أنا من الناس العشاق جدًا للبطاطا، بحب جدًا ريحة شوي البطاطا في الفرن في الشتاء، بتدي إحساس دايمًا بالدفا وريحة حلوة جدًا للبيت. وعلى الرغم إن ناس كتير بتحب تشتري البطاطا من على العربيات في الشارع، إلا في الحقيقة هي سهل توافرها جدًا في الأسواق بجانب إنها رخيصة التمن جدًا. ولو إنتي عندك مساحة للتخزين، فالبطاطا بتتخزن زيها زي البصل. هاقول لك على 5 وصفات بالبطاطا هتدفيكي في الشتاء وحتى تنفع منها للدايت، وعلى فكرة الإبداع مع البطاطا مالوش حدود، يعني ينفع تتأكل في الحلو والحادق، اختاري اللي قلبها بيكون برتقالي اللون لو هتعملي وصفات حلو، واختاري اللي قلبها أبيض لو هتعملي وصفة حادق.

1. بطاطا حلوة بالبشاميل
2. صينية بطاطا بجوز الهند
3. شوربة بطاطا حلوة
4. بطاطا حلوة مشوية بالأعشاب للرجيم
5. بطاطا بدقيق جوز الهند

بطاطا حلوة بالبشاميل

طريقة عمل بطاطا حلوة بالبشاميل

 

مقادير البطاطا الحلوة بالبشاميل

– البطاطا الحلوة : 6 حبات مقشرة ومقطعة شرائح
–  5 ملاعق زبدة كبيرة
– 5 ملاعق دقيق كبيرة
– 3 أكواب لبن
– 150 جرام جبنة البيضاء
– 150 جرام جبن موزاريلا
– 100 جرام جبنة الماسكاربوني
– نص معلقة صغيرة ملح
– نص معلقة فلفل الأبيض
– ربع معلقة صغيرة قرفة مطحونة
– ربع معلقة صغيرة جوزة الطيب مطحونة
– الجوز: ثلاث أرباع الكوب (مفروم)

 

طريقة عمل البطاطا الحلوة بالبشاميل

1. سخني الفرن على حرارة 400 درجة.
2. ذوبي الزبدة في حلة على النار وبعد كدة خففي النار وضيفي الدقيق بالتدريج مع التحريك المستمر لحد ما يصبح الخليط زي العجين.
3. ضيفي اللبن بالتدريج مع التحريك لحد ما تتكون صلصة متماسكة وخفيفة.
4. ضيفي الجبن الأبيض والجبن الموزاريلا والملح والفلفل وقلبي لحد ما تذوب الأجبان.
5. ضيفي جبن الماسكربون وحركي لحد ما تصبح الصلصة كثيفة وضيفي الجوز المفروم والقرفة وجوزة الطيب.
6.  رصي طبقة من البطاطا الحلوة في طبق الفرن المدهون بالزبدة وبعد كدة طبقة من خليط البشاميل والجبن.
7. كرري العملية لعمل 3 طبقات أو أكثر حسب الرغبة مع إبقاء الطبقة الأخيرة على الوجه طبقة بشاميل.
8.  غلفي وجه الطبق بورق الفويل وأدخليه الفرن لمدة 45 دقيقة.
9.  اكشفي الوجه وحمريه لمدة 10 دقائق وقدميها ساخنة.

صينية بطاطا بجوز الهند

مقادير البطاطا بجوز الهند

– كيلو بطاطا حلوة
– كوباية ونص لبن
– كوباية ونص جوز الهند
– كوباية سكر
– نص كوبية قشطة
– نص كوب سمن
– نص معلقة صغيرة الفانيليا

طريقة عمل صينية بطاطا بجوز الهند

1. اغسلي البطاطا كويس وتسلقيها في ماء نظيف دون أي إضافات، وممكن تشويها في الفرن.
2. قشري البطاطا واهرسيها كويس لحد ما تنعم ويبقى قوامها زي البيوريه.
3. ضيفي اللبن والقشطة والسكر وجوز الهند والفانيليا والسمن واخلطي كويس لحد ما تنعم وتتجانس.
4. سخني الفرن على درجة حرارة 180 وادهني الصنية بالسمن.
5. صبي الخليط في الصنية ورشي فوقها جوز الهند.
6. دخليها الفرن لحد ما تستوي.
7. خرجيها من الفرن وسبيها تهدأ شوية.
8. زينيها بجوز الهند وبعد كدة قطعيها وقدميها.

شوربة بطاطا حلوة

طريقة عمل شوربة بطاطا حلوة

مقادير شوربة بطاطا حلوة

– 3 حبات بطاطا حلوة
– 3 حبات جزر
– 1 بصلة مفرومة
– 4 كوبايات مرق دجاج (شوربة)
– 2 فص ثوم
– نص معلقة صغيرة قرفة
– ربع معلقة صغيرة جوزة الطيب
– 50 جرام زبدة
– معلقة صغيرة ملح
– نص معلقة صغيرة فلفل أسود
– نص كوباية كريمة سائلة

طريقة عمل شوربة بطاطا حلوة

1. قشري البطاطا والجزر وقطعيهم مكعبات متوسطة الحجم.
2. دوبي الزبدة في حلة على نار منخفضة، وبعد كدة ضيفي البصل والثوم ووقلبيهم كويس.
3. ضيفي قطع البطاطا والجزر للبصل والزبدة وقلبيهم كويس لمدة 10 دقائق.
4. ضيفي مرق الدجاج، وكل البهارات (القرفة، جوزة الطيب، الفلفل الأسود والملح) مع التحريك، وبعد كدة غطي الحلة ويسبيها على نار متوسطة الحرارة لمدة نصف ساعة تقريباً.
5. بعد كدة طفي النار، ويهرس المزيج يا إما بالهاند بليندر أو الخلاط كهربائي لحد ما يصبح القوام سائل.
6. يضيفي الكريمة السائلة للشوربة مع التحريك لحد ما تتجانس جميع مكونات الشوربة، وتتقدم ساخنة.

بطاطا حلوة مشوية بالأعشاب للرجيم

طريقة عمل البطاطا الحلوة المشوية

مقادير البطاطا الحلوة المشوية

– معلقتين كبار زيت الزيتون
– 3 حبات بطاطا حلوة مقشرة ومقطعة لمكعبات متوسطة الحجم
– نص معلقة صغيرة من الزعتر المجفف
– نص معلقة صغيرة ملح
– نص معلقة صغيرة بقدونس مجفف
– نص معلقة صغيرة ريحان مجفف
– ربع معلقة فلفل أسود صغيرة

 

 

طريقة عمل البطاطا الحلوة المشوية

1.  سخني الفرن على حرارة متوسطة.
2. جهزي صينية فرن وبطنيها بورق الخبز وادهنيها بزيت الزيتون.
3. رصي البطاطا المقشرة في الصينية.
4. وزعي الزعتر والبقدونس والريجان والملح والفلفل وزيت الزيتون على مكعبات البطاطا وأدخليها الفرن لمدة ساعة لحد ما تستوي تماما
5.  قدميها ساخنة أو دافئة جنب فراخ أو اللحم حسب ما تحبي.

بطاطا بدقيق جوز الهند

بطاطا بدقيق جوز الهند

• الوصفة الأخيرة دي هي وصفتي أنا شخصيًا وهي سهلة جدا وتقريبًا مش بتحتاج مقادير، كل اللي باعمله إن دايما بيتفضل شوية بطاطا مشوية محدش أكلهم، وتسخينها بالنسبة لي مش محبب.
• كل اللي بعمله إني باقشرها وأعجنها كويس لحد ما قوامها يبقى زي البيوريه، وبعد كدة بضيف بيضتين أو تلاتة حسب الكمية اللي عندي، وبعد كدة بضيف أربع معالق كبار دقيق جوز هند معاهم معلقتين كبار دقيق لوز، لو مش عندك دقيق لوز مش مشكلة، وبعد كدة كيس فانيلا و6 أكياس سكر استيفيا، أو يعني حسب ما تحبيها مسكرة، وحوالي 50 جرام زبدة، ومعلقة بيكينج باودر صغيرة.
• كل ده تقلبيه مع بعض وممكن تحطي شوية قرفة لو بتحبيها، وعلى الفرن على طول لحد ما حواف الصنية تحمر حطيها تحت الشواية وتقدري تقدميها عليها قشطة.
• الوصفة دي تنفع لو بتعملي كيتو دايت أو لو كارب بس طبعا تحسبيها من سعراتك اليومية، أو حتى بتعاني من حساسية الجلوتين، وممكن تقلبي معاها مكسرات لو بتحبي الإحساس بالقرمشة.

وفي الآخر، باقول لك بالهنا والشفا.