تجربة الشغل بعد الولادة ممكن تكون مربكة ومرهقة جدا فى بدايتها وإحنا فى راحة بالي بندعم كل أم عاملة وبنقولك متخافيش إحنا دايما فى ضهرك وعشان كده حبينا نقولك على شوية نصايح ممكن تسهل عليكى التجربة دي.
ابنك هيروح حضانة و لا هيقعد مع حد؟
أول حاجة لازم تفكري فيها هتسيبى ابنك فين وإنتي فى شغلك، فيه بعض أماكن الشغل بتوفر حضانة فى نفس المبنى وده بيسهل كتير عليكى التفكير فى المكان بس لو مفيش حضانة فى نفس المبنى ممكن تسيبيه مع مامتك أو حماتك لو الظروف تسمح وممكن تجبيلهم مساعدة عشان تشيل معاهم البيبى.
إما لو هتودي حضانة لازم تعرفي مواعيد شغلك بتخلص امتى وتشوفي حضانة مناسبة للمواعيد دي وقبل ما تنزلي الشغل بمدة دورى على الحضانة المناسبة اللي تطمني إنك هتسيبى طفلك فيها وتقرري هل هتكون قريبة من الشغل ولا البيت.
الرضاعة الطبيعية أو اللبن الصناعي:
لو ابنك بيرضع طبيعي ومش متعود انه ياخد ببرونة لازم تبدأى تعوديه بفترة قبل رجوعك للشغل إنه يشرب منها وتبدأى تعملي شفط للبن وتخزني اللبن بالطريقة الصحيحة عشان تقدري تديله كمية كافية وإنتي فى الشغل.
وفى الشغل أكيد هتحتاجى تشفطي اللبن فهتدورى على مكان مناسب عشان تعملي كده لأن الحمام ممكن ميكونش أنسب بيئة انك تشفطي فيه وكمان هتدورى على المكان المناسب اللي هتخزني فيه اللبن عشان ميبوظش.
إما لو بترضعيه لبن صناعي لازم يبقى فى الشنطة أكتر من ببرونة والكمية الكافية من اللبن للرضعات وممكن تجيبي حافظة للمياه عشان تحتفظي بالميه الدافية اللي بتحتاجيها للبن الصناعي أكبر وقت ممكن وكمان تنسقي مع الحضانة عن طريقتك المعتادة فى تنظيف الببرونة للأطمئنان.
التنقل للحضانة وللشغل:
لو مش هتسيبى ابنك فى البيت وهتوديه حضانة، فكرتي هتروحوا مع بعض الشغل إزاى؟ لو هتروحي بعربية اختاري الكارسيت الآمن لطفلك وحطيه فى الوضعية الصحيحة وممنوع نهائى تاخديه فى الكرسي اللى جمبك لأنه خطر ولو المكان بعيد وممكن يعيط طول الطريق فكري فى حاجات تلهيه زي لعبة بيحبها أو finger food، لو مش معاكي عربية فكري إزاى هتتنقلي للشغل والحضانة بالبيبى لو الشغل مش موفر وسيلة تنقل.. دلوقتي بقا فيه تطبيقات كتير زي أوبر وكريم وسويفل وباصيت بتعمل رحلات شهرية وعروض على الرحلات تسهل عليكى المواصلات وممكن تكون مناسبة لميزانيتك وأهم حاجة بالنسبة للبيبى فكري هتقعديه فى الكارسيت إزاي وهتسهلي عليه الرحلة إزاي.
قائمة مشتريات ليكي وللبيبي:
فيه حاجات كتير هتحتاجي تجبيها زي شفاط ثدي سهل إنك تاخديه الشغل ويكون حجمه مش كبير.
شنطة كبيرة تكفي هدوم البيبى وببروناته أو رضعاته والبامبرز وكل احتياجاته.
كارسيت آمن وسهل عليكى تشيليه.
طبعاً جسمنا بيختلف كتير بعد الولادة ف ممكن تحتاجي تجيبى لبس فورمال جديد زي مثلا جزمة مريحة ومش متعبة ليكي وإنتي شايلة الشنط والبيبى فى الكارسيت.
لو بترضعي متنسيش تجيبي Breast Pads.
تحضيرات البيت:
طبعا بعد ما بترجعي من الشغل ممكن تكوني مش قادرة تطبخي، حاولي تكوني محضرة وجبات سهلة الطبخ وتشيليها فى الفريزر ولو طفلك إبتدى مرحلة الأكل ممكن تعملي وجبات و تشيليها في الفريزر فى علب صحية وبطريقة مضبوطة و ممكن تستعينى بحد يساعدك في تحضير وجباتك إسبوعياً.
دي شوية أفكار بسيطة ممكن تسهل عليكى تجربتك الجديدة بعد الرجوع للشغل وعايزينك دايماً تفتكري إنك قوية وتقدري توفقي بين شغلك وبيتك..
إيه هي النصايح بتاعتك اللي بتنصحي بيها أمهات راحة بالي عشان تسهل عليهم شغلهم بعد الولادة؟
التعليق باستخدام حساب فيس بوك