محتويات المقال
خلينا متفقين إن فيه شوية ثوابت كونية مهما كبرنا وعدى عليها زمن طويل عمرنا ما هننساها ولا هنبطل نحبها زي مجلة ميكي وسمير وبسكوت نواعم وأغاني فيروز..
وبما إننا أمهات التمانينات أمهات اللوليتا وعمو فؤاد هنرجع بيكي شوية بالزمن نسترجع ذكريات بنحبها وعمرنا ما نسيناها أيام لما كان الدش بتاعنا هو القناة الأولى والتانية وذكريات التليفون اللاسلكي العجيب والووكمان وشرايط الكاسيت.. ذكريات الطفولة المشردة ومشوار المراهقة الطويل وتوكة الفراشة اللي بتطير ومسلسلات القناة التانية زي أوشين..
يوميات ونيس
ومين فينا مكنش بيستنى ونيس ومايسة وحديث الثلاثاء وطابور الصباح مع عز الدين أيبك وجهاااااد اللي بترد على ونيس سلاااامة و شرف الدين شرفنطح هوبا وهدى الزئردة وهى بترد على ونيس أحماااااد وحكايات الحلقات اللي كل مرة كان ونيس بيعلمنا فيها قيم أخلاقية مختلفة.
مسلسل ضمير أبلة حكمت
المسلسل اللي جمع مجموعة من أفضل الفنانين زي فاتن حمامة وأحمد مظهر وجميل راتب وتتر المسلسل للموسيقار عمر خيرت هياخدك للتسعينات وقصص أبلة حكمت ناظرة مدرسة البنات وهي بتحاول تتمسك بمبادئها وسط الهجوم عليها وفى النهاية بتنتصر وبيتم تكريمها.
مسلسل لن أعيش في جلباب أبي
المسلسل اللي حافظين كل أحداثه زي مشهد بوفيه فرح سنية وقصة حب عبد الغفور وفاطنة كشري ونجاحه إنه يبقى من أكبر تجار الخردة وصراعهم فى تربية عبد الوهاب ومواقف روزالين مع الحاجة فاطنة.
برنامج سينما الأطفال
البرنامج اللي كلنا كنا بنستناه كل يوم جمعة كان بيجيب كارتون وأفلام أطفال زي The last unicorn.
كارتون مازنجر
كارتون مازنجر اللي بيطلع من تحت الأرض وبيحارب الأشرار مع أفروديت كنا بنشوفه صدفة كده كل فين وفين ولما بنحب نشوفه تاني ماما كانت بتسجله على شريط الفيديو عشان مكنش فيه قنوات كارتون زمان.
كارتون كابتن ماجد
ماجد الطفل الصغير اللي بيحب كرة القدم وتقريبًا مكناش بنتفرج طول الحلقة على حاجة غيره وهو بيحاول يجيب جون وممكن الجون يطول بالحلقات..
فوازير عمو فؤاد
فوازير عمو فؤاد اللي كنا بنستناها فى رمضان وبنحاول نشترك فيها عشان نكسب كرة أو فيديو والأغنية اللي كنا دايمًا بنغنيها عمو فؤاد بيلف بلاد راح أمريكا جه من أمريكا لف الدنيا بحالها وعاد.
برنامج خلف الأسوار
البرنامج اللي كان بييجي بليل على القناة الأولى وكان بداية معرفتنا بالجريمة وكان ممكن مينيمناش بس بنتفرج عليه بردو.
رجل المستحيل
حكايات وبطولات ضابط المخابرات المصري أدهم صبري مع صديقه قدري.
المغامرون الخمسة
مغامرات الأبطال نوسة ولوزة وتختخ وعاطف ومحب في المعادي والكلب زنجر والشاويش فرقع اللي كنا بنستنا كل مرة هيساعدوا فيها الشرطة في تحقيقاتهم.
شوكولاتة جيرسي
شوكولاتة جيرسي بجوز الهند وكلمات أغنية الأعلان اللي لسه حافظينها.. بستك بستك بستك ناو شوكلاتة جيرسي واكلة الجااااااو.
اللبان السحري
أول إكتشافنا للبان وكل ما ييجي الأعلان تحس إنك لازم تنزل تجيبه دوق دوق دوق أحلى هدية السحري لبان يلا يا جدعان..
سبيرو سباتس (الدبانة) والسينالكو
المشروبات المفضلة لناس كتير وكان ممكن نعمل خروجة مخصوص عشان نروح نشرب سباتس أو سينالكو من الكشك وكانت بتبقى أحلى خروجة.
ومبي برجر
المكان والخروجة المفضلة لسهرة الخميس.
عصير بيست
العصير اللي ضيعنا نص عمرنا وإحنا بنحاول نركب الشاليموه وفى الآخر نستسلم ونقلبه الناحية التانية عشان نشرب منه.
قوليلنا: إيه أكتر حاجة بتفكرك بطفولتك؟
التعليق باستخدام حساب فيس بوك