محتويات المقال
الأظافر واحدة من أجمل علامات الجمال في حياة كل واحدة مننا، ده غير إن صحة الأظافر دايمًا معبرة عن صحة الجسم. لازم نعترف إن أظافرنا بتتعرض لكمية إجهاد غير طبيعية بسبب إنها جزء أساسي من إيدينا وأقدامنا، وهنا نقطة مهمة جدًا: فيه ناس بتهتم بأظافر إيدبها وتهمل الأقدام، وده خطأ شائع، لازم الاهتمام يكون للاتنين. عمومًا مع التقدم في العمر، الأظافر نفسها سمكها بيقل، وبالتالي بتحتاج رعاية أكبر. علشان كده، جبنا لك خمس وصفات طبيعية غالبًا هتلاقيهم كلهم في تلاجتك ومطبخك، والحلو فيهم إنهم خاليين من المواد الكيميائية اللي تأثيرها السلبي على أظافرك واضح ومعروف زي المنتجات التجارية المتوفرة في الأسواق. فتعالي معانا اتعرفي على الوصفات دي وفي الآخر هاقول لك شوية نصائح لازم تعمليها علشان تحصلي على أظافر صحية وقوية.
عشان تعرفي طريقة تركيب الأظافر في البيت بسهولة، دوسي هنا.
وصفات طبيعية لــ تقوية وتطويل الأظافر
زيت جوز الهند:
زيت جوز الهند من أكتر الزيوت الغنية بالدهون المشبعة اللي ليها دور فعال في ترطيب وتغذية وتقوية الأظافر الهشة. بجانب إنه هيحمي أظافرك من الالتهاب.
طريقة استخدامه: إنك تدفي شوية منه سواء على النار أو في الميكروييف، وتدهني به أظافرك كلها وتدلكيها لمدة خمس دقايق. كرري العملية دي من مرتين لتلاتة يوميًا، هتلاحظي فرق عظيم.
عايزة تعرفي فوائد أكتر لزيت جوز الهند؟ ادخلي هنا.
خل التفاح:
من مميزات خل التفاح إنه غني بالكالسيوم والمغنسيوم المغذيين للأظافر، ده غير حمض الخليك اللي عنده قدرة على مقاومة الالتهابات وبالتالي حماية أظافرك منها.
طريقة استخدامه: إنك تمزجي كميات متساوية من الخل والمياه وتنقعي أظافرك فيهم مدة ما تقلش عن 15 دقيقة. بعد كده، قومي بشطف إيدك واستخدام مرطب قوي. داومي على الوصفة دي تلات مرات في الأسبوع وهتلاحظي مع الوقت فرق كبير في قوة وصحة أظافرك.
ملح البحر:
ملح البحر من العناصر الطبيعية اللي بيمتلك قدرة عالية في الاستشفاء من أمراض جلدية كتير، لأنه غني بالمعادن والفيتامينات الصحية. نتيجته دي بتظهر طبعًا مع الاستخدام السليم له، هتلاقي مع انتظامك في استخدامه تحسن واضح مش بس على أظافرك إنما كمان صحة بشرة إيديك.
طريقة استخدامه: الصحيحة هي إنك تدوّبي معلقتين ملح بحر كبار في كوباية مياه وتحطي عليهم زيت جنين القمح أو اللوز أو حتى زيت فيتامين هـ. وانقعي إيديك من 10 لـ 15 دقيقة. بعد كده، اشطفي إيديك بمياه دافية، وحطي كريم مرطب. استخدمي الوصفة دي من مرتين لتلاتة في الأسبوع، وهتلاحظي النتيجة.
عصير الليمون:
دي بقى أسهل وصفة تقوية أظافر على الإطلاق. الليمون من صفاته قدرته على التفتيح والتطهير. ده غير غناه بفيتامين سي صديق البشرة والشعر والأظافر الأول.
طريقة استخدامه: فعليًا انتي مش محتاجة غير عصرة ليمونة على قطنة وتدهني بيها أظافرك وتسيبيها تجف. لو كررتي الوصفة دي تلات مرات في اليوم حتى مش هيكون لها أي ضرر، بالعكس هتلاحظي بعد أسبوعين زيادة كثافة الأظافر وسرعة نموها ولونها الفاتح.
لفوايده الكتير، ممكن تستخدميه في تلات وصفات مختلفة للضوافر المتكسرة.
العسل:
العسل معروف بغناه بالمواد الغذائية اللي بيحتاجها الجسم سواءً داخليًا أو خارجيًا، وقدرته على مقاومة الالتهابات ومقاومة نمو البكتيريا.
طريقة استخدامه: بكل بساطة هاتي معلقة عسل صغيرة وأعصري عليها نص ليمونة واخلطيهم كويس مع بعض وادهني بيها الأظافر وسيبيها من 10 لـ 15 دقيقة. وبعد كده اشطفيهم بالمياه الفاترة. هتلاحظي بنفسك من أول استخدام فرق كبير في نعومة ولمعان أظافرك.
بتفكري تعملي أكريليك، هتلاقي هنا 8 أماكن.
دي الوصفات اللي جبناها لك: سهلة جدًا ومتوفرة في كل بيت تقريبًا. مش ممكن ما تلاقيش واحدة منهم موجودة في البيت. بس زي ما قلت لك في أول المقال، الاهتمام بالأظافر مش مجرد ماسكات أو وصفات طبيعية خارجية، إنما أسلوب حياة بيهتم بسلوكك اليومي وكمان تغذيتك. فاحنا جمعنا لك شوية نصائح هتساعدك في الحصول على الأظافر الصحية اللي بتحلمي بيها.
نصائح للعناية بالأظافر
- قللي من تعرض إيديكي للمياه: يعني لو بتغسلي أطباق لازم تكوني لابسة قفزات. ولو نازلة بحر أو بيسين، حاولى إيديكي تكون دايمًا فوق مستوى المياه.
- اشربي مياه كتير جدًا. يعني مياه من جوه مش من بره.
- خلّي طولهم دايمًا قصير. الطول المبالغ فيه بيعرضها للتلف والتكسير السريع.
- لازم كريم ترطيب يومي أو زيت ترطيب للأظافر بييجي في شكل إزازة صغيرة بكرة دوارة. يعنى سهل قوي تاخدي معاكي في أي حتة.
- ما تحرميش أظافرك من فوائد زيت الزيتون. استخدميه بانتظام ويفضل بالليل قبل النوم، وتنامي وانتي حاطة قفازات قطن خفيفة خلال النوم علشان تسمح بتنفس بشرتك خلال النوم.
- تجنبي مطهرات اليد الغنية بالكحول، لأنها بتجفف البشرة جدًا. ولو مضطرة ليها، لازم تستخدمي معاها مرطب قوي جدًا يتناسب مع نوع بشرتك.
- ما تستخدميش أظافرك كأداة للفتح مثلًا، دي جزء من إيدك مش مفك!
هي دي النصائح، اهتمي باتباعها علشان تقدري تستمتعي بأظافر صحية وعلى رأي نرمين الفقي زمان في الإعلانات: “دلوقتي أقدر أكون ست بيت وبرنسيس.”
التعليق باستخدام حساب فيس بوك