ألذ 5 طواجن شهية على مائدة رمضان السنة دي

هنتكلم النهارده عن حاجة عظيمة وعبقرية بكل ما تحمله الكلمة من معاني وروائح زكية: الطواجن! ما تفهموش إيه إللي بيحصل أول ما نطبخ الأكل في الطاجن الفخار العظيم، فيه حاجة كده عجيبة غريبة شديدة الجمال بتحصل: الطعم بيختلف، والريحة بتختلف، والنكهات بتبقى معقدة بشكل يخليكي تلسعي لسانك بكل سهولة عشان تدوقي لقمة منه وهو سخن موحوح! وبما إن رمضان 2021 خلاص على الأبواب، فعملنا لك وصفات طواجن رمضان .. هنشارك معاكي 5 طواجن ولا أحلى، هيملوا البيت بروايح تجنن وهيدفوا القلب والمعدة على الفطار. يمكن يكون الطبخ في الطواجن بيحتاج فترة طويلة شوية، لكن إللي بيميزها إن الفرن هو إللي هيقوم بكل الشغل وانتي مش هتعملي أي حاجة من لحظة دخول الطاجن للفرن، غير إنك تشمّي الروايح العظيمة وتشغلي وقتك بأي حاجة تحبيها.

 

كل رمضان وانتي طيبة.

 

ادخلي هنا عشان تعرفي طريقة عمل طاجن محشي ورق العنب بالريش في الفرن

طاجن اللحمة بالبصل

 

مقادير طاجن اللحمة بالبصل

• 1/2 كيلو مكعبات لحم بقري (ويكون فيها نسبة من الدهون)
• 3 بصلات مقطعة شرايح
• 2 فص توم مفروم
• 1 لتر مرقة لحم أو خضار
• 1/2 معلقة صغيرة جوزة الطيب
• 1 معلقة صغيرة بهارات لحم
• 1 ورقة لورا
• 2 فص حبهان
• ملح وفلفل أسود
• 1 معلقة كبيرة زبدة
• 1 معلقة كبيرة زيت نباتي

 

 

طريقة عمل طاجن اللحمة بالبصل

• في حلة على النار، سخني الزيت والزبدة، وضيفي مكعبات اللحمة وشوحيها على نار عالية لحد ما تاخد لون.
• ضيفي كل كمية البصل، والتوم، وشوحيهم مع اللحمة على نار متوسطة، وبعدين ضيفي كل البهارات.
• ضيفي مرقة اللحم لحد ما تغطي كل كمية اللحمة في الحلة وغطيها وسيبيها لحد ما تغلي.
• صبي المزيج في طاجن فخار وغطيه بالفويل، ودخليها فرن متسخن مسبقًا على حرارة 200 لمدة 30 دقيقة.
• بعد مرور 30 دقيقة على الطاجن، خلي حرارة الفرن 160 وسيبي اللحم تستوي براحتها لحد ما تذوب تمامًا.

 

ادخلي هنا عشان تعرفي 5 طرق لتحضير الفول على السحور

 

 

طاجن لسان العصفور باللحمة المفرومة

 

مقادير طاجن لسان العصفور باللحمة المفرومة

• 2 كوب لسان عصفور
• 2 معلقة كبيرة زيت نباتي
• 2 فص مستكة
• 250 جم لحمة مفرومة
• 1 بصلة كبيرة مفرومة
• 2 فص توم مفروم
• 1 حبة فلفل أخضر مقطعة مكعبات
• 1 فلفل أحمر حار (اختياري)
• 1 كوب عصير طماطم طازة
• 1 ونص كوب مرقة لحم أو خضار
• 1 معلقة صغيرة بهارات لحم
• 1 معلقة صغيرة قرفة
• 1 معلقة صغيرة كزبرة ناشفة
• ملح وفلفل أسود

 

طريقة عمل طاجن لسان العصفور باللحمة المفرومة

• في حلة على النار، سخني الزيت والزبدة، وضيفي حبات المستكة لحد ما تدوب تمامًا.
• ضيفي البصل المفروم والتوم وشوحيهم كويس لحد ما تظهر ريحتهم.
• ضيفي اللحمة المفرومة وقلبيها كويس مع باقي المكونات، وضيفي كل البهارات والفلفل الأخضر والحار لو حبيتي.
• ضيفي الملح للحمة المفرومة، وعصير الطماطم، وأخيرًا ضيفي المرقة لتغطية كل المكونات.
• بمجرد وصول المرقة للغليان، انقلي كل المزيج لطاجن فخار وغطيه بالفويل ودخليه الفرن على حرارة 180 لحد ما يستوي تمامًا.
• ارفعي الفويل وحمري وش الطاجن تحت الشوية، قدميه مع رشة بقدونس وجبنة مبشورة (اختياري)

 

 

طاجن العكاوي بالبطاطس

 

مقادير طاجن العكاوي بالبطاطس

• 1 كيلو عكاوي بقري
• 2 بصلة كبيرة مكعبات
• 1 جزرة كبيرة مكعبات
• 2 عود كرات فرنسي مفروم
• 5 فصوص توم مفروم
• 2 ورقة لورا
• 2 حبة طماطم مكعبات
• 1 معلقة كبيرة صلصة طماطم
• 4 حبات بطاطس مقطعة مكعبات كبيرة
• 2 معلقة صغيرة سبع بهارات
• 2 عود زعتر طازة
• 1 لتر مرقة لحم

 

طريقة عمل طاجن العكاوي بالبطاطس

• رصي قطع العكاوي في طبق واسع وعفّريها بالدقيق.
• في حلة على نار عالية، سخني الزيت والزبدة، وابدأي في تحمير قطع العكاوي على دفعات لحد ما توصلي للون دهبي.
• ارفعي كل دفعة من العكاوي في طبق جانبي بعد التحمير، وبعدين ضيفي البصل والجزر والكرات وشوحيهم كويس.
• ضيفي التوم المفروم وورق اللورا وأعواد الزعتر، وقلبي كل المكونات كويس لحد ما تظهر ريحتها.
• ضيفي صلصة الطماطم ومكعبات الطماطم، ورجعي قطع العكاوي للحلة مرة تانية، تبلي بالبهارات والفلفل الأسود.
• ضيفي مرقة اللحمة لحد ما تغمر كل كمية العكاوي وغطي الحلة وسيبي العكاوي على نار هادية.
• بعد ما توصل العكاوي لمنتصف مرحلة السوا، ضيفي مكعبات البطاطس وتبلي بالملح والفلفل، وانقلي كل المكونات لطاجن فخار وغطيه بإحكام.
• دخلي الطاجن في فرن متسخن مسبقًا على حرارة 200.
• بعد مرور 30 دقيقة، هدي النار لـ170 درجة وسيبي العكاوي تستوي تمامًا (مش هتاخد أقل من ساعتين)
• قدمي طاجن العكاوي مع الرز الأبيض ورشة بقدونس.

 

 

طاجن جمبري بالكريمة

 

مقادير طاجن جمبري بالكريمة

• 1/2 كيلو جمبري متوسط الحجم
• 1/4 كوب بقدونس
• 4 فصوص توم مفروم
• 1 معلقة صغيرة بشر ليمون
• 1/4 كوب عصير ليمون
• ملح وفلفل
• 1/2 معلقة صغيرة جوزة الطيب
• 1 كوب كريمة
• 1 كوب مرقة خضار
• 2 معلقة كبيرة دقيق
• 2 معلقة كبيرة زبدة
• 1 كوب جبنة موتزاريلا

 

طريقة عمل طاجن جمبري بالكريمة

• في طاسة واسعة، شوحي الجمبري في معلقتين الزبدة وتبليه بالملح والفلفل والبابريكا، وارفعيه في طبق جانبي.
• في نفس الطاسة، ضيفي التوم المفروم وشوحيه لحد ما يبقى ذهبي، ضيفي الدقيق وقلبيه كويس في الزبدة كإنك بتعملي صوص بشاميل.
• ضيفي مرقة الخضار بالتدريج للدقيق، وقلبي كويس باستمرار باستخدام مضرب سلك لحد ما يتجانس الدقيق مع المرقة.
• ضيفي الكريمة، وعصير وبشر الليمون، وجوزة الطيب، وتبلي بالملح والفلفل، سيبي المزيج يغلي لحد ما يتقل القوام.
• اطفي النار وضيفي الجبنة البارميزان والبقدونس، وصبي الصوص فوق الجمبري في طاجن قابل لدخول الفرن.
• وزعي الجبنة الموتزاريلا على الوجه، ودخلي الطاجن الفرن على حرارة 200 لمدة 15-20 دقيقة، لحد ما تسبح الجبنة وتاخد لون جميل.

 

 

طاجن المكرونة باللحمة المفرومة

 

مقادير طاجن المكرونة باللحمة المفرومة

• 1 كيس مكرونة
• 1/2 كيلو لحمة مفرومة
• 3 معالق كبيرة زيت نباتي
• 1 لتر عصير طماطم
• 2 كوب مرقة لحمة
• 1 بصلة كبيرة مفرومة ناعم
• 1 معلقة كبيرة توم مفروم
• 2 فلفل أخضر مكعبات صغيرة
• 1 فلفل أحمر حار (اختياري)
• 1 معلقة صغيرة قرفة
• 1 معلقة صغيرة كمون
• 1 معلقة صغيرة جوزة الطيب
• 1 معلقة صغيرة سبع بهارات
• 1 معلقة صغيرة بابريكا
• للوجه: جبنة مبشورة

 

طريقة عمل طاجن المكرونة باللحمة المفرومة

• في طاسة على نار عالية، ضيفي معلقة من الزيت النباتي وشوحي البصل والتوم لحد ما يصفر لونهم.
• ضيفي اللحمة المفرومة وقلبيها كويس لحد ما يتغير لونها، ضيفي الفلفل الأخضر والفلفل الحار، وتبلي بالملح والفلفل.
• ضيفي عصير الطماطم وباقي البهارات كلها وسيبي المزيج على نار عالية لحد ما يغلي.
• في طاجن فخار عميق، فضي كيس المكرونة (بدون تسوية) وصبي عليها صوص اللحمة المفرومة إللي جهزتيه، وعليهم مرقة اللحمة وتبلي بالملح والفلفل وضيفي 2 معلقة من الزيت النباتي.
• قلبي كل المكونات مع بعض وغطي الطاجن بإحكام ودخليه الفرن المسخن مسبقًا على حرارة 180 وسيبيه لمدة ساعة تقريبًا، أو لحد ما تستوي المكرونة وتتشرب السوائل.
• رشي الجبنة المبشورة على الوش وحمريها في الشواية، وقدميها.

 

ادخلي هنا عشان تعرفي طريقة عمل طاجن أم علي

 

 

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك