محتويات المقال
كل واحد فينا بيتصرف بشكل غير التاني في العلاقات، فيه إللي دايما بياخد جنب.. فيه إللي مش بيعبر عن مشاعره.. فيه إللي بيلزق قوي في حبيبه.. فيه إللي محتاج يتطمن.. فيه إللي بيخاف من الجواز.. طيب ليه رؤية الناس مختلفة للعلاقات؟
علشان نفهم حاجات كتير عننا وعن الناس محتاجين نفهم مبادئ نظرية معقدة شوية هحاول أبسطها، اسمها نظرية التعلق.
إيه هي نظرية التعلق؟
نظرية التعلق نظرية ابتكرها عالم نفسي اسمه “جان باولبي” النظرية دي بتوضح إنه علاقة الطفل وهو صغير مع مقدم الرعاية الأول (الأم أو اللي بينوب عنها) بتأثر على الطريقة اللي الطفل ده بيتعامل بيها في علاقاته الحميمة لما بيكبر. يعني علاقتك بأمك (أو إللي كان بيقدملك الرعاية الحميمة مكانها) هتأثر عليكي لما تكبري..
باولبي عمل تجربة معقدة جدًا وقدر بعدها يقسم الأطفال اللي عمل عليهم التجربة لـ 3 مجموعات..
مجموعة التعلق الآمن: أظهر فيها الأطفال شكل صحي للتعلق مع الأم.
مجموعة التعلق المضطرب: أظهر فيها الأطفال شكل مشوش من التواصل مع الأم، لقوا إنه الأطفال دول عايزيين الأم تكون قريبة دايمًا وما تبعدش، ولو بعدت وسابتهم ، أول ما تقرب تاني الأطفال بتحس بالغضب والاستياء منها علشان بيحسوا انها اتخلت عنهم وسابتهم.
مجموعة التعلق التجنبي: أظهرت المجموعة دي من الأطفال برود شديد ناحية الأم وعدم اكتراث بقربها أو بعدها. يعني قربها زي عدمه مش فارقة..
أثبتت التجارب والدراسات اللاحقة اللي اعتمدت على نظرية التعلق أن الأطفال اللي كان نمط تعلقهم مضطرب أو تجنبي كانوا أكثر اضطرابًا في العلاقات العاطفية ومن الصعب عليهم أكتر من الآخرين الاستمرار في علاقات عاطفية ناجحة. النمط المضطرب هيعاني من مشاكل الخوف من الهجر والفقد وبالتالي هيتشبث بشكل مرضي بالشريك وهيقرب منه بشكل مبالغ فيه، أما النوع التجنبي فقد يتجنب العلاقات طويلة الأمد من الأساس.
فيه تقسيمة تانية قسمت شخصيات الأطفال في نظرية التعلق لأربع أنواع والدكتور شهاب الدين الهواري الطبيب النفسي المصري عمل تقسيمة ليهم بشكل منظم وسهل الفهم تعالوا نشوفها سوا..
التعلق الآمن:
حركيته: يتحرك بارتياح نسبي داخل العلاقة.
شعاره: أحتاجك ويمكنني الثقة فيك.
سؤاله: هل نتواصل؟ هل نتفاهم؟
طريقته: يحل مشاكله بالتفاهم حولها.
التعلق القلق:
حركيته: مهدد بفقد الآخر في العلاقة.
شعاره: أحتاجك وأخشى فقدك.
سؤاله: هل تراني؟ هل تفهمني؟
طريقته: يحل مشاكله بنبشها.
التعلق التجنبي:
حركيته: مهدد بالاستحواذ من الآخر في العلاقة.
شعاره: أخشى الثقة فيك.
سؤاله: هل ترى بذلي؟ هل أنت راضٍ؟
طريقته: يحل مشاكله بالتغاضي عنها.
التعلق المتردد:
حركيته: مهدد بالفقد والاستحواذ معًا.
شعاره: أحتاجك وأخشى الثقة فيك.
سؤاله: هل أنا آمن؟
طريقته: يحل مشاكله جيئة وذهابًا.
وفقا لنظرية التعلق، تجارب الطفولة مع مقدم الرعاية الأول ليها دور أساسي في تشكيل طريقة التعلق عند البالغين.. فالأشخاص إللي كان تعلقهم آمن منذ الصغر هيتصرفوا بشكل آمن في علاقتهم لما يكبروا، أما الأطفال إللي كانت بيئاتهم غير مستقرة وغير آمنة، فهم اكتر عرضة لإظهار سلوكيات غير آمنة في العلاقات لما يكبروا.
نظرية التعلق مش نظرية بتشرح سمات كل شخصية على حدى، لكن من خلالها بنقدر نفهم استراتيجية تفاعل كل شخص في علاقاته وخصوصا العلاقات إللي بتحتل مكانة مهمة ومنها العلاقة مع الشريك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك