يعني زي ما بيقولوا أصحابنا الأجانب بقيتي واخدة شريكك For granted ؟ بتعامليه على إنه موجود ومتاح ومضمون.. هيروح فين يعني؟!
لو انتي بتعملي كدة.. أحب أطمن حضرتك ومن واقع خبرتي المتواضعة في الحياة.. الجوازة دي مش هتعمر، وولو عمرت العلاقة هتبقى هشة وضعيفة ومليانة غضب والحب هيختفي وهنرجع نقول الحب ليه بيموت بعد الجواز.. خديها مني حكمة: ضمان شريك حياتك هو أول طريق الفشل..
فكري لما كنتي بتبعتي لشريك حياتك كل يوم Morning text تصبّحي عليه وتقولي له كلام حلو.. افتكري لما كنتي بتشاركيه أفكارك وأحلامك وبتعملي إيه.. افتكري لما كنتي بتدلعيه وبتقوليله إنه حبيبك وراجلك ومالي عينك.. راح فين الكلام ده يا جماعة؟ بيموت ليه.. ليه بإيدينا بنهد حاجة من أجمل الحاجات إللي ربنا كتبهالنا.. ده الحب ده رزق والله!
فيه كاتب لطيف اسمه جون نج نشر في كتابه : “نصائح بسيطة محببة للزيجات الرائعة نموذج ذكي للمحادثات بين الشركاء قبل وبعد الزواج” تعالوا نقراها سوا..
| قبل الجواز وبعده بتتغير طريقتنا!
قبل الزواج.. هو:نعم.. أخيرا.. أنا زهقت.. تعبت من الانتظار هي: عايزني أمشي؟ هو:إياكي تفكري في كدة! هي بتحبني؟ هو: طبعا.. دايما هي إنت خدعتني قبل كدة. هو: لا.. بتسألي ليه! هي: عايز تفضل جنبي؟ هو: في كل فرصة ممكنة هي: هتضربني؟ هو: إنتي مجنونة.. أنا مش من النوع ده من الأشخاص.. هي:ممكن أثق فيك؟ هو: نعم هيأ يا حبيبي
بعد الجواز: اقرأ الحوار السابق من الآخر للأول 😀 |
طبعا ده سيناريو ساخر الكاتب ألفه علشان يوصّل لنا بنكون فين في بداية العلاقة من حب ولطف وحنية وبنروح فين بعد العلاقة لغتاتة وغلاسة وقلة احترام مع بعض.
الجواز مش سلاسل حديد رخمة واجعانا ومكبلة إيدينا ورابطانا ببعض.. الجواز بالنسبالي المفروض يكون زي آلاف الخيوط الحريرية إللي لافة حوالينا ومحاوطانا ومقربانا من بعض. الجواز شرنقة حرير.. شرنقة اختيارية المفروض بندخلها مع الحبيب و نطلع منها فراشات قوية بتطير لفوق في السما بحرية وبخفة وبسعادة.
لو انتي متجوزة أو في علاقة حب زوري قسم علاقات وصحية جنسية هتلاقي مقالات كتير مفيدة
التعليق باستخدام حساب فيس بوك