محتويات المقال
في الفترة الأولى بعد الولادة، من أكتر الحاجات اللي بتقلق الأم وبتوترها هي نوم الرضيع. وازاي تنيمه؟ ونومه كفاية ولا لأ؟ وامتى هي تنام؟ وكل الأسئلة اللي بتشغل بال الأم الجديدة. عشان كده في المقال ده، هنقول لك 10 نصايح عشان تقدري تنيمي طفلك نوم كافي وآمن، في أول سنة من عمره.
1. استخدمي سرير ثابت
السرير اللي بيتهز أو الطري أو المراتب الناعمة والكنب مش مناسبة لنوم الرضيع. وما تحطيش مخدات أو الدباديب (stuffed animals) في السرير لإنها ممكن تغطي وشه أثناء النوم وممكن لا قدر الله تتسبب في خنق الرضيع.
2. حافظي على بساطة السرير
ما تحطيش ألحفة تحت جسم الرضيع في السرير. وراعي إن حجم السرير ما يبقاش واسع قوي على الطفل قوي عشان ما يقعش من الجوانب أو يتزحلق تحت الغطا. واتأكدي إن السرير دايمًا نضيف وما فيهوش تراب.
3. خلي راسه مكشوفة
أي غطا هتستخدميه، يكون آخره من فوق صدر الطفل، ودراعاته تكون برا الغطا (مكشوفة) عشان ما يتحكمش إنه يطلع الغطا لراسه. كل ده عشان نتجنب الاختناق لا قدر الله.
4. بلاش تسخنيه
مهم إن الطفل يكون متدفي، لكن زيادة طبقات الهدوم أو استخدام أغطية كتير بيحسس الأطفال بالحر الشديد وبكده مش هيقدر ينام كويس، وجسمه هيسخن ويعرق.
5. بيئة النوم
عشان الأوضة تكون بيئة مناسبة لنوم الرضيع لازم تكون درجة الحرارة 20 مئوية.
6. التيتينة
الأكاديمية الأمريكية لطب الأطفال بتقول إن اللهاية (التيتينة) ممكن تساعد في النوم الآمن للأطفال وكمان تمنع من متلازمة موت الرضع المفاجئ.
7. استخدمي التكنولوجيا
لو قلقانة على نوم رضيعك، خصوصًا لو في أوضة لوحده، استخدمي أجهزة مراقبة لا سلكية أو أجهزة إنذار صغيرة لمراقبة نوم الطفل.
8. ما تصدقيش كل الدعاية
فيه منتجات كتير بتسوّق لنفسها إنها بتمنع أو بتقلل متلازمة موت الرضيع المفاجئ، بس لحد دلوقتي لم يثبت فعالية أي منتج في القضاء على المتلازمة دي.
9. شاركيه أوضته
سواء هو اللي هيكون سريره في أوضتك، أو انتي هتنامي في أوضته، مشاركته الأوضة عشان الرضاعة الطبيعية والاطمئنان وإحساسه هو نفسه بالأمان أمر لطيف.
10. ما تشاركيهوش في سريره
ولا هو ينام في سريرك ولا انتي تنامي في سريره، لإن ده هيسبب مشاكل منها الاختناق لا قدر الله.
المصدر
أنا حامل
1 comment
ماهو افضل وضع للنوم للطفل الرضيع و متى يمكن ان ينام الرضيع على مخده؟