محتويات المقال
بتخيل لو الـDiaper بيتكلم كان هيقول محدش هيقدر يفرقنا عن بعض أبدًا واللي هيرد عليه هيبقى التسريب.. ياااااا عمممري D: ما هو مفيش علاقة وثيقة ولا أبدية إلى الما لانهاية وما بعدها زي علاقة الـDiaper والتسريب، كام أم فينا صحيت الفجر على صويت وعويل ومراتب حزنانة وغرقانة بسببهم، ولا كام فانلة وغيارات اتغسلت ومنشفتش عال حبل بسببهم.. إنه الدايبر اللعين عزيزاتي المنهارين وهقولك على كام طريقة تنقذي بيها اللي إتبقى من قواكي العقلية والصحية ومتخليش الدايبر باااااظظ خااااالص.
أسباب تسريب الحفاضة
معظم الوقت بيحصل التسريب بسبب إن مقاس الحفاضة مش مناسب أو مش مقفول بشكل كويس أو مش مغطي جسمه بشكل كويس فلو متأكدة من الحاجات دي ولسه بتلاقي تسريب ممكن تلجأي للحيل دي:
هاتي حجم أكبر
المفروض إن الدايبر ميتلبسش أكتر من أربع ساعات بس وقت الليل وخصوصًا في الشتا، الجو بيبقى برد إننا نقلعهم كل لبسهم في الشتا عشان نغيرلهم فممكن تشتري مقاس أكبر من المقاس اللي بنتك أو ابنك بيلبسوه وتخليه لوقت الليل مخصوص؛ بس خلي بالك ساعات المقاس الكبير ممكن يسرب أكتر فهاتي درجة واحدة بس أكبر من اللي بتستخدميه حاليًا.
متقفليش الكباسين
لما الحفاض بيتملي وبالذات وقت النوم بليل، كباسين السالوبيت بتضغط على البامبرز المليان وتخليه يسرب. عشان كده بلاش تقفلي الكباسين بليل ولو خايفة إن بنتك أو ابنك يبردوا، ممكن تشتري بانتي قطن أو مشمع وتلبسيه فوق البامبرز بدل الكباسين.
لبسيه بطريقة مضبوطة
لو إنتي أم جديدة ممكن تتفرجي على فيديوهات على اليوتيوب عشان تعرفي الطريقة الصح عشان تلبسي الدايبر، والطريقة الصح هي:
- افتحي الدايبر وافرديه كويس قبل ما تحطيه تحت جسم البيبي.
- قبل ما تقفليه اتأكدي إنه مغطي جسمه كويس.
- لو عندك بيبي ولد اتأكدي إن العضو الذكري موجه لتحت.
- ممكن تزدوي فوق الدايبر بانتي مشمع عشان لو حصل تسريب يمتصه وميحصلش بلل لجسم البيبي.
ودي كانت شوية نصايح بتمنى إنها تفيدك في المرحلة العويصة دي ولو منفعتش ولسه بيسرب يبقى ربنا معاك ربنا معاك يا صلاح D:
التعليق باستخدام حساب فيس بوك