نصائح للتخلص من انتفاخ تحت العين

من مشاهد الرعب الصباحية لنا – غير طبعًا شعرنا المنكوش – إننا نصحى نلاقي عينينا منفوخة. اللي هو يا صباح البالونات اللي هتقفل عينينا والله! يعني الواحد نايم عادي مافيش حاجة، ليه يصحى من النوم يلاقي دول قاعدين على وشه؟ بس الحقيقة إن انتفاخ تحت العين له أسباب عديدة منها الطبي ومنها الوراثي ومنها أسلوب الحياة ومنها عوامل الزمن. السبب الطبي هيتطلب منك تزوري طبيبك علشان يتعرف إيه سبب ظهور الانتفاخ ده. أما السبب الوراثي ناس كتير بتلجأ للاختيار الجراحي للتخلص منه لأن الانتفاخ ده بيكون بسبب وجود دهون تحت الطبقة الرقيقة من الجلد اللي تحت عينينا. أما اللي بيكون سببها أسلوب الحياة أو عوامل الزمن من تقدم للعمر، هنتكلم مع بعض إيه الخطوات اللي ممكن ناخدها وهيكون من أثارها التخلص من الانتفاخ ده.

طرق التخلص من انتفاخ العين

1. كمادات المياه الباردة
2. فيتامين هـ (E)
3. زيت جوز الهند
4. تقليل الملح وزيادة شرب المياه
5. النوم المنتظم

• كمادات المياه الباردة

من الحاجات اللي ناس كتير لما استخدمتها كانت نتيجتها حلوة جدًا. وطريقتها سهلة: هاتي القطن المدور المخصص لإزالة مكياج العين وحطيه في برطمان وحطي عليه مياه واحفظيه في التلاجة. وكل يوم، حطي دايرة على كل عين مرة الصبح ومرة بالليل لمدة عشر دقايق. هتلاقي الانتفاخ بيقل. وممكن تستخدمي معلقة ساقعة أو أكياس الشاي الباردة أو حتى دواير خيار ساقعة برضه أو طماطم أو ليمون أو البطاطس. احنا مش هنعمل سلطة على وشنا، بس احنا في حرب ضد البالونات ولازم ننتصر!

• فيتامين هـ (E)

فيتامين هـ من الفيتامينات اللي معروف قدرتها العالية على مقاومة الجذور الحرة اللي بتكون سبب رئيسي في ظهور الشيخوخة علينا، وقدرته على نقل الأكسوجين في الدم. أفضل طريقة لاستخدامه إنك تدلكي الزيت ده على بشرتك وتحت عينك مخصوص قبل النوم علشان تحصلي على أفضل نتيجة. ما تستخدميش الزيت ده أبدًا وتتعرضي للشمس لأنه هيأثر على لون بشرتك جدًا.

• زيت جوز الهند

من الزيوت اللي معروف قدرتها على مقاومة الالتهابات والترطيب في نفس الوقت. هتستخدميه بنفس طريقة استخدام فيتامين هـ. بالليل قبل النوم؛ هو مش بس بيقاوم انتفاخ العين لكن كمان بيخلصك من الهالات السوداء.

اعرفي هنا باقي فوائد زيت جوز الهند

• خففي الملح واشربي مياه كتير

من الأخطاء اللي بنعملها كتير هو زيادة استخدام الملح سواء في أكلنا العادي أو السناكس أو المخللات. وفي نفس الوقت، مش بنشرب مياه كفاية. علشان كده، مهم تقللي الملح في أكلك وتبدلي ملح الطعام العادي بملح بحري وملح الهملايا الوردي الصخري، واللي أصبحوا متوفرين بسهولة في الأسواق. زودي شرب المياه طول اليوم علشان جسمك مش بيعرف يتخلص من الأملاح إلا عن طريق المياه.

• نامي كويس

من الأمور الأساسية للإصابة بانتفاخ العين ومعاها صاحبتها الهالات السوداء هو نظام النوم السيء. بمعنى إنه يكون قليل ومش في ساعات الليل. تقدري تعتبري إن ده مصدر أساسي ليهم وإن مهما كانت محاولاتك للتخلص منهم من غير نوم كويس مش هتنجح أبدًا.

خدي الخطوات البسيطة دي كأساس ليكي يوميًا. نامي من غير ما تزعلي ولا تعيطي علشان كلنا عارفين إن العياط اللي محدش سمعه بالليل بيبان في انتفاخ عينينا الصبح. اهتمي بنفسك وزي ما بنقول لك دايمًا انتي أهم عنصر في معادلة حياتك وبيتك.

المصادر
www.hopkinsmedicine.org
www.healthline.com
www.foreo.com
www.mayoclinic.org