لما بنسمع كلمة وسائل منع الحمل، على طول بييجي في بالنا إنها للستات، لكن في الحقيقة فيه وسائل منع حمل للرجال كمان، وفي منها مشابه جدًا لوسائل تنظيم الأسرة اللي بتستخدمها السيدات، ومنها آمن جدًا ونسبة نجاحه بتتجاوز الـ 90%، لكن في وسائل برضه مش معتاد في العالم العربي إن الراجل يستخدمها لمنع الحمل. ودلوقتي هنقول لك على كل وسائل تنظيم الأسرة اللي للراجل:
وسائل منع الحمل الشائعة للرجال
-
الواقي الذكري
الواقي الذكري لمنع الحمل
الواقي الذكري غلاف مطاطي بيستخدم للعضو الذكري، علشان يمنع دخول الحيوانات المنوية داخل المهبل، وبالتالي بيمنع الحمل بنسبة 99%، لكن بشرط استخدامه بطريقة صحيحة، والتأكد من إنه ما اتقطعش.
وعشان تعرفي تفاصيل أكتر عن الواقي الذكري شوفي المقال ده: سلسلة وسائل منع الحمل: الواقي الذكري
-
العزل (PULLOUT)
والطريقة دي مناسبة للناس اللي مش بيحبوا استخدام الواقي الذكري، وهي عبارة عن قذف الراجل للسائل المنوي خارج مهبل الزوجة، لكنها مش طريقة آمنة، لإن ممكن يحصل خطأ، فلازم الطريقة دي تستعمل مع طريقة أو طريقتين لمنع الحمل، زي الـ SAFE PERIOD أو مع أي وسيلة تانية يختارها الزوجين مع بعض لمنع الحمل.
-
كنبة الليفنج
ودي الوسيلة الأكتر أمان على الإطلاق، واللي أمهات راحة بالي نصحوا بيها الأمهات اللي بتسأل عن أكتر وسيلة منع حمل آمنة، وما تسببش أعراض جانبية لا للراجل ولا للست.
وسائل منع الحمل غير الشائعة للرجال
-
حقن منع الحمل للرجال (منع هرموني)
الأطباء لقوا ان استخدام هرمون الأندروجين عن طريق الحقن، بيقلل عدد الحيوانات المنوية بدون أي تغييرات ذكورية تانية، وبتوصل فعاليته في منع الحمل حوالي 95٪، وأعراضه الجانبية قليلة. لكنه ممكن يستغرق من 3 لـ 4 شهور علشان يكون فعّال، ولما بتقف الحقن دي بترجع الحيوانات المنوية لعددها الطبيعي تاني.
-
حبوب منع الحمل للرجال (الجينداروسا)
وهي حبوب عشبية وغير هرمونية، وبتصنع من نبات جوستيسيا جينداروسا (Justicia gendarussa). آلية عمل حبوب الجينداروسا دي هي إعاقة عمل إنزيم موجود في رأس الحيوان المنوي، واللي بيضعف قدرته على اختراق البويضة. وبيقال أنها فعالة بنسبة 99% لو اسنخدمت بشكل صحيح، لكن مفيش أي دراسات مؤكدة بتثبت الكلام ده.
-
مثبط إنزيم البروتيز البربخي
مثبط إنزيم البروتيز البربخي، واللي بيعمل عن طريق الارتباط ببروتين موجود على سطح الحيوان المنوي، وده بيمنعه من الحركة والوصول إلى البويضة.
كانت دي الوسائل المعروفة والآمنة للرجال، وفي وسائل تانية برضه، بس مشكلتها إن عليها آراء شرعية ولازم تستخدم لضرورة طبية قصوى، لإن فيها أضرار صحية على الرجل.
ودلوقتي قولي لنا: هل ممكن جوزك يتسخدم وسائل منع الحمل بدالك؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
webteb.com
1 comment
ممكن شرح ازاي منع حمل عن طريق كنبه الليفنج