10 وصفات شوربة سهلة وسريعة في رمضان

طبق الشوربة بيكون أساسي على كل سفرة، ومش لازم الشوربات تكون مملة وتقليدية. فبنحتاج وصفات شوربة في رمضان جديدة وتكون صحية ولذيذة. المشكلة دايمًا بتكون إن مش كل البيوت بيكون عندها مرقة فراخ أو لحمة يوميًا.

 

عشان كده، هقول لك النهارده على فكرة لولبية ومغذية وهي مرق الخضار البيتي اللي ممكن يكون أساس روعة لأي شوربة تعمليها. الفكرة ببساطة هي إنك هتبدأي تشوفي إيه الخضار الموجود في تلاجتك: كوسة، جزر، بصل، كرات، فصوص توم، فاصوليا،كرفس، أي خضروات موجودة عندك مع أي نوع من الأعشاب العطرية زي الزعتر، روز ماري، أو عيدان البقدونس أو الكزبرة، هتقطعي كل الخضار تقطيع عشوائي وتغطيهم بالمياه الباردة وتضيفي عليهم أي بهارات تحبيها زي القرفة والحبهان وورق اللورا وحبوب الفلفل الأسود وتسيبيهم يغلوا على نار هادية. هيبقى عندك في النهاية مرقة خضراوات كلها نكهة وفايدة وتكون أساس في أي وصفات شوربة هتحضريها.

 

ممكن تشوفي هنا منيو أول أسبوع في رمضان أكلات شرقية

ليه الشوربة مهمة على سفرة رمضان؟!

• طبق الشوربة على الفطار في رمضان مقدس عند كتير من الناس وما يقدروش يفطروا من غيره، والحقيقة هي عادة صحية جدًا إننا نبدأ بيها وجبة الفطار وفوايدها كتير قوي. من فوايد طبق الشوربة على الفطار وخصوصًا لو كان المكون الأساسي
• فيها نوع أو أكتر من الخضار
• فيها نسبة عالية من الألياف فبالتالي بتحافظ على تنظيم حركة الجهاز الهضمي وبتقلل من حدوث الإمساك وانتفاخات المعدة.
• غنية جدًا بالفيتامينات والمعادن الموجودة في الخضار والأساس بتاع الشوربة سواءً كان مرقة فراخ أو لحمة أو حتى مرقة خضراوات بس.
• طبق الشوربة بيجهّز المعدة لاستقبال وجبة الفطار والأهم بقى إنه بيملى المعدة ويحسسنا بالشبع بسرعة عشان ما ناكلش كتير على الفطار ونرجع نندم ومعدتنا تتعب.

يلا بينا نحضر مع بعض وصفات شوربة لذيذة وسهلة لفطور رمضان عشان تكون بداية لذيذة وصحية.

 

10 وصفات شوربة في رمضان 2022 صحية وسهلة وسريعة

1. شوربة الطماطم بالشوفان
2. شوربة لسان العصفور بالجزر والكرفس
3. شوربة المشروم بالكريمة
4. شوربة الطماطم المشوية المكسيكية
5. شوربة البروكلي بالكريمة
6. شوربة النودلز مع الخضار والفراخ
7. شوربة العدس بالطريقة الهندية
8. شوربة الفريك مع الخضار
9. شوربة الكوسة الكريمية
10. شوربة القرع والجزر

 

طريقة عمل شوربة الطماطم بالشوفان

 

مقادير شوربة الطماطم بالشوفان

• 4 ثمرات طماطم مقطعة مكعبات
• 1/4 كوب كرفس مقطع مكعبات
• 1 تمرة بصل كبيرة مقطعة مكعبات
• 2 فص توم
• 1/4 كوب عصير طماطم مركز
• 1 لتر مرقة (فراخ أو لحم أو خضار)
• 1/2 كوب شوفان سريع الطهي
• 1 كوب ماء بارد لتذويب الشوفان
• ملح وفلفل
• 1 عود قرفة خشب
• 2 فص حبهان
• 2 فص قرنفل
• زبدة أو زيت زيتون
• للتقديم عصير ليمون وبصل أخضر

 

طريقة عمل شوربة الطماطم بالشوفان

• في حلة عميقة، هتشوّحي كل الخضراوات في معلقتين من زيت الزيتون أو الزبدة.
• ضيفي للخضار كل البهارات السليمة: القرفة والقرنفل والحبهان وشوّحيهم لحد ما تطلع ريحتهم.
• ضيفي عصير الطماطم المركز والمرقة وغطي مزيج الشوربة وسيبيها على نار هادية لمدة نص ساعة.
• اطحني الشوربة بالمضرب اليدوي أو الخلاط لحد ما تبقى ناعمة جدًا ورجعيها على النار تاني.
• دوّبي الشوفان في المياه أو اللبن البارد قبل ما تضيفيه للشوربة عشان لو أضفتيه مباشرة هيعمل تكتلات ومش هيدوب كويس.
• ضيفي الملح والفلفل للشوربة وسيبيها على نار هادية بعد إضافة الشوفان لمدة 10 دقايق.
• قدمي الشوربة مع عصير الليمون ورشة بصل أخضر.

 

 

ممكن تشوفي هنا .. سمبوسك بالجبنة على طريقة سالي فؤاد

 

طريقة عمل شوربة لسان العصفور بالجزر والكرفس

 

مقادير شوربة لسان العصفور بالجزر والكرفس

• 1/2 كوب لسان عصفور
• 1 لتر مرقة فراخ
• 1/4 كوب جزر مبشور
• 1/4 كوب كرفس مفروم ناعم
• 1/4 كوب بصل أخضر مفروم ناعم
• ملح وفلفل
• زبدة
• مستكة

 

طريقة عمل شوربة لسان العصفور بالجزر والكرفس

• في معلقة من الزبدة، دوّبي فصين من المستكة وبعدين ضيفي لسان العصفور.
• شوحي لسان العصفور في الزبدة لحد ما يبقى لونه ذهبي.
• ضيفي الخضروات: الكرفس والجزر والبصل الأخضر وقلبيهم تقليبة واحدة قبل ما تضيفي مرقة الفراخ.
• ضيفي الملح والفلفل للشوربة وغطيها، وبعد ما تغلي، هدّي النار لحد لسان العصفور ما يستوي.
• قدمي الشوربة سخنة مع شرايح الليمون وتقدري كمان تضيفي لها شرايح أو مكعبات من الفراخ المسلوقة.

 

 

طريقة عمل شوربة المشروم بالكريمة

 

مقادير شوربة المشروم الكريمية

• 200 جم مشروم (يطحن داخل الشوربة)
• 100 جم مشروم مقطع شرايح
• زبدة وزيت نباتي
• 1/2 كوب كريمة
• 1 لتر مرقة (خضار أو فراخ)
• أعواد زعتر طازة
• بصلة صغيرة مفرومة
• 2 فص توم مفروم
• 1/4 معلقة قرفة ناعمة
• ملح وفلفل
• بقدونس للتقديم

 

طريقة عمل شوربة المشروم الكريمية

• في معلقة من الزبدة والزيت النباتي على نار متوسطة، شوّحي البصل المفروم مع 200 جم مشروم مقطع أرباع لحد ما الخضروات تطرى وتظهر ريحتها.
• ضيفي التوم والملح والفلفل والقرفة وأعواد الزعتر وقلبيهم مع باقي المكونات وبعدين ضيفي المرقة.
• غطي الشوربة وسيبيها حوالي نص ساعة على نار متوسطة.
• ارفعي أعواد الزعتر من الشوربة، وباستخدام الخلاط أو المضرب اليدوي، اضربي الشوربة لحد ما تبقى ناعمة جدًا.
• في معلقة صغيرة من الزبدة، شوحي 100 جم من المشروم المقطع شرايح على نار عالية لحد ما توصلي للون ذهبي جميل.
• رجعي الشوربة تاني على النار وضيفي لها المشروم المتشوح وظبطي الملح والفلفل.
• لو قوام الشوربة سميك، تقدري تخفيه بالمرقة، ولو خفيف تقدري تدوبي معلقة دقيق مع شوية من المرقة أو المياه الباردة وتضيفيها للشوربة.
• ضيفي كريمة الطهي وقلبيها مع الشوربة.
• قدمي الشوربة مع رشة بقدونس وشوية من الكريمة على الوش واستمتعي

 

طريقة عمل شوربة الطماطم المشوية المكسيكية

 

مقادير شوربة الطماطم المشوية المكسيكية 

• 1 لتر مرقة دجاج
• 1/2 كوب ذرة حلوة معلبة مغسولة و مصفاه
• 1/2 كوب فاصوليا سودا أو حمرا معلبة مغسولة و مصفاه
• 1 بصله حمرا صغيرة مفرومة ناعم
• 1 فص توم مفروم
• 1 فلفل هالوبينو حار مفروم ناعم(إختياري)
• 5 ثمرات طماطم مقطعة أنصاص
• 1 معلقة صغيرة بابريكا
• 1 معلقة صغيرة أوريجانو
• 1 معلقة صغيرة كمون
• عصير ليمون
• ملح و فلفل
• للتقديم
• كزبره خضرا-شرايح عيش تورتيلا مقلية-كريمة حامضة

 

طريقة شوربة الطماطم المشوية المكسيكية 

• لشوي الطماطم رصي الطماطم على صينية للفرن مع رشة وفيرة من زيت الزيتون ،الملح ،والفلفل و إشويها في فرن متسخن على حرارة 220 لمدة 45 دقيقة لحد متستوي تماما.
• بعد متبرد الطماطم إتخلصي من قشرتها وإهرسيها.
• لعمل الشوربة شوحي البصل والتوم في زيت زيتون وضيفي الفلفل الهالبينو والبهارات لحد متطلع ريحتها.
• ضيفي الطماطم المشوية المهروسة وقلبيها كويس مع المزيج وضيفي مرقة الدجاج وسيبي الشوربة تغلي لمدة نص ساعة.
• ضيفي الذرة والفاصوليا المعلبه وعصرة الليمون وقدمي الشوربة مع شرايح التورتيلا المقلية، الكزبرة الخضرا، والكريمة الحامضة.

 

 

طريقة عمل شوربة البروكلي بالكريمة

مقادير شوربة البروكلي:

• 3 أكواب من زهرات البروكلي
• 1 لتر مرقة دجاج أو خضار
• 1 بصلة متوسطة مقطعة مكعبات
• 1 معلقة صغيرة جنزبيل مفروم
• 1/2 كوب كريمة طهي
• عصير ليمون
• ملح وفلفل
• 1/4 معلقة جوزة الطيب
• زبدة

طريقة عمل شوربة البروكلي:

• قي قليل من الزبدة شوحي البصل لحد ميبقى شفاف وضيفي الجنزبيل المفروم.
• ضيفي زهرات البروكلي وشوحيها مع البصل والجنزبيل وضيفي الملح والفلفل ومرقة الدجاج.
• بعد متغلي الشوربة هدي النار وسيبيها تغلي لمدة نص ساعه.
• إضربي الشوربة بالمضرب اليدوي أو الخلاط لحد متبقى ناعمة جدا.
• رجعي الشوربة على النار وضيفي الكريمة وجوزة الطيب مع عصرة ليمون وقدميها مع مكعبات التوست المحمص.

 

 

طريقة عمل شوربة النودلز مع الخضار والفراخ

 

مقادير شوربة الخضار بالنودلز:

• 1/2 كوب شرايح صدور فراخ مسلوقة
• 1/2 كوب نودلز البيض المسلوقة(تسلق زي المكرونة لكن تحتاج وقت أقل للتسوية)
• 1/2 كوب بصل أخضر مقطع شرايح
• 1/2 كوب كوسة مقطعة شرايح رفيعة
• 1/2 كوب جزر مقطع شرايح رفيعة
• 1/4 كوب أعواد الكرفس مقطعة شرايح
• شرايح رفيعة من الجنزبيل
• 1 فص توم مهروس
• 1 معلقة كبيرة صويا صوص فاتح
• 1 معلقة كبيرة عصير ليمون
• ملح وفلفل
• 1 لتر مرقة دجاج
• كزبرة خضرا

طريقة عمل شوربة الخضار بالنودلز:

• في حلة على النار إرفعي مرقة الفراخ و ضيفي عليها الصويا صوص ،شرايح الجنزبيل ،التوم المهروس و سيبيها لحد متبدأ تغلي.
• ضيفي شرايح الفراخ المسلوقة والخضار حسب الأنواع إلي بتحتاج تسوية وقت أطول يعني إبدأي بالجزر والكرفس و بعدين الكوسة والبصل الأخضر إحنا محتاجين الخضار يطرى شوية لكن يفضل محافظ على قرمشتة.
• ضيفي النودلز المسلوقة وقلبي كل المكونات و زودي الملح والفلفل و عصير الليمون
• قدميها مع أوراق الكزبرة و مزيد من الليمون.

 

 

طريقة عمل شوربة العدس الهندية

 

مقادير شوربة العدس الهندية

• 1 كوب عدس أصفر مغسول و متصفي
• 5 أكواب من مرقة الخضار
• 2 تمرة طماطم مقشرة و مقطعة مكعبات
• 1 بصلة متوسطة مفرومة ناعم
• 2 معلقة صغيرة توم مفروم
• 2 معلقة صغيرة جنزبيل مفروم
• 1 قرن فلفل حراق مفروم ناعم
• 1 معلقة صغيرة كمون
• 1 معلقة صغيرة كزبرة ناشفة
• 1معلقة صغيرة كركم
• 1 معلقة صغيرة شطة بودرة
• 1 معلقة صغيرة بهارات الجرام ماسالا
• 1/4 كوب كزبرة خضراء مفرومة ناعم
• معلقة كبيرة سمنه
• ملح وفلفل
• للتقديم
• بصل مقلي-حبوب الكمون-كزبره خضرا-عصير ليمون

 

طريقة عمل شوربة العدس الهندية:

• في حلة على النار ضيفي معلقة السمنة وشوحي البصل المفروم مع التوم،الجنزبيل المفروم ،الفلفل الحار ،والبهارات كلها لحد متطلع ريحة البهارات ويبقى البصل شفاف.
• ضيفي العدس الأصفر و حمصية مع البصل والبهارات و بعدين ضيفي الطماطم المقشرة ومرقة الخضار
• سيبي ىالشوربة توصل للغليان و هدي النار و غطيها و سيبيها لمدة نص ساعة عشان تمتزج النكهات والعدس يستوي تماما ويذوب في الشوربة.
• ممكن تهرسي الشوربة تماما لو حيتي لكن يفضل تقديمها بدون هرسها.
• ضيفي معلقة من الكزبرة الخضرا وعصرة ليمون وقدميها مع البصل المقلي وحبوب الكمون المتحمصة في شوية سمنه والكزبرا الخضرا.

 

 

طريقة عمل شوربة الفريك مع الخضار

المقادير:

• 1 كوب فريك مسلوق
• 1/4 كيلو لحم فيليه مقطع مكعبات صغيرة جدا(راس عصفور)
• 1 معلقة صغيرة كركم
• 1 كوب طماطم مبشورة
• 1 معلقة كبيرة صلصة طماطم
• 1 ثمرة بصل متوسطة
• 1 ثمرة جزر مبشورة
• 1 لتر مرقة لحم أو خضار
• ملح و فلفل
• 1/4 معلقة قرفة
• زبدة

الطريقة:

• في مكعب من الزبدة شوحي البصل مع الجزر والكركم والقرفة و مكعبات اللحم الفيلية لحد ملونها يتغير و تطلع ريحة البهارات.
• ضيفي الفريك و شوحية مع باقي المكونات.
• ضيفي الطماطم المبشورة والصلصة وحمصيهم مع باقي المكونات كويس.
• ضيفي المرقة و الملح والفلفل و سيبي المكونات تغلي على نار هادية لمدة نص ساعة لحد متتأكدي من تمام تسوية اللحمة.
• قدمي الشوربة مع شاريح الليمون.

 

 

طريقة عمل شوربة الكوسة الكريمية

 

مقادير شوربة الكوسة

• 5 ثمرات كوسة مقطعة مكعبات
• 1 بصله متوسطة مفرومة
• 1 بطاطس مقطعة مكعبات
• 1 معلقة صغيرة نعناع مجفف
• زبدة
• 1/2 كوب كريمة حامضة
• 1 لتر مرقة فراخ
• ملح وفلفل

 

طريقة عمل شوربة الكوسة

• في معلقتين كبار من الزبدة شوحي الخضراوات مع بعض لحد ميطرى و ضيفي المرقة.
• سيبي المزيج يغلي على نار هادية لحد متستوي كل الخضراوات تماما.
• ضيفي الملح والفلفل والنعناع المجفف واضربي الشوربة في الخلاط لحد متبقى ناعمة جدا.
• ضيفي الكريمة الحامضة و قدمي الشوربة.

 

 

طريقة عمل شوربة القرع والجزر

 

مقادير شوربة القرع والجزر

• 250 جم مكعبات القرع
• 2 ثمرة جزر مقطعة مكعبات
• 1/2 كوب كرات
• 1/2 كوب بصل مكعبات
• 1 معلقة صغيرة جنزبيل مهروس
• ملح وفلفل
• زبدة
• 1 معلقة صغيرة قرفة
• 1/2 معلقة صغيرة جوزة الطيب
• 1 لتر مرقة فراخ أو خضار
• 1/2 كوب كريمة
• بذور القرع للتقديم

طريقة عمل شوربة القرع والجزر

• في حلة على النار شوحي الخضروات مع الزبدة والبهارات و ضيفي المرقة.
• سيبي المزيج يغلي على نار هادية لحد تمام تسوية كل الخضراوات.
• إضربي الشوربة بالمضرب اليدوي أو الخلاط و ضيفي الكريمة.
• زينيها ببذور القرع المحمصة.

 

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك