التعرق ظاهرة صحية طبيعية وعلامة صحية في نفس الوقت. وبتحصل طول ما انتي بتمارسي نشاط جسدي أو حتى قاعدة في جو درجة حرارته عالية. ودي طريقة الجسم في تعديل درجة حرارته. المشكلة دايمًا بتكون في رائحة العرق نفسها اللي ممكن تسبب إحراج كبير جدًا.
في الحقيقة، العرق نفسه مالوش ريحة. الريحة دايمًا بتيجي بسبب البكتيريا اللي عايشة على الجلد وبتتفاعل مع العرق وبتصدر الرائحة المزعجة دي. علشان كده، وعلشان تحلّي المشكلة دي من جذورها، لازم تتعاملي مع السبب الرئيسي فيها واللي هو البكتيريا. هنقول لك دلوقتي شوية نصائح هتساعدك في التخلص منها.
نصائح للتخلص من رائحة العرق
- استحمي بصابون مضاد للبكتيريا:
الاستحمام هو أول خط دفاع ليكي ضد البكتيريا وخصوصًا لو بانتظام باستخدام صابون مضاد للبكتيريا. احرصي دايمًا على استخدامه على الأماكن الأكثر عرضة للعرق زي تحت الإبطين والقدم وتحت خط الصدر وبين الأفخاد. وجففي كويس بعد الانتهاء من الاستحمام لمنع وجود بيئة رطبة تحفز البكتيريا تاني.
- استخدمي مضادات التعرق أو مانع التعرق:
الهدف الأساسي لأي من المنتجين دول سواء مضاد التعرق أو مانع للتعرق هو منع ظهور الرائحة اللي بتسببها البكتيريا. علشان كده، بينصح دايمًا باستخدامه قبل النوم وعند الاستيقاظ وبعد الاستحمام.
- انتبهي لنظامك الغذائي:
من الحاجات اللي محتاجة تعرفيها إن فيه بعض أنواع من الأغذية بتسبب ظهور رائحة كريهة للجسم. زي الأكل اللي فيه توم وبصل كتير، المشروبات اللي مليانة كافيين اللي ممكن تسبب زيادة في العرق، وبالتالي احتمالية أعلى لظهور رائحة عرق. عمومًا، لازم تنتبهي لنظامك الغذائي، والحرص على أكل الفواكه والخضراوات بشكل أكبر. وده لا يعني إنك تستغني عن البصل والتوم، إنما معناه إنك تتناوليهم بشكل معتدل.
- البسي ملابس ذات نسيج طبيعي:
بمعنى إنك تلبسي ملابس قطنية أو من الكتان أو من الحرير أو الصوف. المنسوجات دي بتتميز إن لها قدرة على ترك الفرصة لجلدك إنه يتنفس، على عكس الأنسجة ذات الألياف الصناعية. احرصي في التمارين على ارتداء الملابس المخصصة للرياضة، لإنها قادرة على امتصاص العرق والحفاظ عليه بعيد عن بشرتك. وما تنسيش تغيري دايمًا شراباتك لشرابات قطنية مريحة. كل ده بيساعد على منع نشاط البكتيريا على الجلد.
- اغسلي هدومك بانتظام:
من الحاجات اللي أكيد كلنا عارفينها إن لو فيه ملابس فيها رائحة عرق، عمرها ما هتطلع من غير ما تتغسل بشكل صحيح، علشان تقدري تتخلصي من رائحة البكتيريا. ما تلبسيش أبدًا أي ملابس متسخة حتى لو من وجهة نظرك رائحة العرق فيها مش باينة.
عمومًا الحفاظ على رائحة جسم جميلة والبعد عن رائحة العرق مفتاحها هو النظافة المستمرة واستخدام صابون مضاد للبكتيريا باستمرار طول اليوم، والغسيل المستمر للأيدي. ولو حسيتي إنك بتعملي كل ده والمشكلة لسه موجودة، يبقى تروحي تستشيري طبيبك فورًا.
لو بتشتكي من رائحة الفم الكريهة، اعرفي هنا وصفات للتخلص منها.
التعليق باستخدام حساب فيس بوك