أسهل فطار: 5 وصفات بسيطة لعمل الفراخ في الفرن

على قد ما بنستنى شهر رمضان من السنة للسنة، على قد ما دايمًا بنشيل هم الفطار وتحضيره. 30 يوم من التفكير في وصفات متنوعة عشان الولاد ما يزهقوش، ده غير التعب والإرهاق من وقفة المطبخ مع الصيام كل يوم! الحقيقة إن رمضان مش محتاج مليون صنف على السفرة، ولا وقفة في المطبخ 5 ساعات، الموضوع محتاج بس إنك تكوني ذكية في اختيارك للأكلات الإفطار إللي تنجز معاكي. عشان كده النهارده، هنقدم لك أكتر من طريقة لعمل الفراخ في الفرن، وأكتر من مذاق للفراخ المشوية في الفرن بتتبيلات مختلفة، مع إضافة خضار أو بدون خضار لكل وصفة طعم ومذاق مميز.

 

ادخلي هنا عشان تعرفي طريقة عمل صدور الدجاج بصوص الباربيكيو بالفيديو.

 

مش هتحتاجي مع الوصفات دي أكتر من طبق رز لذيذ وأي نوع سلطة بتحبه أسرتك. وصفات النهارده مناسبة جدًا ليكي لو كنتي بتشتغلي، وده لإنها قابلة إنها تتجهز الليلة اللي قبل طبخها، بحيث كل ما عليكي هو إنك تدخليها الفرن وتكملي كل مهامك، لحد معاد الفطار، لإن الفرن هو إللي هيقوم بكل المهمة.

 

ادخلي هنا عشان تعرفي طرق متنوعة لطهي صدور الدجاج المخلية.

 

 

صينية دبابيس الفراخ مع البطاطس والمستردة

 

المقادير

• 1 كيلو دبابيس الدجاج
• 1/2 كيلو بطاطس بيبي
• 1 معلقة كبيرة مستردة
• 5 فصوص توم مفرومين
• 1 معلقة كبيرة عسل
• 1 كوب مرقة دجاج
• أعواد الزعتر
• ملح وفلفل
• زيت زيتون

 

طريقة عمل صينية دبابيس الفراخ مع البطاطس والمستردة

• في بولة كبيرة، تبلي دبابيس الدجاج بالملح والفلفل وزيت الزيتون.
• في صينية قابلة لدخول الفرن، شوحي دبابيس الدجاج على نار عالية لحد ما توصلي للون دهبي.
• ضيفي حبات البطاطس الصغيرة والتوم المفروم وشوّحيهم مع الدبابيس.
• أخيرًا ضيفي المستردة، العسل، أعواد الزعتر ومرقة الدجاج وسيبي المزيج لحد ما يغلي.
• دخّلي الصينية الفرن على حرارة 200 حتى تمام النضج.

 

 

صينية الفراخ بالليمون المعصفر والزيتون على الطريقة المغربية

 

المقادير

• 1 فرخة متوسطة الحجم مقطعة أرباع
• 1/4 كوب زيت زيتون
• 2 حبه ليمون معصفر مفروم
• 5 حبات زيتون أخضر مفروم
• 1 بصلة متوسطة مفرومة ناعم
• 3 فصوص توم مفروم ناعم
• 1/2 كوب كزبرة خضراء مفرومة
• 1 معلقة صغيرة كركم
• 1 معلقة صغيرة بابريكا
• 1 معلقة صغيرة جنزبيل
• 1 معلقة صغيرة شطة (اختياري)
• ملح وفلفل أسود
• عصير ليمونة

 

طريقة عمل صينية الفراخ بالليمون المعصفر

• اخلطي كل المكونات مع بعض، وافركي الفراخ بالتتبيلة كويس جدًا ودخلي التتبيلة بين الجلد ولحم الدجاج.
• رصي الفراخ في صينية فرن وغطيها بالفويل ودخليها لفرن متسخن على حرارة 200 لمدة 30 دقيقة.
• بعد مرور 30 دقيقة، ارفعي الفويل وسيبي الفراخ لحد ما تاخد لون دهبي وتستوي تمامًا.
• قدميها مع الرز الأبيض، التتبيلة مع عصارة الفراخ هتكون صوص روعة في الجمال للتغميس مع الرز.

 

 

صينية الفراخ بالأعشاب والخضروات المشكلة

 

المقادير

• 1 فرخة كاملة
• ملح وفلفل
• 2 معلقة صغيرة بابريكا
• روز ماري طازة مفروم
• زعتر طازة
• 1/2 كوب زبدة في حرارة الغرفة
• 4 فصوص توم مفرومين
• 1 معلقة كبيرة بشر ليمون
• خضروات مشكلة مقطعة قطع كبيرة (بصل-جزر-بطاطس-كوسة-كرفس-بطاطا)

 

هنا ممكن تشوفي 5 وصفات شهية للشيف مي يعقوبي

 

طريقة عمل صينية الفراخ بالأعشاب

• في بولة، اخلطي كل الأعشاب والتوم المفروم والبابريكا وبشر الليمون مع الزبدة لعمل معجون زبدة منكهة بالأعشاب الطازة.
• تبلي الفرخة بالملح والفلفل من كل الجهات، وبأطراف صوابعك قومي بفصل الجلد عن لحم الفراخ في منطقة الصدر.
• قومي بدهن الفرخة من جميع الجهات بالزبدة المنكهة، ووزعيها بسخاء تحت الجلد فوق الصدر وعند الفخد.
• رصي الخضروات في صينية للفرن لعمل فَرشَة تحت الفراخ وتبلي الخضار بالملح والفلفل والبابريكا وعود من الزعتر والروزماري.
• ضعي الفرخة فوق فرشة الخضروات ودخّليها الفرن على حرارة 180 درجة، وأثناء التسوية قومي بدهن الفراخ بالعصارة إللي هتنزل منها على الخضار لإضافة لمعة ولون دهبي للفراخ.

 

 

طريقة عمل الفراخ المشوية بالبصل والسماق

 

• 1 فرخة مقطعة أرباع
• 1/2 كوب مرقة دجاج

لتتبيلة الدجاج

• 2 معلقة صغيرة 7 بهارات
• 1/4 كوب زيت زيتون
• 1 معلقة صغيرة حبهان مطحون
• ملح وفلفل
• عصير ليمونة
• 1 معلقة كبيرة بودرة بصل
• 2 معلقة صغيرة سماق

لخليط البصل

• 2 بصلة كبيرة مقطعة جوانح
• 1 معلقة كبيرة سماق
• ملح وفلفل
• 1/4 كوب عصير ليمون
• 2 ورقة لورا
• 1/2 كوب زيت زيتون

طريقة عمل الفراخ المشوية بالسماق والبصل

• في بولة كبيرة، تبلي الفراخ بكل مكونات التتبيلة وافركيها كويس.
• في صينية للفرن، اخلطي كل مكونات مزيج البصل ووزعيه بالتساوي في الصينية، ورصي قطع الفراخ فوق البصل.
• صبي 1/2 كوب من مرقة الدجاج على مزيج البصل، وضيفي ورقتين لورا، ودخلي الفراخ الفرن.
• سوي الفراخ في فرن متسخن على حرارة 220 لمدة 30 دقيقة، بعدها ارفعي الفويل وسيبي الفراخ لحد تمام النضج.
• قدميها مع رشة من البقدونس والصنوبر المحمص.

 

 

طريقة عمل الفراخ المشوية في الفرن

 

المقادير

لتتبيلة الفراخ المشوية (لتتبيل فرخة واحدة)

• 1 كوب مياه بصل
• 2 حبة طماطم مبشورة
• 2 معلقة صغيرة زعتر ناشف
• 2 معلقة صغيرة فلفل إسود
• ملح
• 1/2 كوب زيت نباتي
• 1 معلقة كبيرة بهارات الفراخ
• 1/4 كوب عصير ليمون

الطريقة

• اطلبي من الجزار يفتح لك الفرخة من الظهر على شكل فراشة.
• بسكين حامي، قومي بعمل شقوق بسيطة في الفرخة عشان تتداخل التتبيلة لكل لحم الفراخ.
• اخلطي كل مكونات التتبيلة في بولة وتبلي بيها الفراخ كويس ويفضل تركها ليلة كاملة في التتبيلة.
• ضعي الفراخ على شبكة وتحتها صينية فرن مبطنة بالفويل، ودخليها فرن متسخن على حرارة 220 بدون تغطية.
• كل 30 دقيقة، قومي بدهن الفراخ بالعصارة إللي بتنزل منها أو بواقي التتبيلة عشان ما تكونش ناشفة.
• قدميها مع سلطة الطحينة والسلطة والعيش البلدي.

 

ادخلي هنا عشان تعرفي طرق متنوعة لعمل الريش الضاني

 

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك