آباء كتير عارفين كويس فوائد الرضاعة الطبيعية للمولود الجديد والأم لأن حليب الأم فيه كل العناصر الغذائية اللي ممكن يحتاجها الرضيع، وكمان هي نعمة مجانية من عند ربنا مفهاش تحضير ولا تنظيف أو تعقيم، بس بعض الآباء ممكن يقلقوا من إن العلاقة الجديدة بين المولود والأم دي مش هيكون لهم مكان فيه، وممكن الأب ساعتها يفكر إنه مهما قدم لابنه مش هيبقى زي الأم أبدًا.
النهارده هنقدم للآباء 5 نصائح هتخلي فترة الرضاعة وقت أحسن لهم وللعيلة كلها، ومش معنى إنك متقدرش تشارك بشكل فيزيائي في عملية الرضاعة إنك مالكش علاقة بعملية تغذية الولد بالعكس ده دعم الأم نفسيًا وجسديًا هيخلي ثقتها في نفسك تزيد وفي قدراتك كأب كمان.
أهم نصائح للآباء خلال فترة الرضاعة الطبيعية
- ادعم زوجتك قد ما تقدر في أوقات الرضاعة الطبيعية زي انك تقدم لها كوباية مياه أو حليب أو تساعد البيبي انه يتجشأ بعد الرضاعة وممكن كمان تساعدها في الأعمال المنزلية وهتلاحظ فرق كبير جدا في البيت كله.
- خليك حريص على الملامسة الجسدية لابنك في أوقات كتير زي الحضن أو تحميمه أو تنويمه أو ملاعبته، الحاجات دي هتعوض عليك وقت التلامس الجسدي لطفلك مع والدته أثناء الرضاعة.
- عشان تساعد شعور الأبوة انه يزيد في نفسك ممكن تاخد طفلك وتخرجوا سوا لوحدكم في نزهة قصيرة مع عربة الأطفال أو شيالة الأطفال الرضع، أو تلعب معاه في البيت وتدي وقت للأم عشان ترتاح شوية، أوتعمل حاجة خاصة بيها عشان ترجعلكم في حالة نفسية كويسة.
- لو الأم كانت بتستخدم مضخة الحليب ممكن تساعدها انك ترضع ابنك عن طريق الببرونة في أوقات محددة عشان الطفل ما يرفضش الرضاعة من ثدي الأم ولو الطفل رفض الرضاعة عن طريق الببرونة في البداية ما تقلقش لأنه غالبًا هيكون لسه ما اتعودش على الحلمات البلاستيكية.
- لو زوجتك رفضت العلاقة الجنسية في وقت الرضاعة الطبيعية، فخليك متأكد إن ده مش بسبب انك بطلت تبقى مرغوب عندها لكن بسبب إن أغلب الأمهات المرضعات عندهم نسبة أقل من هرمون الاستروجين فده بيأدي لترطيب مهبلي أقل وبالتالي ألم أثناء العلاقة، ماتقلقش ودور على مزلق حميمي مناسب تستخدمه لما زوجتك تكون في حالة مزاجية كويسة.
وطبعا الأهم من ده عزيزي الأب إنك تتكلم مع زوجتك عن كل حاجة بتحس بيها بصراحة ومن غير افتعال للمشاكل.
What’s your Reaction?
التعليق باستخدام حساب فيس بوك