الحامل عادةً بتكون نفسيتها مرهفة أثناء الحمل، وبسبب تغير الهرمونات بتميل للاكتئاب أو الحزن في حالات كتير. فبتكون محتاجة مامتها أكتر من أي وقت تاني نفسيًا أكتر منها مساعدة مادية في البيت والطبخ. وأغلب الحوامل لو سألتيهم هتعملي إيه في الولادة، يا إما هتقول لك ماما هتيجي تقعد عندي، يا إما هاروح أقعد عند ماما. لكن الأقدار بتكون مخبية لنا حاجات خارج ترتيباتنا المنطقية والبشرية، زي إن والدة الحامل تتوفى قبل الولادة. والحقيقة إن ده موقف من أصعب المواقف اللي ممكن تمر بيها أي واحدة في الحياة، لإن وفاة الأم في الأيام الطبيعية بتكون قاسية جدًا، فما بالك لما يغيّبها القدر في أكتر الأيام احتياج ليها ولدعمها. وفي عز الفرحة بمجيء الحفيد الجديد. بس إحنا مش في إيدينا تغيير القدر، لكن كل اللي في إيدينا إننا نتعامل معاه بعد ما نسلم ونرضى بيه. وفي المقال ده هاقول لك تعملي إيه علشان تقدري تتعايشي مع وفاة الأم أثناء الحمل بسلام.
نصائح للتعامل مع وفاة الأم أثناء الحمل
-
الاعتماد تمامًا على ربنا
فيه جملة بحبها قوي وبتنفعني في أوقاتي الصعبة، بتقول: “الله قدّر هذا وهو كفيل به” وهي كلمات صادقة جدًا. لإن ربنا هو اللي قدّر وفاة الأم في الوقت ده تحديدًا، فهو أكيد القدر ده مش أذى ليكي، صحيح ابتلاء كبير، لكن حاولي تنجحي فيه. وده مش بيحصل بعدم الحزن، أبدًا.. احزني زي ما انتي عاوزة، لكن بدون ما تسخطي على القدر، وكل ما تشيلي هم حاجة كانت مامتك بتعملها لك وحاسة إنك محتاسة من غيرها، اطلبيها من ربنا بالدعاء، هتلاقي أمورك كلها اتدبرت بشكل عجيب.
-
اطلبي المساعدة
طلب المساعدة من القريبين منك مهم جدًا، سواء جوزك أو لو ليكي قرايب ومعارف علاقتكم تسمح إنك تطلبي منهم ده، والمساعدة مش دايمًا مادية، لكن اطلبي منهم يقفوا جنبك نفسيًا الفترة دي. والمساعدة كمان ممكن تكون زيارة مختص نفسي، لو لقيتي إن في أفكار سلبية كتير مسيطرة عليكي، أو لو دخلتي في اكتئاب.
5 علامات بتقولك لازم تروحي لدكتور نفسي
-
افتكري الحلو
حاولي كل لما تفتكري مامتك، ما تفكريش في الحاجات اللي نقصتك بوفاتها، افتكري الحلو اللي كان في حياتكم المشتركة، وافتكري قد إيه كانت فرحانة بحملك، ولو كانت جابت لك هدايا للبيبي اتبسطي بيها، وممكن لو بتحبي الكتابة تكتبي خواطر أو رسايل لمامتك كل يوم.
-
اشغلي نفسك
الوحدة والفراغ بيخلوا الحزن يتملك قلبك، فخلي وقتك مشغول بحاجات حلوة طول الوقت، سواء تتشغلي في تجهيزات البيبي، أو في رياضة وكورسات حاجات بتحبيها ليكي انتي.
وكل ما تتعبي، تقدري تفضفضي في جروب أمهات راحة بالي على الفيسبوك، هتلاقي أمهات كتير معاكي، وهتلاقي حوامل مروا بتجربتك وهيشاركوها معاكي، ومن قلبنا بندعمك في كل وقت.
التعليق باستخدام حساب فيس بوك