نمو الطفل الرضيع في العام الأول: الشهر العاشر

الشهر العاشر في عمر طفلك أكتر سمة بتميزه هو التطور المذهل والسريع جدًا في مهاراته الحركية أكتر من أي مهارة تانية في طفلك. خلينا نستعرض مع بعض إيه هي التطورات دي، بس بكرر اللي قولته لك قبل كده. دي مجرد سمات عامة لكل الأطفال. بس في الحقيقة، كل طفل مختلف عن غيره أوقات في سمات بتظهر بشكل مبكر وأوقات بتتأخر. احنا في المقالات دي بنعرفك السمات العامة علشان تكوني على دراية بيها وفي حالة غياب أي واحدة فيهم لوقت طويل هتحتاج منك استشارة من طبيب طفلك.

• المهارات الحركية:

الطفل دلوقتي في الشهر ده بينتقل بحرية أكبر في البيت سواء عن طريق الحبو أو إنه يوقف ويمشي متسند على أثاث البيت عندك. مهم في الفترة دي إنك تشجعيه وتدعميه في إنه ياخد خطواته بشكل مستقل عن طريق إنك تمسكي دراعه وتخليه ياخد خطوتين هو ماسك إيدك. إنتي هتلاقي إنه بيسيب إيدك وبيحاول يمشي لوحده. طبعا لسة رجله ضعيفة. في حالة إنك ساكنة في فيلا  هتلاقي طفلك هيبدأ يحاول يصعد السلالم أو ينزلها لوحده. وده خطر كبير جدًا عليه هو مش هيقدر يحمي نفسه ولسة مش متحكم بالكامل في جسمه. في الوقت ده هيكون من المناسب إنك ترّكبي أبواب حماية من ناحية الصعود والهبوط علشان توقف طفلك من المحاولات دي.

• الحواس:

هنا في الشهر ده هتلاقيه بيحاول يعبر عن رغباته عن طريق إصدار أصوات غير مفهومة على أساس إنها كلمات زي إنه يعبر عن إنه عايز أكل بإستخدام كلمة “مم”. هنا عليكي إنك تشجعيه بإنك تنطقي له الكلمة بشكل صحيح مش مجرد بس إنك تستجيبي بتوفير الأكل ليه. نطقك للكلمة بشكل صحيح بيساعده على التعلم وتطوير مهاراته الكلامية. وخلقك لحوار مع طفلك وتجاوبه معاكي بيساعده على التعلم بشكل أسرع للكلام وبينمي قدراته على التعبير عن نفسه. اللي ممكن يكون جديد في المرحلة دي. إنك تلاقي طفلك بيظهر إزعاجه من شوية أمور مكانتش كدة قبل كدة زي صوت رن التليفون أو جرس الباب أو حتى صوت المكنسة. هتلاقي إنه بيتخض وبيخاف وبيعيط. لما يحصل كده، أفضل شيء تعمليه إنك تهديه وتحضنيه علشان يستعيد هدوئه من تاني وساعديه على التعرف على الحاجات دي بهدف إنه يتأقلم مع البيئة المحيطة بيه.

• اللعب

يمكن في الفترة دي أفضل لعبة تلعبيها معاه إنك تتكلمى معاه عن طريق إنك توصفي معاه كل اللي بتعملوه مع بعض. زي مثلًا تعالى نجيب كورتك الحمرا. يالا أنا هرميها ليك وانت هتمسكها. حبيبي الصغير مسك الكورة برافو، وهكذا. التوصيف ده بصوتك اللي هو بيحبه جدًا بيزود التواصل بينكم وبيساعده على تعلم الكلام، غير إنه بيعتبر إنك بتحكي له حكاية وده شيء هو بيحبه جدًا. وطبعا ما تنسيش الأغاني والأناشيد اللي بتكون محببة أوي ليه في الفترة دي.

• التواصل

في الشهر ده هتحسي إن ملامح شخصية إبنك إبتدت ملامحة العريضة تظهر بشكل كبير، زي مثلًا إنه يكون طفل من النوع اللي بيوزع إبتسامات على الجميع وإنه بيبعت بوسة ليهم لو حد بعت أو حتى يعمل باي بإيده. أو إنه يكون خجول بحيث لما يظهر أي غريب في محيطه ويحاول يتواصل معاه يقوم مخبي وشه. هتلاقي برضه إنه بيعبر عن رغبته في الخروج في إنه يشاور على الباب علشان يعرفك إنه عايز يخرج. وبرضه هتلاقي إنه بيظهر رفضه وغضبه لما تجبريه على القاعدة في عربيته أو في كرسيه في العربية.

نصيحة صغيرة .. خلي الكاميرا بتاعتك دايما جاهزة لأن كمية اللحظات الجميلة والسعادة اللي هتعيشوها مع بعض في الفترة دي مش هتتعوض وتستاهل التوثيق.