محتويات المقال
كلنا بيكون عندنا قلق شخصي فينا يخص رائحة الفم الكريهة، لأنها بتكون محرجة جدًا للشخص نفسه ومزعجة جدًا للطرف التاني. علشان كده، كتير مننا بيصرف فلوس كتيرة قوي على المنتجات الموجودة في السوبر ماركت والصيدليات اللي بتوعدنا دايمًا إنها هتقضي على المشكلة دي، وهتضمن لنا نفس منعش برائحة متقبلة. بس الحقيقة، الموضوع مش محتاج منك زيارة للسوبر ماركت في رف غسول الفل ولا الصيدليات، لأنك سهل قوي تلاقي الحل موجود عندك في البيت. جبنا لك هنا مجموعة وصفات طبيعية هتلاقي أكيد واحدة أو اتنين منهم موجودين في مطبخك. لو انتظمتي عليها هتلاقي الفرق اللي بتدوري عليه. فتعالي نشوف إيه هي الوصفات دي.
وصفات طبيعية للتخلص من رائحة الفم الكريهة
-
غسول المياه والملح
من أسهل الوصفات إنك تجيبي شوية ملح تدوبيهم في كوبايه مياه دافية، وترجيها كويس لحد ما الملح يدوب. وبعد كده، تتمضمضي بيها لمدة ما تقلش عن تلاتين ثانية، وهتلاقي الريحة راحت على طول. بس هاقول لك حاجة باعملها بشكل شخصي. أنا باحب أستخدم مياه من الفلتر عليها ملح هملايا الصخري الوردي، لأن له فوائد صحية ومليان معادن وطبيعي غير معالج زي ملح اليود. علشان أقدر أحصل على أفضل النتائج.
-
القرنفل للتخلص من رائحة الفم
القرنفل دايمًا بننصح بيه الناس اللي عندهم آلام في الأسنان كنوع من أنواع المسكن الطبيعي للأسنان، وده بيتم عن طريق مص بضع فصوص أو قرن من قرون القرنفل. وده طبعًا بعيد تمامًا عن استخدامه مطحون أو زيت، لأنهم بيكونوا حاميين جدًا لدرجة ممكن تسبب حروق. وفيما يخص رائحة الفم، القرنفل له قدرة عالية جدًا على قتل البكتيريا اللاهوائية اللي بتنمو في الفم والمعدة وبالتالي القضاء على سبب الريحة دي.
-
خل التفاح
خل التفاح حل مؤقت لما تكوني واكلة أكلة فيها بصل أو توم وعايزة تخلصي من ريحتها. يعني الوصفة دي مش بتستخدم يوميًا علشان دي ممكن تضر مينا الأسنان. الوصفة بسيطة جدًا. هتجيبي معلقة خل على نص كوباية ميا وتتمضمضي بيها. هتلاقي إن الريحة اختفت من فمك تمامًا.
-
أكل الفواكه والخضروات النيّة
دي من أظرف الوصفات لإن فيه أكل حاجة حلوة زي الفاكهة القاسية. ليه بيتقال فاكهة وخضروات نية؟ علشان النوع ده من الفواكه زي التفاح والكمثرى والجزر والكرفس فيهم ألياف وقشر بيقدر يشيل طبقة البلاك اللي بتتكون على الأسنان. وبالتالي، التخلص من البكتيريا اللي في الفم اللي تنمو مع طبقة البلاك. فهتلاقي معاهم إنك كسبتي كذا حاجة، زي إزالة طبقة البلاك، الحصول على لثة صحية، القضاء على البكتيريا في الفم والمعدة، راحة في الهضم لأنك أكلتي ألياف، وبالتالي مفيش إمساك. يعني وصفة جوكر في نفسها.
-
غسول القرفة والعسل
من الوصفات السهلة جدًا واللي هتلاقيها في مطبخك. وبتتكون من:
- 1 كوباية مياه دافية.
- 1\2 معلقة كبيرة قرفة مطحونة.
- عصير ليمونتين.
- معلقة ونص صغيرة من العسل الطبيعي.
- نص معلقة صغيرة بيكينج صودا.
امزجيهم كويس مع بعضهم، واستخدميهم بالشكل الاعتيادي لاستخدام غسول الفم التجاري. الغسول ده بيفضل صالح للاستخدام لمدة تصل لأسبوعين.
دي أسهل الوصفات اللي هتلاقي مكونات واحدة منهم أكيد في البيت عندك. وأكيد هتلاقي نتيجة في الانتظام مع واحدة منهم. بس لو لاحظتي إنك مش محققة النتيجة اللي عايزاها، يبقى ده الوقت اللي هتحتاجي تحجزي موعد مع طبيب أسنانك. لأن ممكن الموضوع يكون فيه مرض في اللثة مثلًا أو في المعدة هيحتاج منك تاخدي إجراء دوائي. وما تنسيش أبدًا: ما تهمليش في صحتك.
التعليق باستخدام حساب فيس بوك