محتويات المقال
” هو في هدايا عيد الحب للمتجوزين ؟! ” .. بصراحة يعني بعد سنين جواز و 3 منهم أمومة وعشر سنين من “خد الزبالة معاك وإنت نازل” أقدر أقول وبمنتهى الثقة كمان الفلانتين هيفضل مهم بالنسبة لنا حتى لو كبرنا وعيالنا بقوا يجيبوا لمراتاتهم هدايا عيد الحب كمان.. وزي ما عيد الحب مهم بالنسبة لينا وبنقعد نستنى الهدية مينفعش بردو ننسى أبو العيال وزي ما إتكلمت عن هدايا عيد الحب اللي الزوج يقدر يقدمها لمراته هنا هتكلم عن الهدايا المبتكرة اللي تقدري تقدميها له ويكون طاير من الفرحة بيها.
أي حاجة للمدام التانية “العربية هانم”
مصدر الصورة: الدهليز
العربية بالنسبة للراجل هي بيته التاني والنونة اللي بيهتم بيها أكتر مننا شخصيًا في بعض الأحيان يعني عشان منبقاش مفتريين.. على طول بتلاقيهم بيرتبوها ويفسوحها وياخدوها جولة كمان في السبا تعمل أحلى Makeover وبالواكس كمان.. فعشان كده من ضمن الهدايا المبتكرة اللي ممكن تجيبيها لجوزك في عيد الحب هو حرفيًا أي حاجة للعربية وهيقدرها جدًا سواء طقم طاسات جديدة أو مسّاحات إزاز ومعاهم فواحة على شكل شجرة أو مكنسة للعربية عشان المرة الجاية لما ولادك ياكلوا ويفتفتوا في العربية.
لانش بوكس
أيوه اللي قريتيه ده مضبوط لانش بوكس، المرة الجاية لما جوزك يقولك دي جيسيكا من الـHR عزمت عليا بكلوب ساندوتش تونة ميلت وكاظم إبن طنط عفاف مراته بتعمله لانش بوكس كل يوم وهو نازل الشغل ويقعد يحسسك بتأنيب ضمير إنك بتديله الساندوتشات في أكياس تلاجة أو مبتعملوش ساندوتشات أساسًا فاجئيه باللانش بوكس هدية عيد الحب واعمليله مع ولادك لانش بوكس ما هما الحب الحب بردو ومينفعش نديهم أكل في كيسة سمرا.
اشتراك في Bein Sports
حاجتين الرجالة بتعملهم من ساعة لما بيتولدوا يا بيلعبوا كورة في الشارع يا بيتفرجوا على كورة برضو يا في الشارع يا في قهوة يا في البيت أو حتى في الشغل في الخباثة كده.. سواء كانت الرجالة أهلاوية أو زملكاوية أو حتى بيشجعوا حرس الحدود هيتفرجوا على أي ماتش وخلاص الدوري الأسباني يخلص يقولك فيه دوري إنجليزي، كاس العالم هيخلص هيقولك الأمم الأفريقية هتبتدي.. اشتركيله في Bein Sports ولما تطلبي من جوزك المرة الجاية يقعد معاكي عشان يساعدك في البيت ويقولك لأ ماتش الموزمبيق مع بوركينا فاسو شغال قوليله عندنا اشتراك Bein وهنسجلهالك يا حبيبي.
اشتراك سنوي في الجيم
هدايا عيد الحب لجوزي – المصدر: Twitter
لو جوزك رياضي وبيحب يروح الجيم فالهدية هتكون حلوة جدًا بالنسبة له وخصوصًا لو عملتي الإشتراك في الجيم اللي بيحبه، بس لو جوزك أصلًا مش بيروح الجيم ومتقمص دور الراجل “اللي من غير كرش ميسواش قرش” بنصحك مترميش فلوسك في الأرض عشان هيروح مرتين تلاتة وباقي الخروجات أكيد هيخرج على القهوة مع صحابه.. معروفة
لكلوك للبيت
مصدر الصورة: مصراوي
أيوه لكلوك وفيها ايه؟ الجو برد ولوك الشياكة ووقار روب الفنان أحمد مظهر محتاج معاه أكسسوار يكمل الطقم.. عيد الحب بيبقى في عز الشتا مش هنجيب جوز شرابات ولا شبشب أبو صباع خلينا عمليين وواقعيين هنجيب لكلوك عشان يكمل طقم الشياكة وفيه أشكال رجالي كتير حلوة وأغلبهم بيبقى أشكال كاروه.
كرسي Lazyboy
هدايا عيد الحب لجوزي – المصدر: Youtube
عشان لما يحب يلعب دور بلاي ستيشن ولا PUBG ياخد راحته ويتمرجح عليه ما هما بيتعبوا بردو وبيقعدوا بالساعات قدام اللعب دي ينفع يقعدوا كده على كنبة ولا كرسي مش مريح..
وفي النهاية أحب أقولك إن حتى لو مجبناش هدية إحنا الأمهات “ست الكل” كفاية عليه أومال ايه..
التعليق باستخدام حساب فيس بوك