هعمل غدا إيه النهاردة؟ السؤال ده حرفيا جزء لا بتجزأ من روتين تفكير أي واحدة فينا بمجرد ما تتجوز، ويا سلام لو كمان بتشتغلي سواء في البيت أو بتخرجي كل يوم فدايما بتفركري في إيه هو أسرع غدا بعد الشغل ويا سلام أكتر وأكتر لو عندك أطفال فده معناه إن السؤال ده بيجر وراه مجموعة أسئلة كلها بتدور حول إزاي تقدري تخلصي كل المهام المنزلية اللي عندك في أسرع وقت.
هنا ممكن تشوفي 12 حيلة مطبخية مهمة لكل ست بيت
إحنا هنا في مصر بنعتبر وجبة الغدا هي الوجبة الأساسية في اليوم حتى لو هناكلها بعد منتصف الليل هيفضل أسمها وجبة الغدا برضه، فدلزقتي إنتي قدامك تحدي حل المعادلة اللي مكونة من: وجبة مغذية + إقتصادية + تتعمل بسرعة جدا لأنك راجعة من الشغل مفرهدة + متكونش جاية من برة، تتحل إزاي المعادلة دي؟ أنا هنا النهاردة هقولك كمرأة عاملة وبعد محاولات عديدة كانت دي خلاصة خبرتي واللي أقدر أقول ساعدتني حقيقي كتير، فتعالي أقولك من قلب زميلة في الكفاح إلى قلب زميلتها أنا عملت إيه.
يوم نحن لا نزرع الشوك
في يوم أسبوعي لو عندك فريزر صغير أو كل أسبوعين لو عندك فريزر كبير أو ديب فريزر، في اليوم ده إنتي بتغيبي في المطبخ بس النتيجة اللي هتطلعي بيها هتخلي حياتك سعيدة، اليوم ده هتعملي فيه كل التجهيزات اللي هتحتاجي ليها باقي الأسبوع، وتخليكي تجهزي أكلك بالكتير جدا في ساعة زمن، وعلشان تنجزي ويكون تفكيرك منظم حددي إيه هي وجبات الغدا على مدار الأسبوع، ده هيخلصك من عناء التفكير كل يوم في التفكير في أسرع غدا بعد الشغل ممكن يتعمل بأقل مجهود، وهيخليكي تتحركي بسلاسة أكتر وتطلعي اللي عايزاه بس.
هنا بقى هتعرفي بالفصيل تعملي إزاي جدول لأكلات الأسبوع “هناكل إيه النهارده” .. إزاي تنظمي جدول لأكلات الأسبوع كله
جهزي الفريزر
- اعرفي إن مافيش حد هيحس بيكي ويشيل عنك غيره، الوحيد اللي هتتعاملي معاه على إنه الـbackbone بتاعك، ويا سلام لو عندك ديبفريزر، كدة تجهيزاتك ممكن تتم كل أسبوعين مش كل أسبوع.
- تجهيز الفريزر الناجح بيستلزم حاجتين: أكياس التلاجة، وترتيبه بشكل صحيح. ليه بنقول أكياس التلاجة ده اولا متينة وصحية عن الأكياس العادية، بتتقفل وتتفتح بسهولة، وسهلة في ترتيبها في الفريزر.
مهم أوي تعرفي 10 أكلات ما كنتيش تعرفي إن ممكن حفظهم في الفريزر وكمان أطعمة ممنوع تخزينها في الفريزر.. خلي بالك
جهزي البروتين
- أساسي في أي وجبة صحية جزئية البروتين واللي هنقسمه لحوم حمراء وفراخ وأسماك، كل واحدة فيهم ليها طريقة، وكل بيت له الإستايل الخاص بيه في الأكل، بس في المجمل واللي نقدر نعتبره معدل عام للصرف الأسبوعي على البروتين هو كيلو لحمة، فرختين، 2كيلو سمك، نص كيلو كبدة سواء متقطعة بانيه أو متقطعة إسكندراني، ونص كيلو بانيه، ونص لحمة مفرومة.
- طبعا التصنيف ده مش قانون، تقدري تستبدلي حاجات بحاجات بس كلها هتكون في إطار ميزانية الأسبوع، يعني مرة سجق مرة همبورجر مرة شيش طاووق، كدة يعني.
- اللحوم الحمراء طالما إنتي مش مخططة ليها أي خطة غير السلق جنب طبيخ الخضار فكل اللي هتعمليه تقسميه في أكياس التلاجة بعدد مرات أكلك، الكيلو ممكن بتقسم لأربع وجبات أو تلاتة لو عدد أفراد الأسرة أكبر. لو عايزة بوفتيك أو كبدة بانيه فتتبيلك ليهم وحفظهم في الفريزر هيكون قطع عنك شوط عظيم، اللحمة المفرومة تقدري تعمليها كفتة حاتي أو كفتة داود باشا، أو تعصجيها كلها وتقسميها لوجبات زي صنية رقاق أو مسقعة أو مكرونة بالبشاميل.
هنا دليلك لعمل أشهر تتبيلات اللحوم والفراخ والأسماك
- الفراخ سواء لو جبتيها كاملة أو متقطعة، يعني بتشتري أوراك فقط أو صدور فقط لازم تتشال في الفريزر متنضفة يعني جاهزة على السلق، او لو هتعمليها صنية أو تشويها لازم تشيليها في تتبيلتها، هتلاقي طعمها تحفة في اليوم اللي هتطلعيها تعمليها.
- الأسماك نفس الفكرة، أولا متقعديش السمك المتنضف كتير في الفريزر الأفضل يتاكل خلال أسبوع من شرأه علشان يفضل على طعمه الطازة، على المستوى الشخصي بفضل أتبله بسرعة بالتوم والليمون والكمون نص ساعة قبل ما أسويه، علشان مش بحب أتبله وأطلعه يفك وهو متبل بحس إن طعمه مش حلو.
- علشان تعملي أسرع غدا بعد الشغل ،تقدري تقولي إن أكتر جزء بياخد وقت في التحضير هو البروتين سواء في تجهيزه أو تسويته، علشان كدة هتلاقي نفسك في اليوم اللي بتجهزي فيه الفريزر بتاعك إن الجزئية دي هي اللي هتاخد وقت، بس حقيقي هتفرق معاكي بشكل غير عادي.
- حاجة أخيرة علشان تحضري أسرع غدا بعد الشغل ،إنتي تقدري تسلقي اللحمة الحمراء وتقسميها في شوربتها في الفريزر، المميز في اللحمة إن طعمها مش بيتغير لو إتشالت مسلوقة في شوربتها في الفريزر، لكن بلا أبدا الفراخ تسلقيها وتحطيها في الفريزر، لم تيجي تفكي تجميدها هتلاقي طعمها إتغير، الفراخ المجمدة بعد ما تفكي تجميدها مش بتاخد وقت في تسويتها غير بالضبط 45 دقيقة، فالأفضل تسويها يومها لما ترجعي من شغلك.
جهزي الصلصة
- متخيلة حلة خضار مستوية في نص ساعة، كيف هذا؟ ده بينقسم لشقين، شق الخضار نفسه، وشق الصلصة، خلينا نتكلم الأول عن موضوع الصلصة، ده ممكن يتعمل على طريقتين، الطريقة الأولى إنك تجيبي مثلا تلاتة كيلو طماطم وتضربيهم في الخلاط وتسبكيهم ولما تبرد تقسميها أكياس في الفريزر، أوعي تشليها في الفريزر من غير ما تكون مستوية لأنها بكل بساطة هتحمض.
هنا طريقة عمل أشهر صوصات المطاعم .. أجمد 10 فيهم
- الطريقة التانية إن تعملي نوعين صلصة، نوع متسبك مع البصل، ونوع متسبك مع التوم، انا بصراحة بفضل الطريقة التانية، بس بعمل حاجة زيادة، بشوح كمية بصل حلوة كدة في الزبدة والزيت مع توابل السبع بهارات، ولما تصفر بقفل عليها وبقسمها في الأكياس في الفريزر، أما بالنسبة للتوم لو أنا مش مخزناه مهروس في الفريزر، فتقشير كام فص توم مش بياخد وقت وبيتحمر بسرعة مش بياخد وقت زي البصل.
ظبطي الخضار
من ألطف الحاجات اللي منتشرة في كل منطقة دلوقتي فكرة الخضار المتقطع ومتجهز، إختصار الحياة كلها في الموضوع ده، ممكن يكون أغلى شوية لكن حقيقي في الإنجاز، بس نصيحتي ليكي لو تقدري تجيبيه طازة بشكل يومي هيكون أفضل كتير، لو مش بتفضلي كدة هاتيه كل تلات أيام وشليه في التلاجة عادي، وأستخدميه مباشرة لما تطلعي الصلصة.
جهزي الصواني
لو إنتي عاملة في قائمة وجبة الغدا خلال الأسبوع صواني زي مثلا مكرونة بالبشاميل، هيكون سهل إنك تجهزيها وتحفظيها في الفريزر بحيث تطلعيها على الفرن على طول، مش بنصح بتجهيز صواني الخضار وحفظها قبل تسويتها، لو حابة تعملي كدة يبقى الأفضل إنها تستوي الأول وتتشال في الفريزر بعد ما تبرد.
حبي الفرن
تقريبا مافيش صنية بتطلع من الفرن مالهاش إحترام، أي حاجة في صنية في الفرن بتدي إنطباع بالفخامة، مش عارفة ليه بس ده اللي بيحصل، علشان كدة تقدري تعملي كل أصناف الخضار في الفرن إلا الملوخية طبعا، ومع وش متحمر كمان، يبقى إنتي جميلك فوق راس اللي قاعدين.
لو بتحبي وصفات الفراخ أسهل فطار: 5 وصفات بسيطة لعمل الفراخ في الفرن
هاتي أكل متجهز
- بقولك أهو أكل متجهز مش جاهز، الفرق بينهم إن المتجهز ده متضبط على التسوية، يعني ني، محتاج منك إنك تسويه، أوقات من حقك تدي لنفسك أيام تكون عناصر الأكل فيها متضبطة من حد غيرك، تقدري تعتمدي على النقطة دي لو إمكانياتك المادية تسمح، كدة كل اللي هتعمليه إنك تعملي الأوردر وتحطيه في الفريزر وتطلعي منك أكل كل يوم، أما لو الرفاهية دي مش متاحة يبقى مش مشكلة لو عملتيها لنفسك مرة كل أسبوع أو أسبوعين.
- يعني دلوقتي إنتي بكل بساطة عليكي تعملي حاجتين، قبل ما تنزلي من البيت طلعي البروتين المختار من الفريزر، هترجعي تلاقيه فك من تجميده، في الصيف حطيه في التلاجة قبل ما تنامي، في الشتاء عادي حطيه على رخامة المطبخ.
- هتوصلي بيتك تحطي اللحمة المسلوقة في حلة تفك، أو الفرخة تتسلق، أو لو مجهزة حاجة للتحمير، وفي نفس الوقت خضارك بصلصتك ببصلك بيتعرفوا على بعض بشكل سريع، حلة الرز أو المكرونة في السريع وطبق السلطة الجميل، كدة أطول وجبة غدا هتاخد منك 75 دقيقة، يعني ساعة وربع، ده لما تبقى إتأخرتي.
بالنصايح دي تقدري تعتبري وجبة الغدا موضوع مقفول، حاجة كدة زي case closed مش هنتكلم فيها تاني، أما فيما يخص وجبة العشاء، فنقدر نتعامل معاها إنها رفاهية غير مخصصة إلا للأطفال، علشان كفاية واقفة في المطبخ بصراحة، وفي الأخر النصايح دي تنفع حتى الأم اللي مش بتشتغل، مش معنى إنها مش بتمارس وظيفة منتظمة إن هي عندها وقت فراغ بالعكس هي كمان عندها مشغوليات.
التعليق باستخدام حساب فيس بوك