عزيزي الزوج قارىء هذا المقال: عيد الحب 2022 قرّب وهنعمل نفسنا متفاجئين وناسيين لما نلاقيكم بالهدية علينا داخلين. بس بنفكركم إن هدايا الفلانتين مهمة بالنسبة لنا لإننا أمهات تعبانين وشقيانين وعايزين اهتمام وهدية بسيطة حتى لو هتجيب شوكولاتة من أم واحد وعشرين..
عزيزي الزوج قررنا في المقال ده نديك أفكار هدايا الفلانتين 2022 عشان تقدمها للمدام السنة دي.
أفكار هدايا الفلانتين 2022 للمدام
هاتلها ناني يا إبراهيم
هدايا عيد الحب للزوجة 2022 – المصدر: تويتر
اوكيه بهزر مبدئيًا، ممكن تبقى هدية أوفر شوية وهتخرب الميزانية، بس فكر من فترة للتانية إنك تستعين بناني موثوق فيها تقعد مع ولادك بس تكون تحت الإشراف طبعًا وتخرجوا سوا كل فترة خروجة لطيفة عشان تفصل من جو البيت والعيال أو هي تخرج لوحدها من غير أحباب الله اللي بيصوتوا في المكان وبيرموا الشوك والسكاكين في المطعم أو بيحاولوا يجيبوا أرفف كارفور كلها في العربية.. جيبلها ناني ولو حتى يوم واحد يا إبراهيم.
بيج ماك كومبو لارج
هدايا عيد الحب للزوجة 2022
ايوه اللي قريته ده مضبوط لو مراتك بتحب الأكل هاتلها أكتر حاجة بتحبها وريحها يوم عيد الحب من وقفة المطبخ وسمعها واحدة من أكتر الجمل المريحة للأعصاب “متطبخيش يا حبيبتي انا هجيب أكل من برة” حاجة كده صداع من كتر الراحة النفسية.. فكر إيه أكتر حاجة مراتك بتحب تاكلها حتى لو حاجة بسيطة زي البيج ماك أو الشاورما السوري أو حتى طبق كشري من أبو طارق.
سيبها مراتك تنااااام
هدايا الفلانتين للزوجة 2022 – مصدر الصورة: Youtube
من أحلام الأمهات البسيطة إنها تنام ولو حتى 3 ساعات نوم متواصل من غير ما تلاقي شلاليت في كليتها أو عينين مبحلقة فيها في نص الليل وتقولها عايز حمام يامااااماااا، السنة دي في عيد الحب خد الولاد فسحهم وسيبوا الست تنام أو لو عندك بيبي اسهر معاه بدل ما هي اللي تفضل سهرانة معاه وحققلها أمنية من أمنياتها وهي النوم المتواصل حتى ولو لساعتين ودي هتكون بتعادل هدية مكونة من محل ورد وعشرين كيلو شوكولاتة.
يوم في السبا.. يوم من عمري
هدايا الفلانتين للزوجة 2022
طبعًا عارف قد إيه مراتك بتتعب مع الولاد ليل ونهار وحاجة آه يا عضمك يا رضا كده خالص.. ومبيبقاش فيه وقت تهتم ببشرتها أو شعرها، عشان كده ممكن تخصص ليها يوم في سبا تقدر تعمل فيه جلسات تنضيف بشرة أو كوافير تغير فيه لون شعرها أو جلسات مساج ترجعها لكده لأيام الفراغ الوسطي الجميل.
كوفي ماشين
هدايا الفلانتين للزوجة 2022
أول حاجة بتعملها بعض الأمهات أول ما تفتح عينها الصبح هي كوباية القهوة، كوباية القهوة اللي بتدينا طاقة وتزق معانا اليوم.. عشان كده الكوفي ماشين هتكون أنسب هدية لمراتك عشان هتريحها كتير وهتضمن إنها مش هتقلق إن قهوتها هتفور على النار وهي ناسياها عشان بتعمل خمسميت حاجة في نفس اليوم.
المنشر أبو دورين
هدايا الفلانتين 2022 للزوجة
بما إن الفلانتين بييجي في الشتا فأكيد عارف معاناة الغسيل اللي مبينشفش مهمًا سيبناه بالأيام على الحبل وممكن كمان فانلاتاك وقمصانك البيضا تطير من على الحبل في عواصف أمشير.. هاتلها المنشر أبو دورين عشان أكوام الغسيل وخلي مهمة الغسيل والنشير أسهل بالنسبة ليها بدل ما هي أشغال شاقة وصدقني هتفرح بيه.
هتجبلها ايه في عيد الحب يا ابو العيال؟
التعليق باستخدام حساب فيس بوك