المشمشية والقراصيا، التين المجفف والزبيب والتمر، كل الأنواع دي من ياميش رمضان في مننا بيشتريها وفي بتجي له هدايا ومعايدات من الأهل أو القرايب، أغلبنا بيعمل بيه خشاف بس، أو يكسر صيامه عليه، أو هياكله كنقنقة بين الفطار والسحور. بس ليه عمرنا ما فكرنا بره الصندوق؟! يعني نعمل وصفات جديدة وصفات جديدة بالياميش ونغير شوية.
الياميش من الحاجات المفيدة جدًا وإللي طعمها حقيقي لذيذ ومميز، وكمان نقدر نستخدمه بشكل مختلف تمامًا مش بس للخشاف، يعني مثلًا عمرك فكرتي تضيفي تين مجفف للسلطة؟ أو تضيفي قراصيا لطواجن اللحوم والفراخ؟ أو فكرتي تمزجي أكتر من نوع مع بعض وتحوليهم لحشوة لذيذة للقطايف أو الكنافة مثلًا؟!
النهارده، هنخرج مع بعض بره المألوف وهنشارك معاكي مجموعة أفكار جديدة وصفات جديدة بالياميش وكالعادة سهلة في تنفيذها جدًا عشان تستغلي فيها كل الياميش بأنواعه المختلفة وتستمتعي بطعمه وفوايده، وكفاية علينا كده خشاف، تعالوا نشوف مع بعض الياميش في ثوبه الجديد.
صدور فراخ محشية بالمشمشية وعين الجمل
ياميش رمضان – المصدر: rockrecipes
المقادير
- 4 صدور فراخ مخلية (بدون الجلد والعظم)
- 1 كوب مشمشية مفرومة ناعم
- 1/2 كوب عين جمل مجروش
- 1 بصلة مفرومة ناعم
- 3 فص توم مفروم
- 1/4 كوب كزبرة خضراء
- 2 معلقة كبيرة عصير ليمون
- 1/2 كوب عصير برتقان
- 1/2 كوب مرقة دجاج
- 2 معلقة صغيرة بابريكا
- ملح وفلفل
- زبدة وزيت زيتون
طريقة عمل صدور الفراخ المحشية بالمشمشية وعين الجمل
- باستخدام سكين حاد، قومي بعمل شق أو جيب في كل قطعة من صدور الفراخ، عشان تكون جاهزة للحشو.
- تبلي الفراخ بعصير الليمون والملح والفلفل والبابريكا وسيبيها على جنب لحد ما تجهزي الحشوة.
- في طاسة على نار متوسطة، شوحي البصل المفروم في الزبدة وزيت الزيتون لحد ما يصفر، ضيفي بعدها التوم المفروم، والمشمشية وعين الجمل وشوحيهم.
- تبلي الحشوة بالملح والفلفل، واطفي النار وضيفي الكزبرة الخضراء، سيبي الحشوة تبرد تمامًا.
- قومي بتوزيع حشوة المشمشية على صدور الفراخ، واستخدمي خلة الأسنان علشان تقفليها.
- في طاسة على نار عالية، شوحي صدور الدجاج بحرص من كل جانب لحد ما تاخد لون دهبي.
- ضيفي عصير البرتقان ومرقة الدجاج ودخلي الطاسة الفرن على حرارة 200 لمدة 20 دقيقة أو لحد ما الفراخ تستوي تمامًا.
- قدميها مع الرز الأبيض وزينيها بأوراق الكزبرة الخضراء.
شعيرية محمرة بالياميش والمكسرات
وصفات جديدة بياميش رمضان – المصدر: whensuecooks
المقادير
- ٢ كوب شعيرية
- ٢ كوب مرقة دجاج أو خضراوات
- ملح
- فلفل أسود
- بصلة متوسطة مبشورة
- ٢ حبة مستكة
- كوب مشمشية وقراصيا مقطعة مكعبات صغيرة
- مكسرات للتزيين
- كزبرة خضرا للتزيين
- سمن بلدي
طريقة عمل شعيرية محمرة بالياميش والمكسرات
- يسخن السمن على النار مع المستكة حتى تذوب تمامًا.
- نضيف البصل المفروم ورشة ملح ونشوّحه لحد ما يصفر لونه.
- نضيف نصف كمية الفواكه المجففة ونشوّحها في السمنة لحد ما تبقى طرية.
- نرفع البصل والفواكه المجففة من الحلة ونسيبهم في طبق جانبي.
- نضيف المزيد من السمن، ونشوّح الشعيرية مع التقليب المستمر للحصول على لون ذهبي.
- نرجع البصل والفواكه المجففة إللي شوحناهم للحلة تاني مع الشعيرية، ونضيف المرقة بحيث تغطي سطح الشعيرية فقط.
- نضيف ملح وفلفل أسود للشعيرية ونغطيها، ونهدي النار تمامًا لحد ما تستوي وتفلفل.
- نزينها بباقي الفواكه المجففة وتتقدم كطبق جانبي لذيذ مع أصناف اللحوم والفراخ.
طريقة عمل فطاير الياميش المقلية (على طريقة شيف منال العالم)
وصفات جديدة بالياميش – المصدر: asweetspoonful
المقادير
للعجينة
- 2 كوب دقيق
- 1/2 كوب سمنة
- 1/8 معلقة صغيرة ملح
- 2 بيضة
- 1 معلقة صغيرة فانيليا
- 2 معلقة صغيرة حليب
للحشوة
- 1/2 كوب مشمشية مفرومة
- 1/2 كوب زبيب
- 1 معلقة كبيرة سكر
- 1 معلقة كبيرة ماء ورد
للتقديم:
سكر بودرة
طريقة عمل فطاير الياميش المقلية
- العجينة: في وعاء الخلاط، ضعي الدقيق، السمن، الملح، البيض، الفانيليا والحليب.
- ثبتي مضرب التقليب، شغلي الخلاط على سرعة متوسطة إلى أن تتكون عجينة ناعمة ومتماسكة.
- على رخامة المطبخ، رشي شوية دقيق، ضعي العجينة وضعي عليها قطعة من ورق الزبدة.
- اضغطي بخفة على العجينة. ثم باستخدام النشابة، مدّي العجينة إلى أن تصبح بسماكة ٤ ملم تقريبًا.
- الحشو: في قدر متوسط سميك القاعدة ضعي المشمشية، الزبيب، السكر وماء الورد، ارفعيهم على نار متوسطة لحد ما تلين المشمشية وتصبح طرية، سيبي الحشو يبرد تمامًا.
- باستعمال قطاعة بسكويت مستديرة متوسطة المقاس قطعي العجينة إلى دوائر، بحيث يكون عندك عدد زوجي من الدوائر.
- خذي دائرة من العجينة وامسحي حوافها بقليل من الماء، ضعي كمية مناسبة من الحشوة، واقفلي بدائرة تانية من العجينة واضغطي على الحواف بإحكام، واستعيني بشوكة عشان تقفليها كويس.
- في طاسة عميقة، ضعي مقدار من الزيت بحيث يكون بارتفاع ٢ بوصة تقريبًا، ضعي المقلاة على نار متوسطة إلى أن يسخن الزيت تمامًا.
- في مقلاة عميقة، ضعي مقدار من الزيت بحيث يكون بارتفاع ٢ بوصة تقريبًا. ضعي المقلاة على نار متوسطة إلى أن يسخن الزيت.
- ضعي عدة قطع من الفطائر في الزيت، استني دقائق لحد ما يبقى لونها ذهبي، وطلعيها على قطعة من ورق المطبخ لتتشرب الزيت الفائض.
- رشيها بالسكر الناعم وقدميها.
ادخلي هنا عشان تعرفي طريقة عمل الكنافة بالكريمة
وصفات جديدة بالياميش – طاجن لحمة بالقراصيا
وصفات جديدة بياميش رمضان – المصدر: myheartbeets
المقادير
- 1/2 كيلو لحم موزة بقري
- 1 كوب قراصيا بدون بذر
- 1 بصلة كبيرة مفرومة ناعم
- 1 معلقة كبيرة دقيق
- 1 معلقة كبيرة صلصة طماطم
- 1 معلقة كبيرة سكر
- ملح وفلفل
- 1 معلقة صغيرة سبع بهارات
- 1 معلقة صغيرة قرفة
- 1/2 معلقة صغيرة كركم
- 1/2 معلقة صغيرة جنزبيل مطحون
- 2 ورق لورا
- زبدة وزيت زيتون
- 1 لتر مرقة لحم
طريقة عمل طاجن اللحمة بالقراصيا
- في حلة على نار عالية، شوحي قطع اللحمه في الزبدة وزيت الزيتون وضيفي كل البهارات أثناء التشويح.
- ضيفي البصل المفروم والتوم وشوحيهم مع اللحمة، ضيفي القراصيا والسكر، الصلصة والدقيق وشوّحي كل المكونات على نار متوسطة وضيفي زبدة وزيت زيتون لو احتاجتي أثناء التشويح.
- ضيفي مرقة اللحم لحد ما تغطي سطح المكونات تمامًا، غطي الحلة وسيبي المكونات تغلي.
- بعد الغليان، صبي كل المكونات في طاجن للفرن وغطيه ودخليه الفرن على حرارة 180 لحد اللحمة ما تستوي تمامًا.
- زيني بالبقدونس وقدميه.
لو بتجهزي نفسك لمشتروات رمضان، ادخلي على اللينك ده عشان تعرفي أهم 6 حاجات لازم تشتريهم قبل رمضان
سلطة الجرجير بالتين المجفف والخل البلسمي
وصفات جديدة بالياميش – المصدر: allfoodchef
المقادير
- حزمة جرجير
- أوراق الخس
- 1/2 كوب طماطم شيري
- 1/4 كوب شرايح البصل الأحمر
- 1/2 كوب تين مجفف
- جبنة بارميزان
للدريسينج:
- ملح وفلفل
- 2 معلقة كبيرة خل بلسمي
- 1/4 كوب زيت زيتون
- 2 معلقة صغيرة عسل أبيض
- 1 فص توم مهروس
الطريقة:
- اخلطي كل مكونات الدريسينج في برطمان ورجيه كويس لحد ما تتجانس.
- رصي كل مكونات السلطة في طبق التقديم وزيني بالجبنة البارميزان المبشورة وصبي الدريسينج مباشرة قبل التقديم.
- تقدري كمان تستبدلي البارميزان بالجبنة الحلوم المشوية حسب رغبتك.
ادخلي على اللينك ده عشان تعرفي طريقة عمل أشهر المشروبات الرمضانية في البيت
التعليق باستخدام حساب فيس بوك