نوبات الغضب عند الأطفال من أكتر الحاجات اللي بتضايق الأمهات وبتسبب لهم إحباط، لإن معظمنا بنبقى مش عارفين إيه هي الطريقة الصح اللي نقدر نتعامل مع ولادنا بيها وهم عندهم نوبة غضب عشان نساعدهم يهدوا، وفي نفس الوقت، النوبات دي ما تتكررش. هل نتجاهلهم ولّا نديهم اهتمام؟ ننفذ اللي هم عايزينه عشان ما يأذوش نفسهم ولّا نصر علي رأينا؟ في المقال ده، هنقول لك على خظوات للتعامل الصح مع نوبات الغضب بناءً على كلام أحدث الدراسات.
إيه هي نوبات الغضب؟
نوبات الغضب للأطفال الصغيرة من سنة لتلات أو أربع سنين بتكون على شكل إنهم يرموا نفسهم في الأرض ويصوتوا ويعيطوا من غير توقف. لإن بيكونوا لسه ما عندهمش ضبط نفس، مش عارفين يتحكموا في المشاعر اللي حاسّين بيها ولا قادرين يعبروا عنها بطريقة واضحة.
طيب نتصرف ازاي أول ما تبدأ نوبة الغضب؟
- الخبراء بينصحوا بالتجاهل، لكن التجاهل ده له صورة، يعني ما ينفعش يكون مجرد تجاهل للطفل ومشاعره، لإن ده هيعصبه أكتر وهيحبطه. ما تمشيش وتسيبي الطفل وهو في قمة غضبه عشان تعرّفيه إنك رافضة التصرف، لإنك كده بتوصلي له إنك رافضاه هو شخصيًا، وده هيأثر على صحته النفسية.
- احنا بنتجاهل الفعل نفسه مش الطفل، يعني رامي نفسه على الأرض وبيعيط، قرّبي منه وطبطبي علي ضهره وراسه بالراحة وانتي ساكتة، قربي من ودنه وقولي له حاجة بصوت واطي، أي كلام، المهم تعملي لعقله تشتيت عن نوبة الغضب اللي هو فيها.
- مهم جدًا تأمين المكان حوالين الطفل عشان ما يأذيش نفسه، ولو بيخبط راسه في الارض حطي إيدك تحت راسه أو حطي له مخدة.
- ما تدخليش معاه في مساومات زي لو سكت هاجيب لك كذا، أو إنك هتنفذي له اللي طلبه لو سكت.
- في نفس الوقت، خلّي دايمًا معاكي وسائل تشتيت له زي كتاب بيحبه، لعبة بيحبها، شيليها دايمًا في شنطتك أول ما يبدأ يدخل في النوبة، حاولي تلهيه بيها.
- من أكتر الأسباب اللي بتخلّي الأطفال تدخل في نوبة غضب هي تغيير الروتين، الجوع، قلة النوم. فعشان تتجنبي النوبات دي، على قد ما تقدري دايمًا اتأكدي إن طفلك مرتاح وشبعان ونايم كويس قبل الخروج.
- بعد ما يخلص، خديه في حضنك وضحّكيه وما تأنبيهوش على اللي حصل. بالوقت، تقدري تعلميه إن الطريقة دي مش هتوصله للي عايزه. وكل ما يكبر، ساعديه أكتر يعبر عن مشاعره بطريقة صح، وإنك مش بتقدري تفهميه وهو بيعيط ويصوت بالشكل ده.
وأخيرًا، ما تخليش نظرة الناس حواليكي تشكّل ضغط عليكي وعلى ولادك، وتخليكي تتصرفي بطريقة عكس ما انتي حابة ومقتنعة عشان تخلصي من الموقف بسرعة قصاد الناس، لإن انتي أدرى واحدة بمصلحة ولادك وكلنا اتحطينا في الموقف ده قبل كده، فما تقلقيش وخليكي هادية لإن كل ما كنتي أهدى كل ما ده هيسرّع في انتهاء نوبة الغضب أسرع عند طفلك.
5 حاجات مش من حقنا نفرضها على ولادنا
التعليق باستخدام حساب فيس بوك