الغازات في الحمل من أكتر الحاجات المحرجة اللي بتتعرض ليها كل واحدة حامل خاصة لو إتعرضتي للموقف ده قدام الناس أو في الشغل، والسبب في زيادة الغازات وقت الحمل هو هرمون البروجسترون اللي بيفرزه الجسم في بداية الحمل بكمية كبيرة والهرمون ده بيسبب إرخاء في العضلات اللينة في الجسم والأنسجة ولما بيحصل الإرخاء ده، عملية الهضم بتبطأ فبتحس الحامل بعد الأكل بالضيق والإنتفاخ وبتعاني من الغازات.
وفي سبب تاني لبطء الهضم في وقت الحمل وهو إن الرحم حجمه بيكبر في الشهور الأخيرة فبيضغط على المعدة وبيؤثر على عملية الهضم.. ولما الجهاز الهضمي ميشتغلش بكفاءة، فرصة البكتيريا الموجودة في القولون بتكون أكبر في تحليل الأكل اللي مش مهضوم فبيسبب الغازات.
مشكلة الغازات في الحمل ممكن نحاول نقلل منها بشوية خطوات بسيطة
- المشي لمدة ربع ساعة كل يوم بيحسن من أداء الجهاز الهضمي وبالتالي هيقلل من كمية الغازات، بس يفضل إنك تستشيري دكتور النسا الخاص بيكي.
- حاولي تتجنبي أكل اللبان لأنه بيخليكي تبلعي الهوا وبيزود من الغازات.
- متناميش أو تاخدي وضع أشبه بوضع النوم وإنتي بتاكلي واقعدي معتدلة حتى لو هتاكلي الفواكه بين الوجبات.
- اشربي الميه وأي مشروبات تانية بين الوجبات مش وسط الأكل.
- حاولي تقللي أو تبطلي شرب المشروبات اللي فيها صودا.
- امضغي الأكل كويس جدًا.
- اشربي ببطء ويفضل إنك متشربيش من الإزازة مباشرة وتشربي في كوباية أفضل، حتى الشاليموه حاولي تتجنبيه لأنه بيدخل كمية من الهوا للفم.
- متلبسيش أي حاجة تكون ضاغطة على بطنك.
- قسمي الأكل بتاعك على عدد أكبر من الوجبات.
- مارسي تمارين الإسترخاء والتنفس عشان تساعدك على التنفس بشكل صحي وسليم حتى في أوقات القلق.
التعليق باستخدام حساب فيس بوك