محتويات المقال
معظم وسائل منع الحمل بتكون مخططة ومنتظمة، زي حبوب منع الحمل أو الحقن أو متركبة ومنسية، زي اللولب، أو موجودة في الدرج دايمًا زي الكوندوم. لكن ساعات بنلاقي نفسنا عرضة لممارسة الجنس من غير ما نكون مخططين، زي مثلًا إن يكون الزوج مسافر وراجع من السفر فجأة، أو حصلت مشكلة في وسيلة منع الحمل المعتادة، أو الجنس كان – لا قدر الله – بالإكراه (اغتصاب). في الحالات دي، بنحتاج منقذ للموقف يحل المشكلة دي بسرعة. هنا بييجي دور حبوب منع الحمل للطوارئ.
حبوب منع الحمل للطوارئ
الحبوب دي – وهي نوعين في مصر والعالم العربي: كونترابلان II (مصر) وبوستينور (دول تانية في العالم العربي) – معمولة بتركيز عالي جدًا من الهرمونات عشان تمنع الحيوانات المنوية اللي دخلت الجهاز التناسلي بالفعل إنها تخصب البويضة.
طريقة استخدام حبوب الطوارئ لمنع الحمل
الحبوب دي بتكون في هيئة حبايتين في شريط، ولازم يتاخد الحبايتين (جرعة 150 من مادة ليفونورجيستريل) في خلال 72 ساعة من ممارسة الجنس غير الآمن. يعني في خلال 3 أيام بحد أقصى (بعض المصادر بتقول إنهم 5 أيام، لكن خليكي في المضمون). الحباية الأولى بتتاخد أول ما تقدري والتانية بعدها ب12 ساعة أو تاخدي الحبايتين مع بعض أول ما تقدري.
دواعي استخدام حبة منع الحمل للطوارئ
- نسيتي حبة منع الحمل اليومية
- الكوندوم اتقطع أو اتزحلق
- عرفتي إن اللولب اتحرك من مكانه (عن طريق كشف أو نزيف)
- كانت الممارسة مفاجئة أو بالإكراه
الحد الأقصى لاستخدام مانع حمل الطوارئ
بالرغم من إن الموقع الرسمي لكونترابلان II بيقول إن الحد الأقصى للاستخدام هو مرتين في الشهر، لا ينصح باستخدام مانع حمل الطوارئ أكتر من مرتين في السنة كلها لإن ده بيدخل الجسم كمية هرمونات كبيرة جدًا قد تتسبب في مشاكل صحية كبيرة زي سرطان الثدي.
الآثار الجانبية لمانع حمل الطوارئ
دي آثار جانبية محتملة لكن مش أكيد إنها هتيجي لـ100% من الستات اللي بتستخدم حبوب منع الحمل للطوارئ.
- تغيرات في الدورة الشهرية: (دورة شهرية أخف أو أتقل، بدري أو متأخر)
- وجع في الجزء السفلي من البطن
- إرهاق
- صداع
- دوخة
- آلام في الثدي
- ترجيع
نتمنى لك صحة إنجابية وحياة جنسية سعيدة.
مصدر ساعدنا في كتابة المقال
Contraplan II
التعليق باستخدام حساب فيس بوك