محتويات المقال
عزومة رمضان من أحلى الحاجات في رمضان .. لمة العيلة والأهل والصحاب على سفرة الفطار المليانة بما لذ وطاب من المقبلات والحوادق والحلويات. بتبقى مستنية عزومة مامتك أول يوم وأحلى مكرونة بالبشاميل تاكليها من إيديها وعزومة حماتك تاني يوم وأحلى صينية كنافة بالمكسرات ممكن تحلي بيها، لحد ما ييجي الدور عليكي وتكوني انتي صاحبة العزومة ساعتها بتتوتري وتفضلي تفكري في العزومة ليل نهار.
العزومات فعلًا بتوتر وبتحتاج ترتيبات كتير وتنظيم للوقت وخصوصًا في رمضان مع الصيام واحنا النهارده هنحاول نساعدك بمجموعة نصايح مهمة، مش بس لنجاح عزومتك لكن كمان عشان انتي ما تكونيش متوترة وقلقانة وتكوني مسيطرة على الوضع بشكل كامل وتقدري تستمتعي باللمة الحلوة مع أصحابك وقرايبك وبالأجواء الرمضانية الجميلة.
1. حددي ميزانية للعزومة
للأمهات نصائح لتدبير ميزانية رمضان قبله بشهور
مش لازم العزومة تتكلف مبالغ كبيرة عشان تكون عزومة ناجحة، عشان كده لازم تحددي ميزانية للعزومة عشان الأمور ما توسعش منك وتبوظ لك ميزانية البيت الشهرية. على أساس الميزانية دي حددي الأصناف إللي هتحطيها في المنيو. وفيه طرق كتير تقدري بيها توفري، منها مثلًا إنك تعملي طبق رئيسي واحد ويكون بروتين صريح يعني مثلًا فراخ مشوية، فخدة ضاني، بط روستو، وتعملي طبق رئيسي تاني تدخلّي فيه اللحوم بطريقة أوفر شوية زي مثلًا اللحمة المفرومة أو صدور الفراخ، وهنا الفتّات بتكون واحدة من الأطباق المحبوبة جدًا ولكنها موفرة زي مثلًا فتة الفراخ أو فتة الشاورما باللحم. كل ما تكون اللحوم والفراخ مقطعة أصغر ومضاف ليها عناصر تانية ده هيقلل الكمية وبالتالي التكلفة وكمان.
2. جهزي منيو العزومة
من أهم خطوات التجهيز هو إنك تفكري كويس قوي في المنيو بتاع أصناف عزومة رمضان بكل تفاصيله. حاولي تكتبي كل حاجة بالورقة والقلم عشان ده هيسهل عليكي عمل قائمة مشتروات لكل المكونات إللي هتحتاجيها. ودي أهم النصايح لمنيو عزومة ناجح:
- عشان تكوني منيو ناجح لعزومة لازم تاخدي في اعتبارك الناس المعزومين، وإيه الأكلات إللي بيحبوها وتستبعدي أي صنف ممكن يكونوا مش بيحبوه أو تزودي معاه أصناف تانية عشان تلبي كل أذواق المعزومين.
- حاولي إن المنيو بتاعتك تكون متنوعة وفيها كل العناصر الغذائية، بمعنى لازم يكون عندك أطباق من اللحوم والخضار والنشويات وكمان ما تنسيش الشوربة والسلطات والمقبلات. التلاتة دول من أصناف عزومات رمضان المميزة جدًا.
- اوعي تعملي في العزومة وصفة تكوني أول مرة تجربيها، حاولي دايمًا تختاري الوصفات إللي انتي متمكنة منها ولو حبيتي تعملي وصفة مبتكرة يفضل إنها تكون أطباق جانبية مش رئيسية وبرضه يفضل إنك تكوني مجربة الوصفة.
- حاولي إن يكون عندك صنف واحد حلو سهل وبسيط تكوني عاملاه بإيدك، ما تكتريش من أصناف الحلو لإن أغلب المعزومين بيقدموا لك أصناف حلويات جاهزة وهم جايين العزومة. وكمان ما تنسيش العصاير الرمضانية إللي كل الناس بتحبها تقدري تجهزي صنف واحد بس من العصاير في البيت وتستعيني بالعصاير الجاهزة عشان تسهلي على نفسك المهمة.
3. جهزي قائمة مشترواتك وجهزي كل المكونات
اكتبي كل مكونات العزومة بدقة وحاولي إنك تشتري كل مكوناتك قبل العزومة بفترة كويسة عشان ما تكونيش قلقانة. حاولي كمان قبل العزومة إنك تروقي تلاجتك وتوفّري فيها أماكن للمكونات إللي هتشتريها وكمان للأصناف إللي هتجهزيها قبل العزومة. كمان من أهم العوامل إللي لازم تراعيها هي الكميات، يعني بلاش تعملي كمية أكل كبيرة وأصناف كتير زيادة عن اللازم عشان ما تهدريش مكونات ويتبقى عندك كمية كبيرة من الأكل. حاولي دايمًا الكمية وعدد الأصناف تكون مناسبة لعدد المعزومين.
4. التجهيزات المسبقة
لما بتجهزي لـ عزومة رمضان قبلها بيوم أو اتنين ده بيريحك جدًا يوم العزومة نفسه وبيقلل من التوتر ومن وقفتك في المطبخ وبيديكي فرصة إنك تخلصي بدري وتقدري تلبسي وتكوني مرتاحة ومستعدة إنك تقابلي ضيوفك وتجهزي بيتك بالصورة إللي تحبيها كمان. من أهم التجهيزات المسبقة إللي تقدري تعمليها:
- اغسلي وقطعي أي خضراوات هتحتاجيها وشيليها في أكياس أو علب محكمة الغلق.
- حضري العصاير وشيليها في التلاجة تكون جاهزة للتقديم.
- فيه أكلات كتير تقدري تجهزيها كلها ويكون بس فاضل التسوية زي أكلات البشاميل والمحاشي بمختلف أنواعها وكمان المقبلات زي السميوسك والكبيبة مثلًا تقدري تحضريهم ويكونوا جاهزين للقلي.
- الحلو كمان تقدري تجهزي مكوناته زي مثلًا تجهيز الشربات أو الكريمات أو تحميص المكسرات وبعض أنواع الحلويات الباردة زي التشيز كيك مثلًا تقدري تجهزيها كلها قبل بيوم.
- حضري سفرتك وكمان زيني بيتك بزينة رمضانية بسيطة ورتبي بيتك بالطريقة إللي تحبيها. اعملي كل ده يوم العزومة الصبح عشان تشيلي من عليكي المهمة دي وتعرفي تركزي في باقي تفاصيل الطبخ.
بالفيديو: تتبيلات الفراخ لوجبات الإسبوع
5. تنظيم وترتيب مكان الأكل
من الأمور الناجحة جدًا في عزومة رمضان إنك تعملي بوفيهات صغيرة زي إنك تخصصي مكان للعصاير والخشاف والحلويات والتمر وتخصصي مكان تاني للسلطات والمقبلات. بكده توفري مكان أكبر لباقي الأصناف على سفرتك وما تكونش زحمة. لو العزومة هيكون فيها عدد كبير من الأطفال، تقدري تخصصي لهم مكان منفصل ليهم وقت الأكل عشان الكبار يكونوا مرتاحين والأطفال كمان يكونوا مستمتعين. تقدري تفريشي لهم ترابيزة ارتفاعها مناسب ليهم وتحطي لهم كراسي صغيرة أو حتى شلت على الأرض عشان يكونوا مرتاحين أكتر وكل الأدوات والأطباق بتاعتهم تكون من الأنواع إللي بتستخدم مرة واحدة عشان تقللي أي خساير ممكن تحصل وممكن كمان تحضري صنف أو اتنين مناسبين ومحبوبين من الأطفال زي الفراخ البانيه وكرات اللحمة والبطاطس المحمرة. صدقيني الأطفال هيتبسطوا جدًا وهيحسوا إنهم مميزين وكمان الكبار هيشكروكي.
6. اطلبي المساعدة
لو فيه أصناف صعبة ما بتعرفيش تعمليها زي المحاشي مثلًا، تقدري تستعيني بحد يعملها لك أو تجيبيها جاهزة أو مجمدة وانتي تسويها أو حتى تطلبي من حد قريب منك في العيلة يساعدك ويعملها لك.
من أكتر الأسباب إللي بتتعبنا وتوترنا من العزومات هي تنضيف البيت وغسيل الأطباق بعد العزومة. عشان كده، لو مش هتقدري تقومي بالمهمة دي لوحدك، تقدري تستعيني بحد ييجي يساعدك وممكن تخلّي المقربين ليكي في عيلتك يساعدوكي وتفضلوا تتكلموا وتحكوا وانتوا بتغسلوا الأطباق. بجد بتبقى ذكريات جميلة وبتهوّن عليكي التعب.
7. كوني بشوشة ومضيافة
أهم حاجة في أي عزومة، يمكن أهم من الأكل والشرب ومن كل حاجة، إنك تقابلي ضيوفك وانتي مبتسمة وبشوشة ولازم تكوني مضيافة وترحبي بالضيوف وكل ده يتوقف على إنك تكوني مرتاحة ومسيطرة على الموقف وتكوني مخلصة كل حاجة في المطبخ على الأقل قبل المغرب بساعة.
كل سنة وانتي وعيلتك طيبين، وبنتمنى إن عزومتك تكون ناجحة وضيوفك يكونوا مرتاحين ومبسوطين، وصدقيني أحلى ما في العزومة اللمة والوقت إللي بتقضيه مع أهلك وأصحابك، وأحلى حاجة هي البساطة في كل حاجة. خليكي دايمًا بسيطة وما تكلفيش نفسك أكتر من إمكانياتك.
التعليق باستخدام حساب فيس بوك