وصفات بالشوفان لطفلك من 6 شهور لسنة

أول ما طفلك بيوصل للعمر المناسب لتناول الأكل الصلب، بتتحمسي جدًا وبتفضلي تجهزي وتحضري نفسك للمرحلة دي، وتبدأي تدوري على أكلات مناسبه عشان تقدميها لطفلك. على أد ما المرحلة دي جميلة وممتعة لكنها بتكون محيرة جدًا لأي أم جديدة، خصوصًا إن في بداية دخول الأكل الصلب لطفلك دايمًا بيكون مصحوب بشوية مشاكل منها مثلًا الإمساك. طيب بنسمع دايماً عن ناس بتنصح بـ وصفات بالشوفان لطفلك وده لأن الشوفان واحد من العناصر المهمة جدًا والمليانه بفوايد رهيبة لطفلك الرضيع، أهمها إنه بيقلل جدًا مشكله حدوث الإمساك وبيحسن عملية الهضم بشكل كبير لطفلك.

بوجه عام تقدري تدخلي الشوفان لطفلك من سن 6 شهور، مع بداية دخول الأكل الصلب، زي ما منظمة الصحة العالمية بتوصي بدخول الأكلات الصلبة من سن 6 شهور.

مدارس أخرى بتسمح بدخول الأكل الصلب لطفلك من سن 4 شهور، فتقدري كمان تدخلي الشوفان في السن ده بعد إستشارة الطبيب.

من أهم فوائد الشوفان لتغذية طفلك

• غني جدًا بالألياف وبالعناصر المهمة لنمو طفلك زي الحديد والزينك والماغنيسيوم وعناصر كتير بيحتاجها جسم طفلك للنمو غير الموجودة في لبن الأم.
• نسبة الألياف العالية في الشوفان بتساعد طفلك على الشبع، بدون ما يسبب أي مشاكل في الهضم أو يسبب غازات لطفلك.
• يعتبر الشوفان ملين طبيعي لطفلك لاحتوائه على نسبة عالية من الألياف، وبيقلل جدًا من حدوث الإمساك.
• الشوفان يحتوي على نسبة عالية من البروتين.
• الشوفان نادرًا ما بيسبب الحساسية، ويعتبر من المنتجات الخالية من الجلوتين وبيكون أساسي في تغذية أي طفل يعاني من حساسية الجلوتين بشرط التأكد من مصدرة وانه غير مخلوط بأي منتج يحتوي على الجلوتين.
• الشوفان سهل جدًا تطويعه في وصفات متنوعه لطفلك، وسهل جدًا طبخة وتقديمه بطرق متنوعة ومبتكرة.
• الشوفان مش مرتبط بمرحلة عمرية معينه، لكنه مهم ومفيد جدًا لأولادنا في كل مراحلهم العمرية ونقدر نقدمه بطرق مختلفة كتير مناسبه لسنهم.

 

إدخلي هنا عشان تعرفي إزاي تدخلي أكل صحي لأولادك خلال يومهم

وصفات بالشوفان لطفلك (من سن 6 شهور)

في المرحلة العمرية دي بيفضل إنك تستخدمي الشوفان السريع الطهي، أو دقيق الشوفان عشان الوجبة يكون قوامها ناعم وتكون سهلة التناول لطفلك.

لتحضير دقيق الشوفان في البيت، كل الي عليكي أنك تطحني الشوفان في محضرة الطعام لحد ما ينعم تمامًا. إحفظيه في برطمان محكم الغلق في مكان بارد وجاف بعيد عن الرطوبة، واستعمليه وقت الحاجه.

 

وصفة الشوفان مع التفاح والجزر

المقادير

• 1/4 كوب شوفان سريع التحضير أو دقيق الشوفان
• 1 كوب ماء
• 1/4 كوب جزر مبشور
• 1/4 كوب تفاح مبشور
• 1/4 معلقة صغيرة قرفة
• يمكن إضافة 3-4 ملاعق من حليب الأم أو الحليب الصناعي

 

طريقة الشوفان بالتفاح والجزر

• ضيفي الماء والشوفان في حلة صغيرة وارفعيهم على نار متوسطة مع التقليب المستمر.
• بعد ما يتقل قوام الشوفان ويبدأ في الغليان، ضيفي التفاح والجزر المبشور ورشة القرفة وسيبيهم على نار هادية لمدة 8-10 دقايق لحد ما يستوي الجزر والتفاح تمامًا.
• في المرحلة دي تقدري تخففي وجبة الشوفان بشوية من حليب الأم أو الحليب الصناعي.

 

 

وصفة الشوفان مع التمر

المقادير

• 1/4 كوب شوفان
• 1 كوب ماء
• 2 تمرة طرية
• رشة خفيفة من القرفة

 

طريقة الشوفان بالتمر

• في حلة على النار ضيفي التمر والميه وسيبيهم على نار متوسطة لحد ما تغلي الميه والتمر يطرى تمامًا.
• ضيفي الشوفان للميه والتمر وقلبي بإستمرار لحد ما يتقل القوام ويبقى كريمي.
• ضيفي رشة بسيطة من القرفة وقدميها.
• تقدري تخفي القوام ب3-4 معالق من حليب الأم أو الحليب الصناعي.
• تقدري تضربي كل المزيج في الخلاط أو بالمضرب اليدوي للتأكد من نعومته وذوبان التمر فيه.

 

وصفة الشوفان مع الخضراوات المشكلة

المقادير:

• 1/4 كوب جزر مكعبات
• 1/4 كوب كوسة مكعبات
• 1/4 كوب بطاطس أو بطاطا حلوة مكعبات
• قطعة صغيرة من الكرات
• 1/4 كوب شوفان
• 1 عود زعتر للنكهة (إختياري)
• 1 كوب ماء

 

طريقة الشوفان مع الخضروات

• في حلة على نار متوسطة ضيفي الماء وكل الخضراوات والزعتر الطازة وسيبيهم على النار لحد ما الخضراوات تستوي تمامًا.
• ضيفي الشوفان وقلبي باستمرار لمدة 8 دقايق لحد ما يتقل القوام .
• إهرسي المزيج بهراسة البطاطس لقوام خشن، أو اضربيه بالمضري اليدوي أو في محضرة الطعام لقوام أكثر نعومه.

 

وصفة الشوفان مع الموز

المقادير

• 1/4 كوب شوفان سريع الطهي
• 1 كوب ماء
• 1 موزة مهروسة

 

طريقة الشوفان مع الموز

• ضيفي الماء والشوفان في حلة صغيرة، وارفعيهم على نار متوسطة مع التقليب المستمر لحد ما يتقل ويبقى قوامه كريمي.
• صبي المزيج في طبق التقديم وسيبيه لحد ما يبرد ويبقى فاتر، وبعدها ضيفي الموز المهروس واخلطيهم كويس، وقدميه لطفلك فورًا.
• لا يفضل الإحتفاظ بالوجبه دي في التلاجه لإن لونها هيتغير بفعل الموز، يفضل تؤكل فورًا.

وصفات بالشوفان لطفلك (من سن 8 شهور)

وصفة الشوفان مع الفراولة والبطيخ (من سن 8 شهور فيما فوق)

المقادير:

• 1/2 كوب شوفان
• 3/4 كوب ماء
• 1 كوب فراولة مغسولة جيدًا ومقطعة
• 1 كوب مكعبات بطيخ منزوع منه البذور

 

الطريقة:

• في محضرة الطعام، أو باستخدام المضرب اليدوي قومي بهرس الفراولة والبطيخ لحد ما يبقوا مهروس ناعم.
• في حلة على النار ضيفي الشوفان مع الميه وقلبيهم لحد ما يتقل القوام .
• صبي مزيج الشوفان في بوله، لحد ما يبرد قليلًا، وضيفي له مهروس الفراولة والبطيخ لحد ما توصلي للقوام المناسب.
• أي باقي من مهروس الفراولة والبطيخ، احتفظي به في علبة محكمة الغلق في التلاجة لمدة 3 أيام.

 

أصابع أو أكواب الشوفان المخبوز

المقادير

• 1/2 كوب شوفان
• 1 بيضة (يمكن إستبدالها بمعلقة كبير من بذور الشيا أو موزة مهروسة في حالة وجود أي تحسس من البيض)
• 1/4 معلقة صغيرة قرفة
• 1/4 معلقة صغيرة فانيليا
• 2 معلقة كبيرة زبيب (يمكن إستبداله بتمر أو فواكه مجففه مقطعة قطع صغيرة للتحلية)
• 3/4 كوب حليب صناعي أو ماء (لو هتقدميها لطفل في عمر السنه أو أكبر إستخدمي حليب عادي)

 

الطريقة:

• في بولة ضيفي كل المكونات مع بعض واخلطيها كويس وسيبيها على جنب لمدة 10 دقايق عشان الشوفان يتشرب كل السوائل.
• وزعي المزيج في قوالب الكاب كيك أو أي قوالب من إختيارك أو حتى في صينية مربعة أو مستطيلة واخبزيها في الفرن على حرارة 180 لمدة 10-12 دقيقة.
• سيبيها تبرد قبل ما تقطعيها، أو تخرجيها من القوالب، وقدميها لطفلك وسيبيه ياكلها بإيده.

وصفات بالشوفان (من سن سنه فيما فوق)

إدخلي على اللينك ده عشان تعرفي طريقة تحضير وجبات مبتكرة لإبنك في عمر السنه

بانكيك بالبسلة حادق

المقادير:

• 1 كوب بسلة مجمدة
• 1/2 كوب شوفان
• 50 جم جبنة فيتا أو بارميزان مبشورة
• 1/2 كوب جبنه قريش
• 2 بيضة

 

الطريقة:

• إخلطي كل المكونات في محضرة الطعام.
• قومي بطهي البانكيك في طاسة غير لاصقة بمسحه من زيت الزيتون أو الزبدة.
• قدميها لطفلك في عمر السنه فيما فوق.

 

إدخلي هنا عشان تشوفي بالفيديو طريقة عمل بانكيك الموز والشوفان 

 

وصفة كرات الشوفان بالتفاح بدون خبز

المقادير

• 200 جم من التفاح المهروس المطبوخ (حوالي ثمرتين تفاح يسلق أو يطبخ على البخار)
• 1/2 كوب زبدة فول سوداني
• 1/2 كوب زبيب
• 2 كوب شوفان

 

الطريقة:

• إخلطي كل المكونات في محضرة الطعام لحد ما تتجانس.
• شكليها على شكل كرات وسيبيها في التلاجه لمدة 1/2 ساعة.
• قدميها لطفلك كسناك يتاكل بالإيد.
• يحفظ في التلاجه في علبه محكمة الغلق.

 

 

وصفة سموزي الموز والشوفان

المقادير:

• 1 حبه موز مستوي
• 1/4 كوب زبادي
• 1/4 كوب شوفان
• 1/2 معلقة صغيرة بذر كتان مطحون (إختياري)

 

الطريقة:

• إخلطي كل المكونات في الخلاط وتقدري تبرديها قليلا في التلاجه قبل تقديمها لطفلك.

 

تنويه مهم جدًا:

قبل ما تجربي أي وصفة من الوصفات السابقة، لازم تتأكدي إن طفلك لا يعاني من أي حساسية تجاه أي مكون من مكوناتها، وطبعًا تستشيري طبيبك.

 

المصادر:
mykidslickthebowl
who.int
parenting.firstcry

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك