محتويات المقال
الهالات السوداء مشكلة بتتعرض لها كتير من الأمهات بسبب الإجهاد وممكن تكون علامة مشاكل صحية أكبر من الإجهاد. طبعًا في حالة الأمراض، لازم نعالج المرض نفسه عشان يكون علاج الهالات السوداء تحت العين. أما في المقال ده، فهنقول لك علاج السواد تحت العين بسبب الإجهاد.
وصفات طبيعية للتخلص من الهالات السوداء في يوم واحد
- الخيار.
- عصير الخيار مع عصير الليمون.
- مياه الورد.
- فتلة الشاي.
- البطاطس.
- فيتامين هـ (E).
- كلي سلمون وعين جمل.
- كثرة شرب المياه وقللي استهلاك الأملاح.
الخيار
الخيار له خصائص بتفتح البشرة وبكدا فشرائح الخيار هتكون مفيدة جدًا وفعالة في التخلص من الهالات السوداء تحت العين. لكن عشان يكون الخيار حل فعال للتخلص من الهالات السودا، يفضل تستخدميه ككمادة للعين مرتين في اليوم. قطعي الخيارة لشرايح سميكة ودخليها التلاجة لمدة 30 دقيقة وبعدين سيبي الشرايح على عينيكي لمدة 10 دقايق. اشطفي عينيكي بميا فاترة ومش سخنة.
عصير الخيار مع عصير الليمون
لو شرايح الخيار ما جابتش معاكي مفعول كبير، ممكن تجربي تعصري مقدار متساوي من الخيار مع الليمون واستخدمي قطنة في إنك تمسحي بيها منطقة الهالات السودا من غير دخول العصير جوا عينيكي. اشطفي العينين بعد ربع ساعة بميا دافية.
مياه الورد
مياه الورد لها خصائص تجميلية كتير، بس بالذات في تفتيح البشرة وتجديد البشرة المجهدة، له سحر هايل. بس حطي قطنة (يفضل القطنة الدائرية لمسح المكياج) في مياة الورد لدقايق وبعدها غمضي عينيكي وحطي القطنة على عينيكي (زي شرايح الخيار) سيبيها لمدة 15 دقيقة وكرري الموضوع ده مرتين في اليوم.
فتلة الشاي
الشاي وخصوصًا الشاي الأخضر فيه مضادات أكسدة وله خصائص مضادة للالتهابات. انقعي فتلة الشاي في ميا وحطيها في التلاجة لمدة 30 دقيقة وبعدين حطيها على عينيكي لمدة 10 دقايق مرتين في اليوم واشطفي عينيكي بميا دافية.
البطاطس
مش معروف عن البطاطس معلومة مهمة وهي إنها مصدر لفيتامين سي، ودا من فوايده إنه بيستحث الكولاجين اللي بيخلي البشرة شابة وصحية. وعشان تستفيدي من البطاطس في علاج الهالات السودا، ابشري حبة البطاطس وبعدين بايديك اضغطي على المبشور عشان تنزلي منه المياه. حطي قطنة إزالة المكياج في المياه دي وحطيها على عينيكي لمدة 10 دقايق وبعدين اشطفيها بميا دافية.
فيتامين هـ (E)
فيتامين هـ بيساعد في توقيف التجاعيد وآثار السن. بس كمان هتساعد في نضارة جزء الجفن. حطي نقطة من الحباية تحت كل عين وبنعومة شديدة دلكي تحت العين قبل النوم. سيبيها لتاني يوم الصبح واشطفي وشك بميا دافية.
كلي سلمون وعين جمل
الأوميجا 3 الموجودة في السلمون وعين الجمل بتحسن في وصول الدم للبشرة وده بيخلي الدم يجري بشكل كويس لوشك وتحت عينيكي.
كثرة شرب المياه وقللي استهلاك الأملاح
لو جسمك بياخد ملح كتير وميا أقل هتلاقي فيه تورمات وانتفاخات في البشرة عمومًا ولأن البشرة تحت العين من أرق الأماكن في الجسم فطبيعي تكون العينين منفخة لو فيه ملح كتير وميا قليلة في الجسم.
نتمنى تكون الطرق دي فادتك، قولي لنا في التعليقات هتجربي إيه؟
التعليق باستخدام حساب فيس بوك