محتويات المقال
يوم عيد الأم هو أكتر يوم تقيل وصعب بيمر على الناس اللي ربنا كتب عليها تفقد أمهاتها، صوت أغاني عيد الأم في الخلفية، ومشهد هدايا عيد الأم وهي رايحة جاية بيسبب حالة عنيفة جدًا من التعب والحزن، فيه ناس بتتجنب اليوم بالكامل وبتطفي كل حاجة وتقعد في أوضتها عشان تتجنب كل مظاهر الاحتفال العنيفة جدًا واللي بتمتد لمواقع التواصل فتلاقي كل الناس منزلة صور أمهاتها وبتتكلم عنها بسعادة. لو انتي من الناس دي، فأنا قررت أكتب المقال ده مخصوص عشانك، لإني عارفة وحاسة بيكي جدًا. في المقال ده، هتلاقي مجموعة من الأفكار اللي ممكن تساعدك تتقبلي اليوم وكمان تحتفلي بيه زي كل الناس وتحسي في نهايته بالامتنان.
اوعي تزعلي
مامتك صحيح عند ربنا، لكنها لسه عايشة فيكي وبيكي، تفتكري لو كانت عايشة كانت هتبقى مبسوطة وهي شايفاكي حاسة بكل الحزن ده؟ كل أم في الدنيا بتكون عاوزة تشوف ولادها في أحسن حال، سعداء ومرتاحين وفرحانين ومقبلين على الحياة، وإذا كنا بنهتم جدًا إننا ننفذ وصايا المتوفين، فأهم وصية مش مكتوبة سابتها والدتك ليكي هو إنك تكوني بخير، طول ما انتي بخير هي هتكون مرتاحة ومطمنة عليكي.
هاتي الهدية عادي جدًا
انزلي زي كل سنة واختاري الهدية اللي كنت هتحبي إنك تقدميها لمامتك وافرحي وانتي بتشتريها، وغلفيها بغلاف رائع جدًا، واختاري ست بسيطة في محيطك مفتقدة وجود ولادها، جارة، قريبة، صديقة. لو مفيش، اسألي أصدقائك عند حد بالمواصفات دي وقدمي الهدية بنية الثواب لمامتك.
جهزي نفسك لزيارة جميلة
يوم عيد الأم صحيح مامتك مش موجودة لكن في أمهات كتير جدًا في دور المسنين في احتياج شديد لأي حد يروح يقولهم كل سنة وانتو طيبين بحب ولطف. لو قدرتي تجيبي هدايا ليهم تمام، ما قدرتيش، فالزيارة هتفرق معاهم كتير وخلي نيتك إنك حابة فعلًا ثواب الفعل الطيب وامتنان القلوب الفرحانة بزيارتك يوصل لمامتك.
اختاري هدية لمامتك
في العالم الآخر، آباءنا وأمهاتنا بيستقبلوا الهدايا مننا عادي جدًا، لكن نوع الهدية بتختلف، وبدل ما تكون مادية، بتكون معنوية. بخلاف الدعاء، ممكن جدًا تختاري فكرة لصدقة سواء عادية أو جارية وتنفذيها في اليوم ده بنية إنها توصل لمامتك زي مثلًا إنك تجيبي كرسي متحرك في مستشفى أو إنك تتبرعي لمستشفى محتاجة زي أبو الريش وباقي المستشفيات المجانية، أو تختاري نشاط معين من الأنشطة الخيرية الكتير جدًا اللي بتقدمها مؤسسة مرسال، ولو مفيش فلوس كفاية معاكي، ممكن تكتفي بإنك توزعي بونبون على الأطفال اللي في الشارع، فرحتهم هترفع معنوياتك وتحسسك بالخير اللي مامتك زرعته فيكي.
اطبخي أكلتها المفضلة
يا ترى إيه أكتر أكلة مامتك كانت بتحبها؟ في اليوم ده بالذات تقدري تعملي الأكلة المفضلة عندها، أو تشتريها جاهزة وتنزلي تهديها لشخص فعلا محتاج ياكل في الوقت ده، ما تتخيليش كم الارتياح النفسي اللي هتحسي بيه والسعادة اللي هيكون سبب فيها أكلة مامتك المفضلة واعتبري دي هي هدية منك ليها.
استحضري مامتك
اقعدي امسكي ورقة وقلم، واكتبي كل الحاجات اللي مامتك كانت عاوزاكي تعمليها دايمًا، الصفات اللي كانت بتطلب منك تكون عندك، التصرفات اللي كانت بتحبك تعمليها، كل الحاجات الطيبة والخير اللي زرعته فيكي، يوم عيد الأم مناسبة مهمة جدًا عشان ترجعي لنفسك وتشوفيها بعين مامتك، افتكري مامتك كانت تحب تشوفك إزاي في أحسن صحة وأحسن حال وخليكي حريصة جدً ا على ده عشانها وعشانك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك