في الوقت ده من السنة، بيبدأ موسم الحضانات لإننا بنكون مقربين من وقت التقديم للمدرسة. وبيبدأ الأهالي في تحضير ولادهم لإنترفيوهات القبول في المدرسة، ده غير إن أجازة الصيف بتكون بتخلص ومعظم الأمهات بتكون راجعة أشغالها بعد موسم الأجازات.
بس السنة دي، الوضع مختلف والخوف والتوتر أعلى بسبب وجود فيروس كورونا، اللي لسه ما نعرفش آخره امتى، وزي ما مرحلة دخول الحضانة وانفصالنا عن حبايبنا الصغيرين بتكون صعبة علينا، فهي بتكون كمان صعبة ومربكة وتغيير كبير بالنسبة لهم.
في مقال النهارده، هاقول لك علي أهم tips تعمليها لتحضير طفلك نفسيًا للحضانة ونخلّي أول فترة فيها أسهل عليهم وعلينا. وكمان أهم نصايح الخبراء للحفاظ على سلامته وصحته في ظل ظروف كورونا.
إزاي نحضر ولادنا نفسيًا لدخول الحضانة؟
- نبدأ بالروتين
لو ما كناش عاملين روتين في بيتنا للنوم ولليوم بتاعنا، نبدأ نعمله، عشان نهيأ الطفل نفسيًا لليوم المنظم ووقت اللعب ووقت الأكل ووقت القراية مثلًا، زي ما بيحصل في الحضانة.
- نقرا كتاب عن الحضانة / نحكي حواديت / نتفرج علي فيديو، عشان يقدروا يكوّنوا صورة عن شكل الحضانة والوقت اللي هيقضوه فيها، ونحكي لهم همّ رايحين يعملوا إيه هناك، وهيشوفوا إيه وهيلعبوا مع مين ويعملوا أصحاب جديدة.
- مثّلوا مع بعض في البيت إنه في الحضانة: اللعب بالتمثيل من أحلى الأدوات المفيدة في السن الصغير واللي بتقدر توصّل للأطفال حاجات كتير عايزين نشرحها لهم، ونفهم منهم كمان اللي بيدور في دماغهم وأفكارهم إتجاه الموقف.
- نروح الحضانة نتفرج عليها قبلها بفترة مع بعض، ولو متاح أول كام يوم نكون معاهم، ما نسيبهمش فجاة. ولو مش متاح، يبقى أول اسبوع نسيبهم وقت قليل ونزوده بالتدريج.
- مهم كمان إننا عمرنا ما نختفي من قصاد الولاد فجاة، أو نقول لهم حاجة وما تحصلش. لازم يكونوا واثقين فينا وفي كلامنا ونعرّفهم قبل ما نسيبهم هنرجع امتى بالظبط وهنطمن عليهم ازاي.
- ولو ممكن قبلها بفترة برده، نبدأ نسيبهم مع الجد أو الجدة أو حد محل ثقة وقت قصير، عشان يفهموا إننا لما بنبقى مش موجودين، بنرجع لهم عادي مش بنختفي.
- لو الطفل بيتكلم، نجاوب على كل أسئلته وأفكاره عن الحضانة بطريقة بسيطة ومحفزة، ونشجعه يتكلم ويعبر عن اللي حاسّه.
- ما نبينش إننا خايفين وقلقانين: طبيعي كأمهات أول كام يوم حضانة لولادنا دول بيبقوا وجع قلب، وبنبقى عايزين نعيط أكتر منهم وخايفين عليهم من الخطوة الجديدة دي. بس مهم إن الطفل ما يحسش بمشاعرنا، لأنها هتوصل له ويحس إن فيه حاجات غلط وتزوّد خوفه وتوتره من الانفصال عن مامته.
- Goodbye routine: من أحلى الحاجات اللي فادتني شخصيًا، مع ابني إني كنت بابوسه في كف إيده، واخليه يقفل إيده على البوسة، وباحضنه ونغني سوا أغنيه Barney اللي كلها حب دي، عشان يتطمن ويبقى انفصالنا الصبح هادي ومليان مشاعر، وهو بعدها لما كبر شوية، بقى يقول لي “لما بتوحشيني، بافتكر البوسة اللي معايا وبافرح”.
- ما ترجعيش تجري على طفلك لو سمعتيه بيعيط بعد ما مشيتي، لإن ده بيبعت له رسالة إنك لازم تكوني موجودة معاه طول الوقت هناك. ادي له فرصة يتعامل مع التغيير الكبير اللي في حياته.
ازاي نتطمن على ولادنا في الحضانة في ظروف الكورونا؟
- أهم حاجة هي اختيار الحضانة. في الأول، يفضل يكون فيها كاميرات، وتسألوا كويس على معايير السلامة فيها وازاي هيقدروا يحافظوا على مسافات آمنة بين الأطفال، وعدد الأطفال في المكان. وإذا هيستخدموا أدوات الأكل، تكون disposable. مستوى نضافة العاملين في الحضانة، واحتياطات الأمان والنضافة اللي بياخدوها، ولبسهم الماسك باستمرار.
- لو طفلك أكبر من سنة، فممكن تمرنيه في البيت الأول على عروسة أو دبدوب على طريقة غسيل الإيدين قبل وبعد، وازاي نحط إيدينا على بقنا لما نعطس، وازاي نقعد سايبين مسافة بيننا وبين غيرنا. هتحسّوا في الأول إنهم مش فاهمين، بس بالتمرين باللعب هيتعودوا وهيعملوها automatic بعد كده.
التعليق باستخدام حساب فيس بوك