6 وصفات بمكرونة “بينا” إيطاليانو غير المكرونة بالبشاميل

مش عارفة ليه حصروها في دور واحد مع إنها واحدة من أهم أشكال المكرونة اللي عرفها التاريخ، البينا تقدر تعمل كتير قوي مش بس مكرونة بالبشاميل زي ما أغلب البيوت المصرية بتطبخها، أي كيس مكرونة بينا ماما هتعمله بالبشاميل على طول معروفة يعني!

 

إيطاليانو النهارده جاية ترد للمكرونة البينا اعتبارها وتثبت إن البينا يطلع منها أطباق كتير قوي غير المكرونة بالبشاميل، مش معنى كده إن المكرونة بالبشاميل وحشة لا سمح الله! لكن البينا تقدر تكون بطلة أطباق ووصفات مختلفة ما تقلش عنها في اللذاذة والطعامة.

 

جيبنا لك النهارده 5 وصفات متنوعة بالمكرونة البينا من إيطاليانو هتخليكي تنوعي ما بينها وتعرفي قد إيه إن البينا مش لازم تكون بالبشاميل.

 

 

مكرونة بينا بصوص البوتانيسكا

المقادير

• 400 جم مكرونة بينا إيطاليانو
• 1 بصلة مفرومة ناعم
• 2 معلقة صغيرة توم مفروم
• 1 معلقة صغيرة رقائق الفلفل الأحمر الحار (أو شطة)
• زيت زيتون
• 3 شرايح من الأنشوجة
• 1/2 كوب حلقات زيتون أسود
• 1 كوب عصير طماطم
• 1 كوب مكعبات الطماطم الطازة
• 2 معلقة صغيرة زعتر ناشف
• 2 معلقة كبيرة كابري
• فلفل أسود
• أوراق البقدونس للتقديم

الطريقة

• اسلقي مكرونة بينا إيطاليانو في كمية وفيرة من المياه المضاف لها الملح حسب التعليمات المكتوبة على الغلاف وحافظي دايمًا على تسوية المكرونة Aldente، واحتفظي بكوب من مياه السلق على جنب.
• لتحضير صوص البوتانيسكا: في طاسة على النار، شوحي البصل والتوم في معلقتين من زيت الزيتون وضيفي عليهم الأنشوجة ورقائق الفلفل وحبات الكابري لحد البصل ما يبقى طري وشفاف.
• ضيفي عصير الطماطم ومكعبات الطماطم والزيتون ومياه السلق والزعتر الناشف وقلبيهم مع بعض وخلي الصوص يغلي.
• على نار هادية، غطي الطاسة وسيبي الصوص يطبخ لمدة 15 دقيقة عشان يتكثف وتندمج النكهات.
• ضيفي البينا للصوص وقلبيها معاه كويس وزيني بأوراق البقدونس مع رشة من الفلفل الأسود.

 

شوفي إزاي تخلي ولادك ياكلوا الخضار في المكرونة

 

 

مكرونة بينا مع الدجاج المشوي بصوص الكاجن الكريمي

المقادير

• 2 صدر دجاج مخلي
• 200 جم مكرونة بينا إيطاليانو
• 1/2 كوب جبنة بارميزان مبشورة
• 2 معلقة كبيرة بهارات الكاجن
• 1/2 كوب كريمة
• 2 معلقة كبيرة قشطة معلبة
• ملح وفلفل
• 1/2 معلقة كبيرة دقيق
• 1 معلقة صغيرة توم مفروم
• زبدة وزيت زيتون
• بقدونس مفروم ومكعبات طماطم للتقديم

الطريقة

• اسلقي مكرونة بينا إيطاليانو في كمية وفيرة من المياه المضاف ليها الملح حسب التعليمات المكتوبة على الغلاف، وحافظي دايمًا على تسوية المكرونة Aldente، واحتفظي بكوب من ميه السلق على جنب.
• تبلي صدور الفراخ بمعلقة كبيرة من بهارات الكاجن وفي طاسة قابلة لدخول الفرن، شوحي صدور الفراخ في شوية من الزيت والزبدة لحد ما تاخد لون جميل ودخليها الفرن ويكون متسخن تكمل تسويتها لمدة 10 دقايق.
• لتحضير الصوص: شوحي التوم المفروم في مكعبين من الزبدة لحد ما تطلع ريحته، ضيفي الدقيق وحمصيه لمدة دقيقة.
• ضيفي القشطة، الكريمة، مياه سلق المكرونة، ومعلقة كبيرة من بهارات الكاجن والفلفل الإسود وسيبي الصوص يغلي لحد ما يتقل على نار هادية.
• ضيفي المكرونة للصوص والجبنة البارميزان وقلبيها كويس وقدميها سخنة مع صدور الفراخ ومكعبات الطماطم والبقدونس على الوش.

 

إزاي تحضري الأكل في 15 دقيقة؟

 

 

سلطة المكرونة البينا الإيطالية

المقادير

• 200 جم مكرونة بينا إيطاليانو مسلوقة ومبردة
• 100 جم بيبيروني
• 1/2 كوب زيتون أسود مخلي
• طماطم شيري مقطعة أنصاص
• بصل أحمر مفروم
• فلفل أخضر وألوان مقطع مكعبات
• 1 فلفل أحمر حار (اختياري)
• 1/4 كوب جبنة بارميزان مبشورة
• 150 جم جبنة موتزاريلا فريش مقطعة مكعبات
• أوراق ريحان طازة

للدريسينج

• 2 معلقة صغيرة بيستو الريحان
• 1/4 كوب زيت زيتون
• 3 معالقة كبيرة خل العنب (أو خل أبيض)
• 1 فص توم مفروم
• 1 معلقة كبيرة مايونيز
• ملح وفلفل

الطريقة

• لتحضير الدريسينج، اخلطي كل مكوناته مع بعض في بولة أو رجيهم في برطمان.
• لتحضير السلطة اخلطي كل المكونات مع الباستا وضفي الدريسينج ويفضل تركها في التلاجة لمدة 2-3 ساعات عشان كل الأطعمة تتداخل وتحصلي على أفضل نكهة للسلطة.

 

5 أطباق مكرونة العيلة كلها هتحبها

 

 

البينا مع الكوسة المشوية وصلصة البيستو

المقادير

• 400 جم مكرونة بينا إيطاليانو
• 4 ثمرات كوسة مقطعة دواير
• 2 معلقة كبيرة صوص البيستو الجاهز
• 1/2 كوب كريمة حامضة
• 1 معلقة توم مفروم ناعم
• زيت زيتون
• 1/4 كوب جبنة بارميزان مبشورة
• صنوبر أو لوز محمص للتقديم
• عصير ليمون
• ملح وفلفل

الطريقة

• إسلقي مكرونة بينا إيطاليانو في كمية وفيرة من الميه المضاف لها الملح حسب التعليمات المكتوبة على الغلاف وحافظي دايمًا على تسوية المكرونة Aldente، واحتفظي بكوب من ميه السلق على جنب.
• لشوي الكوسة: تبلي شرايح الكوسة بزيت الزيتون والملح والفلفل واشويها في صينية للفرن لحد ما تاخد لون ذهبي.
• لعمل الصوص: شوحي التوم المفروم في كمية وفيرة من زيت الزيتون وضيفي صلصة البيستو والكريمة ومياه سلق المكرونة وسيبي الصوص يغلي ويتكثف.
• ضيفي شرايح الكوسة المشوية والبينا وعصير الليمون وقدميها سخنة مع الجبنة البارميزان والصنوبر أو اللوز المحمص.

 

 

طريقة عمل المكرونة بالبشاميل

 

 

مكرونة البينا بالدجاج والكريمة

المقادير

• 400 جم مكرونة بينا إيطاليانو
• 4 معالق زبدة
• 2 صدر دجاج مخلي
• 2 فص توم مفروم
• 3/4 كوب شوربة دجاج
• 3/4 كوب كريمة طهي
• 3/4 كوب جبنة مبشورة
•  بقدونس مفروم للتقديم

الطريقة

• اسلقي مكرونة بينا إيطاليانو في كمية وفيرة من المياه المضاف لها الملح حسب التعليمات المكتوبة على الغلاف و،حافظي دايمًا على تسوية المكرونة Aldente، واحتفظي ب1/2 كوب من مياه السلق على جنب.
• تبلي صدور الدجاج بالملح والفلفل وشوحيها في معلقتين كبار من الزبدة لحد ما تاخد لون من الجانبين، ارفعيها وقطعيها مكعبات أو شرايح.
• ضيفي معلقتين من الزبدة في نفس الطاسة وشوحي التوم وضيفي عليه الشوربة والكريمة ومياه السلق وسيبي المزيج لحد ما يغلي ويتكثف ويتقل قوامه.
• ضيفي الجبنة والفراخ للصوص وسيبيها لمدة 5 دقايق تتشرب النكهات.
• ضيفي المكرونة وقدميها سخنة مع مزيد من الجبنة والبقدونس.

 

 

مكرونة بينا بالجمبري والبقدونس

المقادير

• 400 جم مكرونة بينا إيطاليانو
• 4 فصوص توم مفرومين
• 1 حزمة بقدونس
• 3 مكعبات زبدة
• 500 جم جمبري مقشر
• ملح وفلفل
• 1/2 معلقة صغيرة شطة
• عصير ليمون
• بشر ليمون
• كابري للتقديم (اختياري)

الطريقة

• اسلقي مكرونة بينا إيطاليانو في كمية وفيرة من المياه المضاف لها الملح حسب التعليمات المكتوبة على الغلاف، وحافظي دايمًا على تسوية المكرونة Aldente، واحتفظي ب1/2 كوب من مياه السلق على جنب.
• في طاسة على النار ضيفي الزبدة وشوحي التوم مع الجمبري وتبلي الجمبري بالملح والفلفل والشطة لحد ما يتغير لونه.
• ضيفي عصير الليمون ومياه السلق والبقدونس المفروم وقلبي لحد ما يستوي الجمبري تمامًا.
• ضيفي المكرونة للصوص وقدميها سخنة مع بشر الليمون وحبات الكابري.

 

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك