محتويات المقال
مجرد ما تتأخر الدورة الشهرية عن معادها الست بتتوقع على طول إنها حامل سواء كان عندها أطفال قبل كده ولا لأ، وساعتها مشاعر الست بتختلف تمامًا عن قبل كده، وبتدخل في مشاعر إحساسها متضارب بس دايمًا بتفضل رغبة الست في إنها تتأكد هي حامل ولا لأ هي شغلها الشاغل.
في اختبارات حمل مختلفة منها أجهزة الاختبار المنزلي ومنها المعملي اللي بينقسم لتحليل حمل في الدم وتحليل حمل في البول.
وعشان الست بتكون محتاجة لنتيجة مؤكدة وسريعة لحملها بتروح لتحليل الحمل في الدم وهنا بيكون في سؤال: هو في إحتمالية للخطأ في تحليل الحمل في الدم؟
عشان نعرف إجابة السؤال ده لازم نعرف:
كيفية عمل تحليل الحمل في الدم:
اختبارت الحمل في الدم بتبحث في دم السيدة على هرمون الغدد التناسلية المشيمية البشرية hcg، جسمك بيعمل الهرمون ده بعد ما بويضة مخصبة تلزق في جدار الرحم، وده بيحصل عادةً بعد 6 أيام من الإخصاب ومستويات الهرمون ده بتعلى بسرعة وبتزيد وتتضاعف كل يومين أو 3 أيام.
هل تحليل الحمل في الدم ممكن يغلط؟
تحليل الحمل في الدم من أكتر التحاليل اللي نسبة صحتها عالية، ومش بتغلط غالبًا بس بشرط إن يكون المعمل اللي عملتي فيه التحليل معمل كويس، وما تكونيش أخدتي أي حاجة ممكن تأثر على دقة التحليل.
إيه الفرق بين تحليل الحمل في الدم واختبار الحمل المنزلي؟
- تحاليل الدم بتتعمل في معامل التحاليل الطبية، عشان كده الستات بتستعملها أقل من الاختبارات المنزلية، بس تحاليل الدم ممكن تكشف الحمل قبل الاختبارات المنزلية بحوالي 6 لـ 8 أيام من التبويض.
- نتيجة تحليلة الدم بتاخد وقت أطول لمعرفة النتيجة من الاختبار المنزلي.
أنواع اختبارات الحمل في الدم:
في نوعين من اختبارات الحمل في الدم هما:
اختبار hcg النوعي:
وده هدفه إن نتيجة الحمل تظهر سواء سلبي أو إيجابي، وغالبًا الدكاترة بيطلبوه في وقت بدري علشان يتأكدوا من الحمل.
اختبار hcg الكمي:
وده بيقيس المقدار الدقيق لهرمون hcg في الدم حتى لو كانت مستوياته منخفضة جدًا في الدم، الاختبارات دي ممكن تساعد في تتبع المشاكل أثناء الحمل.
ممكن الدكتور يستخدمها مع اختبارات تانية لاستبعاد الحمل خارج الرحم، أو بعد الإجهاض، لما تنزل مستويات هرمون hcg .
إمتى لازم تعملي اختبار الحمل في الدم؟
في اختبارات للحمل ممكن تكتشف hCG قبل ما تتأخر الدورة الشهرية، بس النتائج هتكون أكتر دقة لو استنيتي لأول يوم من تأخر الدورة الشهرية.
إيه اللي المفروض تعمليه بعد ظهور نتيجة تحليل الحمل في الدم؟
- لو النتيجة طلعت إيجابية تواصلي مع الدكتور بتاعك علشان تتابعي الحمل.
- لو النتيجة طلعت سلبية فساعتها ممكن تلجأي للدكتور بتاعك علشان يساعدك تعرفي لو عندك مشكلة بتمنع الحمل إذا كنتي عايزة تحملي طبعًا.
اختبار الحمل المنزلي.. هل بتحصل معاه نسبة خطأ؟
المصادر:
التعليق باستخدام حساب فيس بوك