محتويات المقال
من أكتر الممرات اللي بحبها في السوبر ماركت وواثقة إن كتير زيي بيحبوها هو ممر الحلويات والبسكوتات، ما أقدرش أخرج من السوبر ماركت من غير ما اعدي عليه وأتسوق منه. وأول ما باعدي جنب مغلفات بسكوت اوريو، ما باقدرش أقاوم ولازم أشتري منها واحتفظ بيها عندي، أصل اوريو مش مجرد بس بسكوتة ونقنقة لذيذة ناكلها قدام التليفزيون، لكن اوريو بالنسبة لي كشيف مكون دايمًا بيخليني أفكر إزاي ممكن أدخلّه في وصفات مختلفة وجديدة عشان ابتكر واستمتع. وطبعًا احنا كأمهات بنحب دايمًا نحقق المعادلة الصعبة وهي إننا نلبّي رغبات أولادنا ونقدم لهم الحلويات اللي بيحبوها وفي نفس الوقت نعمل وصفات سهلة وبمكونات بسيطة وأهم حاجة إنها تكون سريعة ومبتكرة. عشان كده النهارده هنقدم لك خمس وصفات متنوعة باستخدام بسكوت اوريو الغني اللي حقيقي مصدر إلهام لكل أم عشان تعمل أطعم حلويات.
وصفة الأيس كريم البيتي بالزبادي والاوريو
بسكوت أوريو. المصدر biggerbolderbaking
المقادير
- 1 كوب زبادي يوناني
- 1/2 كوب جبنة كريمي في حرارة الغرفة
- 3 معالق كبيرة عسل أبيض
- 2 معلقة صغيرة فانيليا سايلة
- 10 قطع كاملين من بسكوت اوريو
الطريقة
- في محضرة الطعام، اخلطي الزبادي والجبن الكريمي والعسل والفانيليا، اضربيهم مع بعض كويس لحد ما يبقى قوامهم كريمي.
- حطي بسكوت اوريو في كيس من أكياس التلاجة وباستخدام أي أداة تقيلة زي مثلًا النشابة كسّريه لحد ما يبقى قطع كبيرة مجروشة، خلي بالك إنه ما ينعمش منك قوي.
- ضيفي نص كمية الاوريو لخليط الزبادي واضربيه تاني في محضرة الطعام لحد ما يندمج مع الخليط. والنص التاني من الاوريو المكسر اخلطيه باستخدام سباتيولا مع خليط الآيس كريم لإضافة قوام مقرمش.
- صبي خليط الآيس كريم في علبة محكمة قابلة لدخول الفريزر.
- احفظي الآيس كريم في الفريزر لمدة ما تقلش عن أربع ساعات كاملين، ويُفضّل ليلة كاملة قبل ما تقدميه.
- قدمي الآيس كريم مع رشة إضافية من الاوريو المجروش وصوص الشوكولاتة.
وصفة ميلك شيك الأوريو والموز
بسكوت أوريو. المصدر thenovicechefblog
الميلك شيك من أكتر المشروبات اللي بيحبوها الأطفال والموز كمان واحد من الفواكه المفضلة جدًا ليهم، فما بالكم بقى لما نعمل لهم ميلك شيك بالاوريو مع الموز؟ في الوصفة دي، هنستغل الموز اللي استوى وقشرته بقت غامقة ونحطه في الفريزر عشان يضيف قوام حلو قوي للميلك شيك بدل ما نستخدم التلج.
المقادير
- 2 موزة مجمدة
- 2 بولة آيس كريم فانيليا
- 1/4 كوب لبن ساقع
- 5 قطع بسكوت اوريو
- معلقة صغيرة فانيليا سايلة
- صوص كراميل جاهز
- كريمة مخفوقة للتقديم
- بسكوت اوريو كامل للتزيين
الطريقة
- في الخلاط هتضيفي اللبن وآيس كريم الفانيليا والموز المجمد والفانيليا السايلة واضربي كله كويس. لو احتاجتي تخففي القوام، تقدري تضيفي لبن زيادة.
- ضيفي الاوريو واخلطي مرة تانية لحد ما يمتزج جوه الميلك شيك.
- زيني كوباية التقديم بشوية من صوص الكراميل الجاهز وصبي العصير وزينيه بالكريمة المخفوقة وبسكوت الاوريو.
الاوريو المقلي بعجينة البانكيك
بسكوت أوريو. المصدر me.popsugar
أنا متأكدة إن الأطفال هيحبوا الوصفة دي جدًا لإنها بتجمع بين حاجتين بيحبوهم قوي: الاوريو والبان كيك. كمان الأمهات هتتبسط قوي لإنها هتعمل نوعين حلو بوصفة واحدة بس وبمنتهى السهولة، يلا جربيها وابهريهم.
المقادير
- أي عجينة بان كيك بتحبيها محضرة في البيت وتقدري تستخدمي أي خليط بان كيك جاهز كمان.
- بسكوت اوريو كامل.
- زيت نباتي للقلي.
- سكر بودرة للتقديم.
الطريقة
- غطسي البسكوت في عجينة البانكيك الجاهزة واقليه في زيت غزير لحد ما ياخد لون ذهبي.
- رشي عليه سكر بودرة وقدميه.
كاسات التشيز كيك بالاوريو والفراولة
المقادير لعمل 6 كاسات متوسطة الحجم
لخليط التشيز كيك
- 350 جم جبنة كريمي في حرارة الغرفة.
- 100 جرام من الكريمة الحامضة أو اللبنة في حرارة الغرفة.
- 2 مغلف بودرة الكريم شانتيه.
- 100 مل كريمة خفق سايلة.
- 1/2 كوب سكر بودرة منخول.
- معلقة صغيرة فانيليا.
- 15 قطعة بسكوت اوريو مطحون ناعم.
لطبقة البسكوت
- 20 بسكوتة اوريو مطحون ناعم (تقدري تزودي أو تقللي حسب الحاجة)
لطبقة الفراولة
- نص كيلو فراولة مقطعة مكعبات صغيرة.
- معلقة صغيرة فانيليا.
- 2 معلقة كبيرة سكر.
- عصير نص ليمونة.
للتزيين
- كريمة مخفوقة.
- حبات اوريو كاملة.
الطريقة
- اخلطي كل مكونات طبقة الشيز كيك مع بعض بالمضرب الكهربائي.
- على النار، ارفعي مكونات طبقة الفراولة وسيبيها تستوي على نار هادية لحد السكر ما يدوب ويتقل قوام الحشوة، سيبيها تبرد تمامًا قبل استخدامها.
- جمعي التشيز كيك في الكاسات، طبقة من البسكوت وطبقة من الشيز كيك وطبقة من حشوة الفراولة وكرري الطبقات لو تحبي لحد الكاسات ما تتملي وسيبيها في التلاجة لمدة ما تقلش عن خمس ساعات.
- زيني بالكريمة المخفوقة وبسكوت اوريو.
فادج الاوريو والشوكولاتة البيضا
الفادج من الحلويات السهلة جدًا ومكوناتها قليلة وإضافة الاوريو ليه بتدي له طعم مميز.
المقادير
- 200 جم من اللبن المكثف المحلى.
- 225 جم من الشوكولاتة البيضا.
- كوب وربع من بسكوت اوريو (مقطع بالسكينة قطع كبيرة)
الطريقة
- في حمام مائي، دوبي الشوكولاتة البيضا لحد ما تسيح تمامًا.
- ضيفي اللبن المكثف للشوكولاتة البيضا وقلبيهم كويس.
- ضيفي الاوريو المقطع للمزيج وقلبي كويس من غير ما تكسري الاوريو لقطع أصغر.
- في صينية مربعة أو مستطيلة مبطنة بورق الزبدة، صبي المزيج وتقدري تزودي قطع تانية من اوريو على الوش.
- سيبي الفادج في التلاجة لحد ما يتماسك وبعدين طلعيه من الصينية بمساعدة ورق الزبدة وقطعيه مربعات وقدميها.
التعليق باستخدام حساب فيس بوك