الفترة الأولى بعد الولادة، بتكون تحدي كبير على الأم الجديدة، سواء ده كان الطفل الأول أو لا. من أول التفاصيل الصغيرة لحد أكبر القرارات. علشان كده هنقول لك على 15 نصيحة للأم الجديدة اللي هتخليكي تعدي بالفترة دي بسلام.
15 نصيحة للأم الجديدة في أول 30 يوم بعد الولادة
- اطلبي المساعدة
- هذا الوقت سيمضي
- استمتعي
- ادخلي مجموعات الدعم
- سلّي نفسك
- اهتمي بنفسك
- اكتبي مذكراتك
- غيري جو
- ثقفي نفسك
- البسي حلو
- قصي شعرك
- خططي للمستقبل
- اعرفي ميزانيتك
- علّمي جوزك
- عيشي أمومتك
الأمراض النفسية بعد الولادة .. 3 أمراض شائعة أشهرهم “الاكتئاب”
-
اطلبي المساعدة
طلب المساعدة هو كلمة السر لفترة آمنة ما بعد الولادة، لإنك لسه أم جديدة، واتضافت عليكي مسؤوليات كتير، بالإضافة للمسؤوليات الأصلية في حياتك، علشان كده لازم تطلبي المساعدة من المعارف أو الأقارب، أو حتى الخدمات مدفوعة الأجر.
-
هذا الوقت سيمضي
كل ما تتعبي قوي، افتكري إن هذا الوقت سيمضي، بالحلو والمر اللي فيه، الكلمة دي بتهون كتير جدًا عليكي وبتديكي صبر إضافي.
-
استمتعي
اللحظات الأولى لتفجر غريزة الأمومة عندك، دي لا تقدر بتمن، وهتفضلي تفتكريها طول حياتك، فحاولي تستمتعي بيها رغم صعوباتها وآلامها.
-
ادخلي مجموعات الدعم
اختاري مجموعات أمهات إيجابية، تقدري تفضفضي فيها زي ما تحبي، وهتلاقي امهات تانية يقدروا يشاركوكي تجاربهم، وهتحسي إنك مش لوحدك أبدًا في أمومتك.
-
سلّي نفسك
هيعدي عليكي وقت وتحسي بروتين أو ملل، وخصوصًا في الأوقات الطويلة للرضاعة الطبيعية، أو أوقات سهر البيبي، تقدري تسلي نفسك في الوقت ده، بسماع والفرجة على حاجات بتحبيها أو قراءة كتاب، أو مكالمات تليفونية لطيفة.
-
اهتمي بنفسك
في فترة ما بعد الولادة، كتير بننسى نفسنا، وبيكون كل اهتمامنا بالبيبي، وده بيؤثر سلبًا على حالتنا النفسية، علشان كده لازم تهتمي كويس جدًا بنضافتك الشخصية ومظهرك العام، وهتلاقي ده رفع معنوياتك جدًا.
-
اكتبي مذكراتك
لو انتي بتحبي الكتابة، تقدري تسجلي يومياتك في دفتر مذكرات، الكتابة هتشيل عنك ضغط نفسي كبير، وفي نفس الوقت هتتبسطي لما تقرأي المذكرات دي فيما بعد.
-
غيري جو
لازم في فترة ما بعد الولادة، تدي اهتمام لتغيير الجو، حتى لو مش قادرة تخرجي لسه، ممكن تجيبي صاحباتك وتقضوا سهرة حلوة مع بعض، ولو ده مش متاح، ممكن تطلبي المشروب (في حالة إنه يكون مناسب للرضاعة الطبيعية) اللي بتحبيه وتشربيه وانتي بتعملي حاجة بتحبيها، أو تعملي أي أفكار تحسسك بتغيير الجو.
-
ثقفي نفسك
مهما كنتي عارفة معلومات نظرية قبل الولادة، إلا إن التطبيق العملي حاجة تانية خالص، في الفترة دي والبيبي لسا صغير قوي، تقدري تثقفي نفسك عن تربية الأطفال، وعن المعلومات الطبية الخاصة بيكي وبالبيبي، وهكذا.
-
البسي حلو
اللبس الحلو بيغير نفسية كل الستات، وبعد الولادة بتكون الأم لسه جسمها مش متزبط، ولو في رضاعة طبيعية كمان بتكون لابسة لبس مناسب للرضاعة الطبيعية، لكن كل ده ما يمنعش إنك تجيبي لبس حلو تلبسيه، من الماركات اللي بتفضليها، ويكون مريح وشيك وواثقة في نفسك وانتي لابساه.
-
قصي شعرك
بعد الحمل والولادة، الشعر يتأثر صحيًا جدًا باللي مريتي بيه، وممكن يكون مظهره مقصف وهايش وباهت، فلو قصيتيه قصة حلوة مناسبة ليكي، هتتبسطي بالنيولوك أكيد.
-
خططي للمستقبل
اعرفي هتعملي إيه في شغلك لو انتي أم عاملة أصلا، ولو انتي ربة منزل، خططي لحياتك مع وجود بيبي، علشان ما تغرقيش في روتين العناية بالبيبي وتنسي حياتك تمامًا، وده ممكن يسبب لك اكتئاب.
-
اعرفي ميزانيتك
مع الوقت هتعرفي مستلزمات طفلك والمصاريف اللازمة له، فهتحتاجي تزبطي ميزانيتك تاني على أساس المتغيرات الجديدة.
أنواع الفوط الصحية لبعد الولادة وأسعارها
-
علّمي جوزك
أمهات كتير بيشتكوا إن أزواجهم مش بيساعدوهم بعد الولادة، والحقيقة إن الزوج ممكن يكون مش عارف أصلا يساعد في إيه وازاي، فحاولي تعلميه واحدة واحدة الحاجات البسيطة، زي تحضير ببرونة البيبي، ومساعدتك في استحمام المولود الجديد وهكذا.
-
عيشي أمومتك
الأمومة هتفرض عليكي مواقف معينة، زي الرضاعة الطبيعية خارج البيت، أو تسريب حفاض الطفل على ملابسك، ما تخليش الحاجات دي تضايقك أو تخليكي تنعزلي، دي أمومتك ولازم تعيشيها زي ما هي.
وقبل وبعد كل حاجة، لازم تستعيني بربنا، لإن هو اللي هيقويكي على المسؤوليات الجديدة، ويخليكي تعدي من الفترة دي بسلام وبدون خسائر نفسية.
طريقة النوم الصحيحة بعد الولادة القيصرية وأهم النصائح
التعليق باستخدام حساب فيس بوك