محتويات المقال
أحلى حاجة في رمضان 2021 إنه جاي في فصل الربيع، يعني هنستمتع بالصيام في توقيت من أحلى توقيتات السنة، جو معتدل نسبيًا وعدد ساعات صيام مريح. عشان كده، الحلويات الباردة بدون فرن هتكون مناسبة جدًا للتحلية بعد الصيام. حتى لو هتقومي بخطوات بسيطة على البوتجاز. الأنواع دي من التحلية سهلة جدًا في تحضيرها، ومنعشة ومناسبة لأجواء الربيع الجميلة. أفكار كتير قوي بره الصندوق ممكن تكون حلويات رمضانية باردة ولذيذة، مش لازم يعني كنافة وبسبوسة وحلويات شرقية. هتشوفي في المقال ده حلويات رمضانية باردة سهلة جدًا، وجديدة، اختاري منها إللي يناسبك وقولي لنا رأيك.
كل سنة وانتي طيبة ومستمتعه برمضان ربيعي جميل.
ادخلي هنا عشان تعرفي 6 طرق لعمل الكنافة في رمضان
ولو بتحبي الحلويات السهلة، ادخلي هنا عشان تعرفي 3 وصفات لحلويات باردة بدون فرن
كاسات شيز كيك الكنافة بالفواكه
حلويات رمضانية باردة – المصدر: ilovearabicfood
مقادير كاسات شيز كيك الكنافة بالفواكه
لطبقة الكنافة:
- 400 جم كنافة (يفضل تكون مفرزة)
- 200 جم زبدة مذوبة
- 1/4 كوب سكر بودرة
لطبقة الشيز كيك:
- 350 جم جبن كريمي (في حرارة الغرفة)
- 100 جم كريمة حامضة (ممكن استبدالها باللبنة)
- 2 مغلف بودرة الكريم شانتيه
- 1/2 كوب سكر بودرة
- 100 مل كريمة خفق سائلة
- 1 معلقة صغيرة فانيليا
لطبقة الفواكه
- فواكة مشكلة (طازة أو معلبة)
- فستق حلبي لتزيين الوجه
طريقة عمل كاسات شيز كيك الكنافة بالفواكه
- في طاسة واسعة على النار، حمري الكنافة في الزبدة مع التقليب المستمر لحد ما توصلي للون دهبي، سيبيها تبرد تمامًا في طبق جانبي.
- حضري تشكيلة من الفواكه المفضلة ليكي وقطعيها مكعبات صغيرة.
- حضري خليط الشيز كيك، بإنك تخلطي كل المكونات مع بعض بالمضرب الكهربائي لحد ما تتجانس كل المكونات.
- في أكواب أو كاسات فردية، أو في بولة كبيرة، كوني طبقات من الكنافة والفواكه وكريمة الشيز كيك وزيني الوجه بالفواكه والفستق الحلبي المجروش.
- سيبي شيز كيك الكنافة في التلاجة لمدة 3-4 ساعات قبل التقديم.
ادخلي على اللينك ده عشان تعرفي طريقة عمل الكنافة بالقشطة
أرز باللبن مع الياميش
حلويات رمضانية باردة – المصدر: sanjeevkapoor
مقادير الأرز باللبن بالياميش
لعمل الأرز باللبن
- 3 أكواب لبن حليب كامل الدسم
- 1/2 كوب رز مصري بدون غسيل
- 1/2 كوب سكر أبيض
- 1/4 كوب قشطة بلدي
- 1 معلقة صغيرة ماء ورد
لطبقة الياميش:
- 1/2 كوب مشمشية مقطعة مكعبات
- 1/2 كوب قراصيا مقطعة مكعبات
- 1/2 كوب تين مجفف مقطع مكعبات
- 1/4 كوب زبيب
- 2 كوب عصير برتقان
طريقة عمل الأرز باللبن بالياميش
- لتحضير الياميش، قومي بنقع المكونات في عصير البرتقان لمدة ساعتين، يترك جانبًا لحين الاستخدام.
- لعمل الرز باللبن: في حلة على النار، اسلقي الرز غير المغسول في كمية وفيرة من الماء، لحد ما يستوي تمامًا ويتشرب أغلب كمية الماء.
- ضيفي اللبن البارد، والسكر للرز المسلوق وقلبي باستمرار لحد ما يتقل قوام الرز باللبن نسبيًا بفعل النشا الموجود في الرز نفسه.
- ذوبي النشا في معلقتين من الحليب البارد وضيفيه للرز وقلبي باستمرار لحد ما يسمك القوام، اطفي النار وضيفي ماء الورد وبكده الرز باللبن جاهز.
- صفّي الياميش تمامًا من أي بقايا من عصير البرتقان، ووزعيه في كاسات زجاجية فردية بالتساوي.
- صبي الرز باللبن فوق الياميش، دخليه التلاجة لمدة 4 ساعات على الأقل، ويقدم بارد.
ترايفل قمر الدين
حلويات رمضانية باردة – المصدر: youtube
مقادير ترايفل قمر الدين
لتحضير المهلبية بالحليب:
- 3 أكواب حليب كامل الدسم
- 2 باكيت فانيليا
- 1/2 كوب سكر أبيض
- 2 معلقة كبيرة نشا مذوبة في معلقتين لبن بارد
- كيك فانيليا جاهز مقطع مكعبات
- مهلبية قمر الدين (ادخلي على اللينك ده عشان تعرفي طريقة تحضير مهلبية قمر الدين)
- مكسرات للتزيين
طريقة عمل ترايفل قمر الدين
- لتحضير المهلبية بالحليب: ارفعي الحليب على النار في حل لحد ما يبدأ يغلي، بعدها ضيفي السكر والنشا المذوبة في الحليب البارد، وقلبي باستمرار لحد ما يتقل القوام.
- حضري مهلبية قمر الدين (الوصفة في اللينك السابق).
- في أكواب أو كاسات كوني طبقة من الكيك وصبي فوقها مهلبية الحليب ودخليها التلاجة أو الفريزر لحد ما تتماسك.
- خرجي الكاسات من التلاجة، وصبي عليها طبقة من مهلبية قمر الدين ودخليها التلاجة للمرة التانية عشان تتماسك.
- زيني كاسات الترايفل بالمكسرات وقدميها باردة.
ليالي لبنان (على طريقة شيف غادة التلي)
حلويات رمضان باردة – المصدر: tasteatlas
مقادير ليالي لبنان
- 6 أكواب لبن حليب
- 5 معالق كبيرة سميد ناعم
- 3 معالق كبيرة نشا
- 1/3 كوب سكر
- 1 معلقة كبيرة ماء زهر
- 1 معلقة كبيرة ماء ورد
- 3 حبة مستكة
للوجه:
- قشطة طازة – مكسرات – شربات – موز شرايح
طريقة عمل ليالي لبنان
- ذوبي النشا والسميد والسكر في اللبن البارد وضعيهم على النار حتى يثقل القوام.
- في الهون، دقي حبات المستكة مع القليل من السكر لحد ما تبقى ناعمة.
- ضيفي ماء الورد ثم ماء الزهر واستمري في التقليب ثم ضيفي المستكة وقلبيهم.
- صبي مهلبية السميد في قالب، ثم اتركيه بالثلاجة حتى يتماسك وبعد التماسك زينيه بالقشطة والشربات والمكسرات.
التعليق باستخدام حساب فيس بوك