محتويات المقال
شراء السجاد عندنا في مصر له اختيارات ومعايير مختلفة عن اللي ممكن يكون معتاد في أمريكا وأوروبا، إحنا بنحب إن السجادة تكون في النص وتكون مبينة الأرضيات من السيراميك، بينما مثلا في أمريكا بيكون اختيارهم الأول للموكيت اللي بيغطي مساحة الأرض كلها ويحطوا فوقه سجاد أو من غير ، وغالبًا الاختيار بيكون لون واحد محايد علشان يكون لايق على أي ستايل هيتفرش في البيت، بس إحنا هنا هنتكلم إزاي تختاري السجادة الصح، تعالي شوفي إنتي محتاجة تعرفي إيه قبل الاختيار:
نصائح مهمة قبل شراء السجاد لبيتك
-
حددي المساحات اللي هتفرشي فيها السجادة
من المهم جدا تقيسي المكان اللي إنتي هتجيبي له سجادة، محتاج سجادة مقاس إيه، لأن من الأخطاء الشائعة في شراء السجاد ومسبب للإحباط هو المقاس غير المناسب، لو جبتيها صغيرة جدًا، بيكون شكلها مش مقبول ولو كبيرة مش هتعرفي تتحكمي فيها صح وهتضر الشكل المطلوب.
أفكار ديكور لاستغلال مساحات الشقق الضيقة
-
قرري ألوان السجاد
قبل ما تشتري السجادة لازم تبقي عارفة ومحددة ألوان ديكور الأوضة اللي هتفرشي فيها السجادة، يعني مينفعش تعجبك سجادة وتحطيها وتكتشفي إن ألوانها مش متناسقة مع ألوان العفش والدهان، ده هيطفيها تمامًا وهيعتبر خسارة مادية ليكي.
أهم 20 نصيحة قبل العزال من بيت لبيت آخر جديد
-
حددي ميزانية شراء السجاد
من المهم جدًا إنك لما تروحي تشتري سجادة، إنك تحددي المبلغ اللي هتدفعيه في بند السجاد، المفيد في كده إنك لما تدخلي أي محل سجاد تقدري تقولي للموظف إن حدودك المادية قد إيه، وده هيخليه يوجهك للسجاد المتناسب مع ميزانيتك فيوفر عليكي لف كتير ووقت ومجهود.
-
حددي خامة السجاد وابعدي عن الموضة
ممكن تستغربي من النقطة دي، بس أغلب الموضة غير عملية أبدا وغير متناسبة مع أسلوب الحياة لأسرة بأطفال في البيت، زي مثلا السجاد الشاج، على رغم شكله اللطيف إلا إن استخدامه سيء ومحبط لأقصى حد، لأن الشعيرات بتاعته بتتشابك وتنضيفه هنعتبره الجزء الأخير واللي ما اتصورش من “المهمة المستحيلة”، ما بيحصلش إن حد بيتبسط بأي سجادة شعرها طويل بزيادة، عموما كل ما كان اختيارك لخامة السجادة خامة طبيعية كل ما كان استخدامها وصيانتها أسهل.
-
كل غرفة ليها نوع سجادة معينة
كل أوضة في البيت ليها اسنخدام مختلف عن التانية، يعني أوضة النوم غير المكتب غير الليفنج وهكذا، والنقطة دي أهميتها بتيجي في إن اختيار السجادة المناسبة بيساعد على إن عمرها يطول معاكي وتنضيفها سهل وتريحك.
تقدري تقولي إن دي القواعد الذهبية الخمسة لشراء السجادة، حطيها في اعتبارك وإنتي بتشتري، ولما تيجي تشتري سجادة بصي لها بصة مستقبلية، اللي هو هنعيش مع بعض إزاي يا سجادة، هتتوسخي بسرعة ولونك هيبقى رمادي ولا هتطلعي جدعة؟أو لو سجادة غامقة هتكئبيني وأروح أشتري واقي سجادة مرح ولا هتعملي معايا إيه؟ إعملي للسجادة في سرك إنترفيو علشان هي لما هتدخل بيتك مش هتطلع بالساهل، كدة أنا ريحت ضميري معاكي ولو عندك نصايح غيرها اكتبيها في التعليقات.
المصادر :
www.restorationmasterfinder.com
www.thespruce.com
www.amerrugs.com
التعليق باستخدام حساب فيس بوك