بدون مضخة ودي هتحتاجي تشوفي الفيديو ده علشان تتعلميها.. هتساعدك كتير علشان تفضي الثدي لو بيوجعك في الشغل..
وأخيرا ما تنسيش الـPad إللي بتتحط جوة حمالة الصدر علشان تمتص الحليب الزائد إللي ممكن يتسرب بعد عملية الشفط أو أثناء اليوم.
طريقة شفط حليب الثدي
الأوكسيتوسين هو الهرمون المسئوول عن إدارار اللبن وممكن نحفزه بكذا طريقة، منها إنك تبصي على صورة البيبي أو تسمعي صوته أو تفكري فيه.. فممكن تجربي تعملي كدة وقت الشفط.
تخزين حليب الثدب بعد الشفط
لو بتعرفي تشفطي كمية لبن كويسة في الشغل، يبقى ممكن تجربي تجيبي أكواب حفظ حليب الأم وتحطي فيها اللبن وتشيليه في شنطة صغيرة آيس بوكس إللي بيكون فيها أكياس تلج وتحطيه في الفريزر أول ما تروحي وعليه ستكير بالتاريخ علشان تعرفي صلاحيته هتخلص إمتى، لإنه لبن الأم ليه صلاحية في التلاجة والفريزر، بالخطوات دي
- حطي الحليب في التلاجة في درجة حرارة 0-4 مئوية بحد أقصى 48 ساعة.
- ممكن تحطي اللبن في الفريزة لمدة تصل لتلات شهور
- حطي اللبن في الرف العلوي مش في الباب علشان درجة حرارة الرف بتكون ثابتة أكتر.
- لمّا تطلعي اللبن من الفريزر علشان يفك وتحطيه في التلاجة لازم تستخدميه بحد أقصى 24 ساعة .
- لو نزلتي اللبن من الفريزر وفك ما ترجعيش تجمديه تاني.
لو المقال مفيد ليكي، اقرأي مقالات تانية عن الرضاعة الطبيعية
المصدر
https://www.philips.ae/ar
التعليق باستخدام حساب فيس بوك