وصفات خضروات مجمدة سهلة وسريعة وصحية

أكياس الخضراوات المجمدة من أكتر المنتجات اللي هتلاقيها موجودة في عربية السوبر ماركت لأي ست أو أم، كلنا بنشتريها لإنها بتنجز معانا وبتقذنا في أوقات صعبة كتير. مغسولة ومتنضفة وجاهزة للطهي، كل ما عليكي إنك تفتحي الكيس وتضيفيه لأكلاتك بكل بساطة. عشان كده النهارده جيبنا لك مجموعة وصفات مبتكرة وجديدة وكمان سريعة عشان تستخدمي فيها الخضراوات المجمدة الموجودة عندك في الفريزر وتحضري منها وجبة متكاملة. مش شرط إننا نقدمها بس مطبوخة بصوص الطماطم، لكن في طرق تانيه كتير تقدري تقدمي بيها الخضراوات المجمدة لعيلتك نتمنى تجربيها وتعجبك.

 

كاري الدجاج بالبسلة والجزر

 

 

المقادير

• 1/2 ك صدور الدجاج مقطعة مكعبات
• 1 كوب بسلة وجزر مجمدين
• 2 معلقة صغيرة كاري
• 1 معلقة صغيرة كركم
• 1 بصلة صغيرة مفرومة ناعم
• 2 فص توم مفروم ناعم
• 1 معلقة صغيرة جنزبيل مفروم ناعم
• 1 كوب مرقة دجاج
• 1 معلقة كبيرة دقيق
• 1 كوب كريمة طهي
• ملح وفلفل
• زبدة وزيت نباتي

 

طريقة عمل كاري الدجاج بالبسلة والجزر

• تبلي مكعبات الدجاج بمعلقة من الكاري والملح والفلفل، وشوّحيهم في زيت نباتي لحد ما ياخدوا لون دهبي، ارفعيهم في طبق جانبي.
• ضيفي مكعبين من الزبدة وشوحي البصل والتوم والجنزيبل لحد ما تظهر ريحتهم، ضيفي معلقة الدقيق وقلبيها لحد ما تختفي وتمتزج مع البصل.
• ضيفي المرقة وقلبي كويس، ضيفي الكاري والكركم وسيبي المزيج يغلي على نار هادية لحد ما يتقل القوام.
• رجعي الفراخ للطاسة، وضيفي البسلة والجزر المجمد وقلبي كل المكونات، سيبي المزيج يغلي لحد ما تستوي الخضراوات تمامًا.
• ضيفي الكريمة، والملح والفلفل، وقدمي الطبق مع الرز الأبيض.

 

 

شوربة البروكلي الكريمية

 

 

المقادير

• 1 كيس بروكلي مجمد
• 1و 1/2 كوب مرقة دجاج أو خضار
• 1 معلقة كبيرة دقيق
• 1/2 كوب كريمة طهي
• 1 بصلة صغيرة مفرومة
• ملح وفلفل
• زبدة وزيت نباتي
• 1/2 معلقة صغيرة جوزة الطيب

 

طريقة عمل شوربة البروكلي الكريمية

• في حلة على النار، ضيفي معلقة من زيت الزيتون ومكعب من الزبدة وشوحي فيهم البصل المفروم لحد ما يبقى شفاف اللون.
• ضيفي البروكلي المجمد وشوحيه مع البصل.
• ضيفي معلقة الدقيق وقلبيها مع المكونات لحد ما تختفي.
• ضيفي المرقة والملح والفلفل، وسيبي الشوربة على نار هادية لحد ما يستوي البروكلي.
• اضربي الشوربة بالمضرب اليدوي أو الخلاط، وضيفي الكريمة وجوزة الطيب، وقدميها.

 

 

صدور الفراخ المحشية بالسبانخ المجمدة والجبنة الكريمي

 

 

المقادير

• 4 صدور دجاج كاملة مخلية من العظم والجلد
• 1 كيس سبانخ مجمدة
• 1/2 كوب جبنة موتزاريلا
• 1/2 كوب جبنة كريمي
• 1 بصلة مفرومة ناعم
• 4 فصوص توم مفرومين
• ملح وفلفل أسود
• عصير نص ليمونة
• 1 معلقة صغيرة جوزة الطيب
• زبدة وزيت زيتون

 

طريقة عمل صدور الفراخ المحشية بالسبانخ المجمدة والجبنة الكريمي

• باستخدام سكينة حادة، قومي بعمل جيب لكل صدر دجاج بدون ما تفصليه، عشان تقدري تحشيه بحشوة السبانخ.
• تبلي صدور الدجاج بالملح والفلفل وجوزة الطيب، وسيبيها على جنب لحد ما تحضري الحشوة.
• فكي السبانخ تمامًا من التجميد، واعصريها في مصفاة أو فوطة مطبخ عشان تتخلصي من كل السوايل الموجودة فيها.
• في طاسة على النار، ضيفي معلقة من زيت الزيتون ومكعبين من الزبدة وشوحي البصل والتوم لحد ما تطلع ريحتهم.
• ضيفي السبانخ وقلبيها لحد ما تذبل، ضيفي لها الملح والفلفل وعصير الليمون، ما تسيبيش السبانخ على النار فترة طويلة، بس تشويحة خفيفة.
• بعد ما تبرد السبانخ تمامًا، ضيفي لها الأجبان واخلطي كل مكونات الحشوة مع بعض.
• قومي بحشو صدور الدجاج، واقفليها كويس باستخدام خلة الأسنان.
• في طاسة قابلة لدخول الفرن، شوحي صدور الفراخ في زيت الزيتون ومكعب من الزبدة لحد ما تاخد لون دهبي جميل.
• دخلي الطاسة الفرن على حرارة 200 لمدة 10-15 دقيقة أو لحد ما تستوي الصدور تمامًا.
• سيبيها تبرد شوية وبعدين قطعيها بالسكينة وقدميها.

 

 

سلطة المكرونة بالخرشوف والطماطم المجففة

 

 

المقادير

• 1 كيس مكرونة (اختاري الشكل اللي تحبيه)
• 1 كيس خرشوف مجمد
• 1/2 كوب بصل أخضر مقطع
• 1/2 كوب بقدونس مقروم
• 1/2 كوب طماطم مجففة مقطعة شرايح طولية
• 1/2 كوب جبنة بارميزان مبشورة أو شرايح رفيعة
• ملح وفلفل أسود
• 2 معلقة كبيرة حبوب الكابري (اختياري)
• زيت زيتون

 

لعمل الدريسينج

• 2 معلقة كبيرة عصير ليمون
• 1 معلقة كبيرة خل بلسمي
• 1/2 كوب طماطم مجففة
• 1/2 كوب زيت زيتون
• 2 فص توم مهروس
• 1 معلقة صغيرة مستردة ديجون
• 1 معلقة صغيرة عسل أبيض
• 1 معلقة صغيرة زعتر ناشف
• ملح وفلفل

 

طريقة عمل سلطة المكرونة بالخرشوف والطماطم المجففة

• اسلقي المكرونة وصفيها وسيبيها تبرد تمامًا.
• فكي تجميد الخرشوف، وقطعيه شرايح رفيعة.
• في طاسة على النار، شوحيه في معلقة من زيت الزيتون والملح والفلفل.
• اخلطي كل مكونات الدريسينج مع بعض في برطمان ورجيه كويس.
• اخلطي كل مكونات السلطة، وضيفي الدريسيبنج وقدميها.

 

 

فطيرة الدجاج بالخضراوات المجمدة المشكلة

 

المقادير

• 1/2 كيلو صدور دجاج مقطعة مكعبات صغيرة
• 1 كيس خضراوات مجمدة مشكلة
• زبدة
• 2 معلقة كبيرة دقيق
• 2 كوب مرقة دجاج
• 1/2 كوب كريمة
• بصلة مفرومة ناعم
• 2 فص توم مفروم
• 1/4 كوب كرفس مفروم
• ملح وفلفل أسود
• 1/2 معلقة جوزة الطيب
• عجينة باف بيستري مجمدة
• 1 صفار بيضة مع 2 معلقة كبيرة لبن ورشة فلفل أسود لدهن الوجه

 

طريقة عمل فطيرة الدجاج بالخضراوات المجمدة المشكلة

• في طاسة على النار، شوحي البصل في الزبدة والزيت لحد ما تصفر، ضيفي التوم المفروم وشوحيه.
• ضيفي قطع الفراخ وشوحيها مع البصل والتوم لحد ما تغير لونها، ضيفي الخضروات المجمدة.
• قلبي كل المكونات مع بعض على نار عالية، وضيفي الملح والفلفل وجوزة الطيب.
• ضيفي معلقتين كبار من الزبدة ومعلقتين كبار من الدقيق، وقلبيهم كويس لحد ما تختفي الكمية تمامًا.
• ضيفي المرقة والكريمة وسيبي المزيج يغلي على نار هادية لحد ما يسمك القوام.
• برشة خفيفة من الدقيق على رخامة مطبخك، افردي عجينة الباف بيستري وهي باردة قليلًا لسمك 1 سم.
• صبي مزيج الفراخ والخضار في صينية أو بايريكس للفرن وغطيه بعجينة الباف بيستري، ادهنيها بخليط صفار البيض.
• دخلي الفطيرة الفرن على حرارة 200 لمدة 1/2 ساعة لحد ما تنتفخ العجينة وتكتسب لون دهبي جميل.

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك