محتويات المقال
من أكتر المشاكل اللي بتواجهها الستات هي الأظافر الضعيفة والمتكسرة وخصوصًا بعد الولادة.. لو حابة إنك تهتمي بشكل ونعومة أظافرك. في الموضوع ده، هنعرفك أسباب ضعف الأظافر وكمان وصفات طبيعية تقدري تعمليها في البيت لتقوية الأظافر الضعيفة.
أسباب ضعف الأظافر
- كتر استخدام المنظفات زي المواد المطهرة والمواد الكيماوية اللي بتكون موجودة في صابون غسيل الأطباق وكتر التعرض لها بشكل يومي بيخليها ضعيفة وأكتر عرضة للكسر بسرعة.
- المواد الكيماوية اللي بتكون موجودة في مزيل طلاء الأظافر (الأسيتون) والتعرض المتكرر للمواد الكيميائية في الجل والأكريليك بيسبب ضعف وتكسير للأظافر.
- نقص الكالسيوم أو بعض الفيتامينات أو الأنيميا.
إزاي تعتني بصحة أظافرك من التكسير؟
- استشيري طبيبك لعمل التحاليل اللازمة عشان تشوفي لو عندك أنيميا أو نقص فيتامين أو كالسيوم عشان تقدري تعالجي المشكلة.
- البسي جوانتي وانتي بتستخدمي المنظفات أو في وقت غسيل الحوض عشان تقللي من التعرض للمواد الكيماوية الضارة الموجودة فيهم.
- لو الأظافر ضعيفة، يفضّل تقللي تعرضها للجل والأكريليك والأسيتون.
- الحفاظ على ترطيبهم باستخدام كريمات ومراهم طبية مخصوصة.
ودي 3 وصفات طبيعية تقدري تعمليها في البيت بمكونات بسيطة عشان تحافظي على صحة أظافرك
الوصفة الأولى
مصدر الصورة: fabhow.com
هتحتاجي:
- معلقة كبيرة عصير ليمون
- عدد 3 معلقة كبيرة زيت زيتون
الطريقة
هتدفي زيت الزيتون مع الليمون وبعدين هتحطيه على أظافرك بقطنة صغيرة. يُفضّل إنك تلبسي جوانتي وتنامي بيه لحد الصبح وممكن تكرري الخلطة دي مرتين أو تلات مرات في الأسبوع.
الوصفة التانية
مصدر الصورة: nailfungustreatment.com
هتحتاجي:
- زيت جوز هند
- عصرة ليمون
الطريقة
ممكن تدهني زيت جوز الهند على أظافرك وتسيبيه عليهم من مرتين لتلات مرات في اليوم أو ممكن تحطي زيت جوز الهند مع عصرة ليمونة وتنقعي أظافرك فيهم قبل النوم. يُفضّل إنك تغطي إيدك بجوانتي وتنامي بيه لنتايج أفضل.
الوصفة التالتة
مصدر الصورة: Pinterest
هتحتاجي:
- عسل
- ليمون
الطريقة
هتخلطي مقدار عسل مع شوية عصير ليمون وتحطيه على أظافرك من 10 لـ 15 دقيقة وتشطفيه كويس أوي وتكرري الوصفة دي مرتين أو تلات مرات أسبوعيًا.
المصدر:
Webteb
التعليق باستخدام حساب فيس بوك