من أكتر الحاجات اللي بتشغل بال الستات بعد الجواز وخصوصًا بعد الولادة هي وسائل منع الحمل. ومن أكتر موانع الحمل المغضوب عليها من الرجالة هي الواقي الذكري. هنحاول نستعرض في المقال ده معلومات تعرفك أكتر عن الواقي الذكري (الكوندوم) وتفيدك انتي وجوزك في العلاقة الحميمة.
مميزات الواقي الذكري:
- منع الحمل.
طبعًا ده أشهر وأهم استخدام للواقي الذكري. والواقي الذكري أو الكوندوم بيمنع الحمل بطريقة آمنة جدًا للطرفين واحتمال حدوث حمل مع وجوده شبه معدوم.
- تأخير القذف.
من مميزات الكوندوم إنه بيطول مدة الجماع فلو فيه مشكلة سرعة قذف عند الزوج، الكوندوم بيعالجها خلال لبسه وبيمنع سرعة القذف.
- منع انتقال الالتهابات.
كتير بيكون فيه قلق من الالتهابات المنقولة جنسيًا زي الهربيس وغيرها. كمان فيه أمراض زي الالتهابات الكبدية وغيرها بتنتقل عن طريق الجنس غير الآمن (يعني من غير كوندوم). الكوندوم بيمنع انتقال أي التهابات أو أمراض موجودة عند الست أو الراجل.
مفاهيم مغلوطة عن الواقي الذكري
- تقليل الرغبة
فيه رجالة بتفتكر إن استخدام الكوندوم بيقلل من الرغبة الجنسية عن الرجل، ودي حاجة ما لهاش أي صحة ومالهاش أي سند علمي.
- العجز
فيه رجالة معتقدة إن الكوندوم بيسبب العجز الجنسي وعشان كده مش بيرضوا يستعملوه. وزي إشاعة تقليل الرغبة، إشاعة العجز الجنسي كمان مالهاش أي صحة ومالهاش سند علمي.
- المقاس
كتير من الرجالة بيظن إن الكوندوم هيكون مقاسه صغير فهيكون أصغر منه ومش هينفع يستخدمه. والحقيقة إن فيه أنواع واقي ذكري مختلفة بيكونوا بأحجام مختلفة وأشكال مختلفة، وممكن الشخص يجرب أكتر من نوع لحد ما يلاقي النوع المناسب.
- الواقي الذكري يضايق الرجل
في الحقيقة دي حاجة نسبية جدًا ودي مش حاجة أكيد إنها بتحصل لأن فيه أنواع من الكوندوم رفيعة جدًا وما بتضايقش الراجل خالص أثناء العلاقة الحميمة.
- انزلاق الواقي الذكري والحمل
من الأسباب اللي بتخوف ستات ورجالة كتير من الواقي الذكري الخوف من إن الواقي الذكري يتقطع أو ينزلق وفي الحالة دي هيحصل حمل. نسبة الانزلاق بتكون بس 2% من الحالات والقطع ما بيكونش إلا في حالة إن الكوندوم كان ردئ النوع جدًا أو الجماع كان عنيف. غير كده، ما بيكونش فيه أي خوف من انزلاق أو انقطاع الواقي الذكري. في حالة انزلاقه أو انقطاعه، بتكون في حبوب منع حمل طارئة ودي هنكتب لكم عنها قريب جدًا مقال مفصل. استنوها.
في الآخر، بيرجع لك انتي والزوج قرار منع الحمل وقرار الوسيلة المناسبة. لكن بنشجعك تجربي الكوندوم لسهولته ومميزاته.
التعليق باستخدام حساب فيس بوك